Read Twi Asante Mmebusɛm 6 Bible Online

Mmebusɛm 6 - Twi Asante bible

Mmebusɛm 6

¹ Me ba, sɛ wogyina wo yɔnko akyi, sɛ wodi ɔhɔhoɔ agyinamu,

²sɛ wɔnam w’anomu asɛm so akye wo a,

³yɛ yei mmom, me ba, na yi wo ho, ɛfiri sɛ woatɔ wo yɔnko nsam; kɔ kɔkoto, na srɛ wo yɔnko no.

⁴Mma nna nnkɔ w’ani so, na mma w’anisuatɛtɛ nntɔ nko.

⁵Yi wo ho sɛ adowa firi ɔbɔmmɔfoɔ nsam, sɛ anomaa firi fidisumfoɔ nsam.

⁶ Ɔkwadwofoɔ, kɔ tɛtea nkyɛn, hwɛ n’akwan, na hunu nyansa.

⁷Ɔno na ɔnni otitire, ɔpanin anaa sodifoɔ bie,

⁸nanso ɔsiesie n’aduane ahuhuberɛ, na ɔboaboa n’adidideɛ ano twaberɛ mu.

⁹Wobɛda akɔsi da bɛn, ɔkwadwofoɔ? Berɛ bɛn na wobɛsɔreɛ afiri wo nna mu?

¹⁰ Nna kakra, nkotɔ kakra, nsa a mɛpono mada kakra.

¹¹Ɛnna wo hia bɛto wo sɛ ɔkwanmukafoɔ, ne w’ahokyere sɛ ɛkyɛmkurafoɔ.

¹² Onipa huhuo ne ɔbarima busuyɛfoɔ, ɔde ano kontonkyi nenam,

¹³ ɔbubu n’ani, ɔde ne nan kasa, ɔde ne nsateaa kyerɛkyerɛ adeɛ,

¹⁴akontonkyisɛm wɔ n’akomam, ɔpam ne tirim apammɔne daa, takrawɔgyam na ɔhyɛ.

¹⁵Enti mpofirim na ne sɛeɛ bɛba, wɔbɛbubu no amonom a wɔntumi nsa.

¹⁶Adeɛ nsia yi na AWURADE tane, aane, na adeɛ nson na ɛyɛ ne kra akyiwadeɛ,

¹⁷ani a ɛtra ntɔn, atorɔ tɛkyerɛma, ne nsa a ɛhwie mogya a ɛdi bem guo;

¹⁸akoma a ɛdwene mmusuo adwene, nan a ɛyɛ herɛ tu mmirika kɔ bɔne mu;

¹⁹ɔdansekurumfoɔ a ɔhu atorosɛm, ne deɛ ɔhyɛ anuanom ntam takrawɔgyam.

²⁰ Me ba, bu w’agya mmara nsɛm, na nto wo na nkyerɛkyerɛ ntwene.

²¹ Fa kyekyere w’akoma ho daa nyinaa, na fa bebare wo kɔn ho hyia.

²² Wonam a, ma no nkɔgya wo, woda a, ɛnhwɛ wo so, na wonyane a, ɛnyɛ wo sɛmɔdɛbɔ.

²³Na mmara nsɛm no yɛ kanea, na nkyerɛkyerɛ no yɛ hann, na atenetene nkaanim yɛ nkwa kwan,

²⁴ na ahwɛ wo so afiri ɔbaa bɔne ho, afiri ɔbaa hɔhoɔ tɛkyerɛma dɔkɔdɔkɔ ho.

²⁵Mma w’ani mmmere n’ahoɔfɛ w’akomam, na mma no mmfa n’anisuatɛtɛ nnkye wo.

²⁶Na ɛsiane ɔbaa dwamamfoɔ nti, wɔgyee ɔbarima paanoosini, na obi yere deɛ, wɔgyee no ne nkwa a ne boɔ yɛ den no.

²⁷Onipa de ogya bɛhyɛ ne kokom a ne ntadeɛ renhyeɛ?

²⁸Obi bɛfa nsramma so a ne nan renhyeɛ?

²⁹ Saa na deɛ ɔkɔ ne yɔnko yere nkyɛn teɛ, na obiara a ɔkɔ ne yɔnko yere nkyɛn no renni bem.

³⁰Sɛ ɛkɔm de owifoɔ na ɔwia adeɛ sɛ ɔredi amee a, wɔmmu no animtia:

³¹Nanso sɛ wɔhu no a, ɔbɔ ho mprɛnson, ɔde n’afideɛ nyinaa bɛma.

³² Deɛ ɔsɛe awadeɛ no nni ti, deɛ ɔyɛ saa no de sɛe ne kra.

³³Mmaa ne animguaseɛ na ɔbɛnya, na n’ahohora no, wɔmpepa.

³⁴Na ninkunu twetwe ɔbarima abufuhyeɛ, na aweretɔ da no ɔremfa nkyɛ;

³⁵ɔremmu mpata biara, na woma akyɛdeɛ dɔɔso mpo a, ɔrempene.