Read Twi Asante Mmebusɛm 19 Bible Online

Mmebusɛm 19 - Twi Asante bible

Mmebusɛm 19

¹ Ohiani a ɔnam ne pɛyɛ mu yɛ sene deɛ ɔkyea n’anomu nsɛm na ɔyɛ kwasea.

²Ɔkra a nimdeɛ abɔ no nyɛ, na deɛ ne nan ase yɛ herɛ no yɛ bɔne.

³ Onipa agyimisɛm kyinkyim ne kwan, na n’akoma huri tia AWURADE.

⁴ Ahonya ma obi nya nnamfo pii, na mmɔborɔni ne ne yɔnko ntam tete.

⁵ Ɔdansekurumfoɔ ho renyɛ tɔtorɔtɔɔ, na deɛ ɔhu atorosɛm no rennya adwaneyɛ.

⁶Nnipa pii dɛfɛdɛfɛ ɔdɛɛfoɔ, na nnipa nyinaa yɛ ɔyamyiefoɔ nnamfo.

⁷ Ohiani nuanom nyinaa tane no, na nkantom sɛ ne nnamfonom ne ne ntam rentwe, ɔde nsɛm ti wɔn a, ɔnto wɔn.

⁸Deɛ ɔnya nyansa no dɔ ne kra, deɛ ɔbu nhunumu no, ɔhunu papa.

⁹ Ɔdansekurumfoɔ ho renyɛ tɔtorɔtɔɔ, na deɛ ɔhu atorosɛm no bɛyera.

¹⁰Taamudie mfata ɔkwasea, na mprɛ ahe na akoa bɛdi mpanimfoɔ soɔ.

¹¹Onipa nimdeɛ twentwɛn n’abufuo ase, na mfomsoɔ ho twa yɛ no animuonyam.

¹² Ɔhene abufuo te sɛ gyata mmobom, na n’anisɔ te sɛ wira so bosuo.

¹³ Ɔba kwasea yɛ n’agya mmusuo, na ɔbaa ntɔkwako yɛ daa nsuo a ɛsosɔ.

¹⁴ Efie ne ahodeɛ yɛ agyanom awunnyadeɛ, na ɔyere nimdefoɔ firi AWURADE.

¹⁵ Aniha yɛ nnahɔɔ, na onipa kwadwofoɔ bɛdi kɔm.

¹⁶ Deɛ ɔkora mmara asɛm no kora ne kra, na deɛ ɔnhwɛ n’akwan yie no bɛwu.

¹⁷ Deɛ ɔhunu mmɔborɔni mmɔborɔ de fɛm AWURADE, na deɛ ɔde ama no, ɔbɛhyɛ no ananmu.

¹⁸ Anidasoɔ wɔ hɔ yi, tea wo ba, na mmɔ wo tirim sɛ wobɛku no.

¹⁹Deɛ n’abufuo so no bɛnya asotwe, na sɛ wogyaa no a, wobɛsane agyaa no bio.

²⁰Tie afotuo na gye atenetene, na woahunu nyansa w’akyirinna mu.

²¹ Adwene pii wɔ onipa akoma mu, nanso AWURADE agyinatuo na ɛbɛgyina.

²²Onipa adɔeɛyɛ na ɛma wɔdɔ no, na ohiani yɛ sene ɔtorofoɔ.

²³ AWURADE suro de obi kɔ nkwa mu, deɛ ɔkura mu no bɛmee ada, na bɔne biara renka no.

²⁴ Ɔkwadwofoɔ de ne nsa to ayowa mu, na ɔnsane mfa nkɔ n’anomu mpo.

²⁵ Bɔ ɔfɛdifoɔ, na atetekwaa ani bɛte, na ka nhunumufoɔ anim, na wahunu nimdeɛ mu.

²⁶Deɛ ɔbɔ n’agya atirimuɔden na ɔpamo ne na no yɛ aniwuo ne ahohora ba.

²⁷ Me ba, wogyae atenetene tie a, wobɛfom afiri nimdeɛ nsɛm ho bio.

²⁸Ɔdansehuhuni di atemmuo ho fɛw, na abɔnefoɔ ano mene mmusuo.

²⁹ Wɔasiesie atemmuo ama afɛdifoɔ ne mmaabɔ ama nkwaseafoɔ akyi.