Read Twi Asante Mmebusɛm 25 Bible Online

Mmebusɛm 25 - Twi Asante bible

Mmebusɛm 25

¹Yei nso ne Salomo mmebusɛm bi a Yudahene Hesekia nnipa fa twerɛeɛ.

²Nyankopɔn animuonyam ne asɛm so kata, na ahemfo animuonyam ne asɛm mu hwehwɛ.

³Ɔsoro ware a ɛwareɛ, ne asase mu dɔ a ɛdɔ, ne ahemfo akoma mu nni hwehwɛbea.

⁴Yi fi dwetɛ mu, na agudeɛ firi odwumfoɔ nsam aba.

⁵ Yi ɔbɔnefoɔ firi ɔhene anim, na n’ahennwa bɛtim tenenee mu.

⁶Nhyehyɛ wo ho ɔhene anim, na nkɔgyina nnipa akɛseɛ gyinabea.

⁷ Na ɛyɛ sɛ wɔka kyerɛ wo sɛ: Bra soro ha! sene sɛ wɔbɛbrɛ wo aseɛ ɔberempɔn a w’ani ahu no no anim.

⁸Mfiri hatuhatu nkɔko, na ɛbɛwie akyire yi no, wobɛyɛ dɛn, sɛ wo yɔnko de wo ato aniwuo mu?

⁹ Asɛm a wo ne wo yɔnko wɔ no, wo ne no nni, na nyi obi ahuntasɛm adi;

¹⁰na deɛ ɔbɛteɛ no annidi wo atɛm, na wo nsopa anka hɔ.

¹¹ Asɛm a wɔka a ɛfata te sɛ sika aduaba wɔ dwetɛ nkɛntɛn mu.

¹²Sɛdeɛ sika asomuadeɛ ne sika amapa ahyehyɛdeɛ teɛ no, saa na onimkafoɔ nyansafoɔ teɛ wɔ aso a ɛte asɛm soɔ.

¹³Sɛdeɛ sukyerɛmma dwoɔ teɛ twaberɛ mu no, saa na ɔbɔfoɔ nokwafoɔ teɛ ma wɔn a wɔsomaa no, na ɔdwodwo ne wuranom kra.

¹⁴ Deɛ ɔde akyɛdeɛ a ɔmmaeɛ hoahoa ne ho no te sɛ mununkum ne mframa a osuo nni mu.

¹⁵ Abodwokyɛre dane ɔtemmufoɔ ti, na tɛkyerɛmabereɛ bu dompe mu.

¹⁶Wohunu ɛwoɔ a, di deɛ ɛso woɔ, na amfono wo, na woamfe angu.

¹⁷Mma wo nan nnyɛ wo yɔnko fie ntiantia, na wo ho anyɛ no mfone na wantane wo.

¹⁸ Asabaa ne nkrantɛ ne agyan nnamnnam ne onipa a ɔdi ne yɔnko ho adansekurumu.

¹⁹Ɔkɔnkɔnsani so anidasoɔ, hiada mu, te sɛ ɛse a abuo ne nan a afirikyie.

²⁰Deɛ ɔto dwom kyerɛ ɔwerɛhoni no te sɛ deɛ ɔpa ntoma awɔberɛ mu, anaa nsa kekakeka a wɔde gu dɔw soɔ.

²¹ Sɛ ɛkɔm de wo tamfo a, ma no aduane nni, na sukɔm de no a, ma no nsuo nnom;

²²na wobɛso nsramma agu n’atifi, na AWURADE bɛhyɛ wo ananmu.

²³Atifi fam mframa de osuo ba, saa ara nso na ntwirie tɛkyerɛma de abufunimu ba.

²⁴ Ɛdan atifi kokoam tena yɛ sene sɛ wo ne ɔbaa tɔkwapɛfoɔ bɛtena ɛdan mu.

²⁵Sɛdeɛ nsuonwunu yɛ ɔkra a atɔ piti no, sɛ asɛmpa a ɛfiri akyirikyiri asase soɔ yɛ ne no.

²⁶Sɛdeɛ nsuo aniwa a wɔatiatia mu ne abura a wɔasɛeɛ no teɛ no, saa na ɔteneneeni a ɔtɔ ɔbɔnefoɔ anim ntintan teɛ.

²⁷Ɛwoɔdie ntrasoɔ nyɛ, enti animuonyam a nnipa pɛ ma wɔn ho nyɛ animuonyam.

²⁸ Onipa a ɔntumi nhyɛ ne ho so no te sɛ kuro a abubuo a afasuo nni ho.