Read Twi Asante Nnwom mu dwom 1 Bible Online

Nnwom mu dwom 1 - Twi Asante bible

Nnwom mu dwom 1

¹Nnwom mu dwom a ɛyɛ Salomo deɛ.

²Ma no mfa n’ano mfeano mfe m’ano, na wo dɔ yɛ sene bobesa.

³Wo sradehwam yi hwa pa, ngohwam a wɔahwie ne wo din, ɛno nti na mmabaa dɔ woɔ no.

⁴Twe me di w’akyi! Ma yɛnka yɛn ho nkɔ. Ɔhene de me aba ne mpia mu. Yɛbɛdi ahurisie na yɛn ani agye wo ho, yɛbɛkamfo wo dɔ asene bobesa. Tenenee so na wɔdɔ woɔ.

⁵O Yerusalem mmammaa, mebiri deɛ, nanso me ho yɛ fɛ, sɛ Kedar ntomadan, sɛ Salomo ntwamutam.

⁶Monnhwɛ me haa ɛsiane sɛ mebirie nti, ɛsiane sɛ owia akusa me nti; Me na mmammarima bo fuu me, wɔmaa me yɛɛ bobeturo no hwɛfoɔ, nanso m’ankasa me bobeturo no deɛ, manhwɛ.

⁷Ka kyerɛ me, wo a me kra dɔ woɔ, ɛhe na wo nnwan kɔ adidie, ɛhe na woma wɔbutubutu awiaberɛ? Na adɛn nti na menyɛ sɛ deɛ ɔkyini wo mfɛfoɔ nnwankuo soɔ?

⁸ Sɛ wo deɛ, wonnim a, O, ɔbaa a w’ahoɔfɛ da nso wɔ mmaa mu, firi adi fa nnwan no anammɔn so, na kɔyɛne wo mmirekyie mma, nnwanhwɛfoɔ tenabea hɔnom.

⁹Me pɔnkɔbere mfrafraeɛ a ɔwɔ Farao teaseɛnam ho no ho na mede wo metoɔ, me dɔfoɔ.

¹⁰W’afono yɛ fɛ, kona no mu, wo kɔn nso yɛ fɛ, kompuo no mu.

¹¹Sika nnwinneɛ kona na yɛbɛyɛ ama woɔ ne dwetɛ mprɛngo a ɛsisi soɔ.

¹²Ɔhene wɔ akonnwa mpa ho no, na me sradehwam reyi ne hwa.

¹³Me dɔfoɔ yɛ me kurobo mua a ɛda me nufoɔ ntam.

¹⁴Me dɔfoɔ yɛ me sɛ ahuahaa nhwiren sia, wɔ En-gedi bobeturo mu.

¹⁵ Hwɛ, wo ho yɛ fɛ, me dɔfoɔ, hwɛ, wo ho yɛ fɛ, w’aniwa yɛ aborɔnoma aniwa.

¹⁶ Hwɛ, wo deɛ, wo ho yɛ fɛ, me dɔfoɔ, aane, wosɔ ani, yɛn nnaeɛ nso yɛ frɔmfrɔm.

¹⁷Yɛn adan nsamsoɔ yɛ tweneduro, yɛn ntaaboɔ yɛ pepeaa.