Read Twi Asante Mmebusɛm 7 Bible Online

Mmebusɛm 7 - Twi Asante bible

Mmebusɛm 7

¹Me ba, di me nsɛm so, na fa me mmara nsɛm sie.

²Di me mmara nsɛm so na nya nkwa, na bu me mmara sɛ w’aniwa kurutuawisi.

³ Fa kyekyere wo nsateaa so, twerɛ no w’akoma pono so.

⁴Ka kyerɛ nyansa sɛ: Me nuabaa ne wo, na frɛ nhunumu sɛ w’adamfo,

⁵ na ahwɛ wo so afiri ɔbaa sansani ho, afiri ɔbaa sansani a ɔka adɔkɔdɔkɔsɛm ho.

⁶Na mefiri me dan mpomma mu, m’aniahunuankansa mu mehwɛe;

⁷na mehwɛɛ ntetekwaafoɔ mu, mehunuu mmɔfra no mu aberantewaa bi a ɔnni tire,

⁸ɔperee abɔntene bɛn ne ntwea, na ɔsene faa ne fie kwan,

⁹ɛberɛ a adeɛ resa, anwummerɛ, anadwo kɔnkɔn ne sum mu.

¹⁰Na hwɛ, ɔbaa bi hyiaa no, ɔfira adwamamfoɔ ntoma, n’akoma asene.

¹¹Wagyigya na n’aso asoro, ne nan ntena ne fie;

¹²seesei ɔwɔ mmorɔno so, seesei yi ɔwɔ edwa so, na ɔtetɛ ntwea nyinaa so.

¹³Ɛnna ɔsɔɔ no mu, na ɔfee n’ano, na ɔsenee n’ani ka kyerɛɛ no sɛ:

¹⁴ Asomdwoeɛ afɔrebɔ da me so, ɛnnɛ na mama m’aboadeɛ;

¹⁵enti na mefiri mebɛhyiaa woɔ yi, mebɛhwehwɛɛ w’anim, na mahu woɔ yi.

¹⁶Mede mmomo makata me mpa so, Misraim nkyeremu;

¹⁷mede kurobo ne pɛprɛ ne duapapo mapete me nnaeɛ so.

¹⁸Bra ma ɔdɔ mmee yɛn nkɔsi anɔpa, ma yɛmfa akɔnnɔdeɛ nsɛpɛ yɛn ho.

¹⁹Na efiewura nni fie, watu kwan kɔ akyirikyiri;

²⁰wafa fotoɔ ne sika akura, srane korokumatwa da mu ansa na ɔbɛba fie.

²¹Ɔde bradɛ pii too no, ɔde n’ano fremfrem nyaa no de no kɔe.

²²Ɔdii n’akyi awerɛfirem sɛ nantwie a wɔrekɔku no, sɛ mpokyerɛ a wɔde twe ogyimifoɔ aso,

²³kɔsii sɛ agyan hwiree ne mmerɛboɔ mu, te sɛ anomaa de ahoɔherɛ kɔ fidie mu, na ɔnnim sɛ ne nkwa na ɛda mu.

²⁴Na afei, me mma, montie me, na monyɛ aso mma m’anomu nsɛm.

²⁵Mma w’akoma mmmane nnkɔ n’atempɔn so, mfom nkɔ n’akwan so.

²⁶Na wapirapira nnipa pii agugu hɔ, na wɔn a wakunkum wɔn dɔɔso;

²⁷ ne fie ne Asamando kwan, ɛsiane kɔ owuo mpia mu.