Read Twi Asante Ɔsɛnkafoɔ 3 Bible Online

Ɔsɛnkafoɔ 3 - Twi Asante bible

Ɔsɛnkafoɔ 3

¹ Adeɛ biara wɔ ne berɛ a wɔahyɛ no, na ɛberɛ wɔ hɔ ma adwuma biara ɔsoro ase:

²Awoɔ wɔ ne berɛ, na owuo wɔ ne berɛ; ɔtɛ wɔ ne berɛ, na deɛ wɔatɛ no tutuo wɔ ne berɛ;

³okum wɔ ne berɛ, na ayaresa wɔ ne berɛ; bubuo wɔ ne berɛ, na osie wɔ ne berɛ;

⁴esu wɔ ne berɛ, na sereɛ wɔ ne berɛ; abooboodie wɔ ne berɛ, na asa wɔ ne berɛ;

⁵aboɔ toguo wɔ ne berɛ, na aboɔ anoboa wɔ ne berɛ; atuuyɛ wɔ ne berɛ, na atuuyɛ ntetemu wɔ ne berɛ;

⁶ɔhwehwɛ wɔ ne berɛ, na ɔyera wɔ ne berɛ; nhwɛsoɔ wɔ ne berɛ, na ɔtoguo wɔ ne berɛ;

⁷osuane wɔ ne berɛ, na ɔpam wɔ ne berɛ; kommyɛ wɔ ne berɛ, na ɔkasa wɔ ne berɛ;

⁸ɔdɔ wɔ ne berɛ, na ɔtane wɔ ne berɛ; akodie wɔ ne berɛ, na ɔmannwoeɛ wɔ ne berɛ.

⁹Mfasoɔ bɛn na deɛ ɔyɛ adwuma no nya no deɛ ɔbrɛ ho no mu?

¹⁰Mahunu ɔbrɛ adwuma a Onyankopɔn de ama adasamma sɛ wɔmmrɛ nyɛ no.

¹¹ Wayɛ adeɛ nyinaa fɛfɛ ne berɛ mu; bio nso, ɔde mmerɛ santen ho adwene ahyɛ wɔn akoma mu, nanso nnipa ntumi nhunu deɛ Onyankopɔn ayɛ firi mfitiaseɛ kɔsi awieeɛ no.

¹² Menim sɛ biribiara nni hɔ a ɛyɛ ma wɔn kyɛn sɛ wɔbɛgye wɔn ani, asɛpɛ wɔn ho wɔ wɔn nkwa nna mu;

¹³nanso sɛ onipa biara didi nom hunu adepa ne brɛ nyinaa mu a, Nyankopɔn akyɛdeɛ ne no.

¹⁴Menim sɛ adeɛ biara a Onyankopɔn yɛ no, ɛno na ɛbɛtena hɔ daa; wɔrentumi mfa bi nka ho, na wɔrentumi nyi bi mfiri mu. Na Onyankopɔn ayɛ no saa sɛdeɛ nnipa bɛsuro n’anim.

¹⁵Deɛ ɛba no yɛ teteete adeɛ, na deɛ ɛrebɛba no nso, ɛbaa teteete, na Onyankopɔn hwehwɛ deɛ ɛsene kɔ bio.

¹⁶Na deɛ mahunu bio owia yi aseɛ ne atemmubea a abɔnefosɛm wɔ hɔ ne teneneebea a amumuyɛ wɔ hɔ.

¹⁷ Mekaa no m’akomam sɛ: Ɔteneneeni ne ɔbɔnefoɔ nyinaa, Onyankopɔn bɛbu wɔn atɛn, ɛfiri sɛ wahyɛ berɛ ama adwuma biara ne adeyɛ biara.

¹⁸Mekaa no m’akomam wɔ nnipa mma ho sɛ, Onyankopɔn resɔ wɔn ahwɛ, na wɔahunu sɛ wɔn fam no, wɔte sɛ mmoa ara nko.

¹⁹ Na nnipa mma hyɛberɛ ne mmoa hyɛberɛ sɛ, na hyɛberɛ korɔ da hɔ ma wɔn, sɛ oyi wuo teɛ no, sɛ oyi wuo nso teɛ ne no, na honhom baako na wɔn nyinaa wɔ, na kyɛne a onipa bɛkyɛne aboa nni hɔ; na adeɛ nyinaa yɛ ahuhudeɛ.

²⁰ Adeɛ nyinaa kɔ faako, adeɛ biara firi dɔteɛ mu, na adeɛ nyinaa sane kɔ dɔteɛ mu.

²¹ Hwan na ɔnim nnipa mma honhom sɛ ɔforo kɔ ɔsoro ne mmoa honhom sɛ ɔsiane kɔ asase aseɛ?

²²Na mehunuu sɛ adepa biara nni hɔ gye sɛ onipa ani gye ne nnwuma mu, na ɛne ne kyɛfa. Na hwan na ɔde no bɛba na wabɛhwɛ deɛ ɛbɛba akyire no?