Read Twi Asante Mmebusɛm 2 Bible Online

Mmebusɛm 2 - Twi Asante bible

Mmebusɛm 2

¹Me ba, sɛ wotie me nsɛm, na wode me mmara nsɛm sie wo nkyɛn,

²sɛ wobɛyɛ aso atie nyansa, na woakom w’akoma ama nteaseɛ,

³ aane, sɛ wosu frɛ nhunumu, na woma wo nne so frɛ nteaseɛ,

⁴sɛ wohwehwɛ n’akyiri kwan sɛ dwetɛ, na wobɔre hwehwɛ no sɛ akoradeɛ a ahunta a,

⁵ɛno na wobɛhunu AWURADE suro, na woahunu Nyankopɔn ho nimdeɛ.

⁶Na AWURADE na ɔma nyansa, n’anomu na nimdeɛ ne nteaseɛ firi ba.

⁷ Ɔkora nyansa mapa ma teefoɔ, ɔyɛ ɛkyɛm ma wɔn a wɔnam pɛpɛ,

⁸sɛ ɔbɛkari atemmuo akwan, na wahwɛ n’ahotefoɔ kwan so.

⁹Ɛno na wobɛhunu tenenee ne atemmuo ne adeɛ a ɛtene ne ɔkwan pa nyinaa mu.

¹⁰Sɛ nyansa ba w’akoma mu, na nimdeɛ sɔ wo kra ani a,

¹¹adwempa bɛhwɛ wo so, na nteaseɛ abɔ wo ho ban,

¹²na ayi wo afiri bɔne kwan mu ne onipa a ɔka nsɛm akontonkyi ho,

¹³afiri wɔn a wɔgya akwantenenee hɔ kɔnante sum akwan soɔ no ho,

¹⁴wɔn a wɔn ani gye bɔneyɛ ho, wɔdi bɔne akontonkyisɛm ho ahurisie,

¹⁵wɔn a wɔn atempɔn kyeakyea, na wɔn akwan danedane.

¹⁶ Na ayi wo afiri ɔbaa sansani nsam, afiri ɔbaa sansani a ɔka adɔkɔdɔkɔsɛm no nsam;

¹⁷ɔno na wapo ne mmabaaberɛ mu kunu, na ne werɛ afiri ne Nyankopɔn apam;

¹⁸ na ne fie kom kɔ owuo mu, na n’akwan kɔ asamanfoɔ mu.

¹⁹Wɔn a wɔkɔ ne ho mu biara nsane, na wɔrensi nkwa akwan mu.

²⁰Na woafa nnipa pa kwan so, na woadi ateneneefoɔ kwan so.

²¹ Na teefoɔ na ɛbɛtena asase no soɔ, na wɔn a wɔyɛ pɛ no na ɛbɛtena mu;

²² na wɔbɛtwa abɔnefoɔ afiri asase so, na wɔatu nkontompofoɔ afiri so.