Read Twi Asante Mmebusɛm 27 Bible Online

Mmebusɛm 27 - Twi Asante bible

Mmebusɛm 27

¹ Mfa ɔkyena nhoahoa wo ho, na wonnim deɛ ɛda no de bɛba.

² Ma obi nyi wo ayɛ, na ɛnyɛ w’ano, ɔhɔhoɔ, na ɛnyɛ w’anofafa.

³Ɔboɔ yɛ duru na anwea yɛ dompee, nanso ogyimifoɔ abufuo yɛ duru sene ne mmienu nyinaa.

⁴Anibereɛ yɛ atirimuɔden, na abufuo yɛ ahometedeɛ, na hwan na ɔbɛtumi agyina ninkuntwe anim?

⁵Animka petee yɛ sene ɔdɔ a ahunta.

⁶ Ɔdɔfoɔ pira yɛ nokorɛ, na ɔtamfoɔ mfeano yɛ nsisie.

⁷Ɔkra a wameeɛ tia ɛwokyɛm so, na ɔkra a ɛkɔm de no deɛ, deɛ ɛyɛ nwono biara yɛ no dɛ.

⁸Sɛdeɛ anomaa a ɔfiri ne pirebuo mu kyini teɛ no, saa na onipa a ɔfiri ne tenaberɛ kɔkyini teɛ ne no.

⁹Ngo ne aduhwam ma akomatɔyam, saa ara na onipa adamfo atirimsɛmdie dɛ nso yɛ.

¹⁰ Nnya w’adamfo ne w’agya adamfo, na w’amanehunu da, nhyɛne wo nua fie; wo fipamfoɔ a ɔbɛn yɛ sene onua a ɔwɔ akyirie.

¹¹Me ba, yɛ onyansafoɔ, na ma m’akoma ntɔ me yam, na manya asɛm mabua deɛ ɔbɔ me ahohora.

¹² Onitefoɔ hunu bɔne a ɛbɛba, na ɔde ne ho hunta, nanso adwenemharefoɔ de ne ho hyɛ mu, na wɔnya asotwe.

¹³ Deɛ ɔgyina ɔhɔhoɔ akyire no, fa ne ntoma, na deɛ ɔdi ɔbaa sansani agyinamu no, gye no awowa.

¹⁴Deɛ ɔtua nhema de nne kɛseɛ hyira ne yɔnko no, wɔbɛbu no nnuabɔ ama no.

¹⁵ Asusoberɛ mu nsuo a ɛsosɔ daa ne ɔbaa tɔkwapɛfoɔ na ɛsɛ:

¹⁶Deɛ ɔse ɔresianka no te sɛ deɛ ɔresianka mframa, anaa ne nifa kuta ngo.

¹⁷Dadeɛ se dadeɛ ano, na onipa se ne yɔnko anim.

¹⁸Deɛ ɔhwɛ borɔdɔma dua no di n’aba, na deɛ ɔsom ne wura no, wɔbɛhyɛ no animuonyam.

¹⁹Sɛdeɛ nsuo mu anim kyerɛ anim no, saa ara na onipa akoma kyerɛ onipa akoma.

²⁰ Asamando ne ɔsɛeɛ mmee da, na onipa aniwa nso mmee da.

²¹Kyɛmferɛ wɔ hɔ ma dwetɛ, na fononoo wɔ hɔ ma sika, na ɔbarima deɛ, sɛ n’ayeyie teɛ na wɔde hu no.

²²Sɛ wode wɔmma si ogyimifoɔ waduro mu fra ayuo mu mpo a, n’agyimisɛm remfiri ne ho ara da.

²³Hunu na hunu sɛdeɛ wo nnwan ho teɛ, na fa w’akoma to mmoa akuakuo no so.

²⁴ Na adeɛ a woakora ntena hɔ daa, na abotire kɔduru awoɔ ntoatoasoɔ nyinaa so anaa?

²⁵Ɛserɛ kɔ, na wira mono yi adi, na wɔboaboa mmepɔ so nhahamma ano.

²⁶Nnwanten ma wo ntoma, na mpapo yɛ asase tiri adeɛ.

²⁷Na mmirekyie nufosuo no dɔɔso ma w’aduane, wo fiefoɔ aduane ne wo mmabaa akɔnhomabɔdeɛ.