Read Twi Asante Mmebusɛm 18 Bible Online

Mmebusɛm 18 - Twi Asante bible

Mmebusɛm 18

¹Deɛ wate ne ho no hwehwɛ anoyie daa, na adepa biara yɛ no ahi.

²Ɔkwasea nni nhunumu ho anika, na mmom sɛ ɔbɛyi n’akoma adie.

³Ɔbɔnefoɔ ba a, animtiabuo nso ba, na adapaa ne ahohora na ɛnam.

⁴Nsuo a emu dɔ ne ɔbarima anomu nsɛm, asutene a ɛba yie ne nyansa abura.

⁵ Ɛnyɛ sɛ wɔhwɛ ɔbɔnefoɔ anim, na wɔdane ɔteneneeni asɛm ani atemmuo mu.

⁶Ɔkwasea ano ma ntɔkwa ba, na n’afono frɛfrɛ asotorɔ.

⁷ Ɔkwasea ano ne ne sɛeɛ, na n’anofafa ne ne kra fidie.

⁸ Asomkasani nsɛm te sɛ mfremfremadeɛ, na ɛsiane kɔ ɔyafunu mpia mu.

⁹ Deɛ ɔtoto n’adwuma aseɛ nso, ɔdesɛefoɔ nua ne no.

¹⁰ Aban denden ne AWURADE din, ɛno mu na ɔteneneeni dwane korɔ, na wɔkora no.

¹¹ Ɔdefoɔ ahonyadeɛ ne ne kuro a ɛyɛ den, na ɛte sɛ ɔfasuo a ɛkorɔn n’adwene mu.

¹² Deɛ ɛdi ɔsɛeɛ anim ne sɛ ɔbarima akoma a ɛma ne ho soɔ, na deɛ ɛdi animuonyam anim ne ahobrɛaseɛ.

¹³Deɛ ɔbua asɛm ansa na ɔteɛ no, ɛyɛ agyimisɛm ne aniwuo ma no.

¹⁴ Onipa honhom tumi soa yadeɛ, na honhom a ɛdi yea deɛ, hwan na ɔbɛtumi asoa?

¹⁵Nhunumufoɔ akoma nya nimdeɛ, na anyansafoɔ aso hwehwɛ nimdeɛ akyiri kwan.

¹⁶ Onipa ayɛyɛdeɛ bɔ kwan ma no, na ɛde no ba nnipa akɛseɛ anim.

¹⁷Deɛ ɔbɔ ne nkuro kane yɛ sɛ ɔteneneeni kɔsi sɛ ne yɔnko ba bɛpeepee mu.

¹⁸ Ntonto pata ntɔkwa, na ɛpae atumfoɔ ntam.

¹⁹Onua a wɔafom no sene kuro denden, na ntɔkwa te sɛ abankɛseɛ akyiri adaban.

²⁰ Ɔbarima anomu aba ma ne yafunu mee, n’anomu nnɔbaeɛ mee no.

²¹ Owuo ne nkwa wɔ tɛkyerɛma tumi so, na deɛ ɔdɔ no no bɛdi n’aba.

²² Deɛ wanya yerɛ no, wanya adepa, na wanya AWURADE hɔ anisɔ.

²³Kyɛwpa na ohiani de kasa, na ɔdefoɔ bua asɛmdenden.

²⁴Deɛ ɔfa nnamfo pii no de sɛe ɔno ara ne ho, nanso adamfo bi wɔ hɔ a ɔfam ho sene onua.