Read Twi Asante Nnwom mu dwom 6 Bible Online

Nnwom mu dwom 6 - Twi Asante bible

Nnwom mu dwom 6

¹O mmaa mu ɔhoɔfɛni, ɛhe na wo dɔfoɔ no korɔ? Ɛhe na wo dɔfoɔ no adane ne ho afa, na yɛne wo nkɔhwehwɛ no?

² Me dɔfoɔ asiane kɔ ne turo mu, aduhwam akofie ho, sɛ ɔrekɔma ne nnwan aduane, na watete sukooko nhwiren afɛfɛ no.

³ Me deɛ, mewɔ me dɔfoɔ, na me dɔfoɔ wɔ me, ɔno a ɔyɛne ne nnwan sukooko no mu.

⁴ Me dɔfo, wo ho yɛ fɛ sɛ Tirsa, woyɛ oyima sɛ Yerusalem, wo ho yɛ hu sɛ asraafoɔ a wɔahyia frankaa aseɛ.

⁵ Yi w’ani firi me so, na ɛha me, wo nwi te sɛ mmirekyikuo a wɔsiane firii Gilead bepɔ ho.

⁶ Wo se te sɛ nnwanten mmaatan a wɔfiri adwareeɛ reforo ba a wɔn nyinaa awowo ntanta, na deɛ wabu kyenee nni wɔn mu.

⁷ W’asontorɔ mu te sɛ atoaa aba fa, w’anim nkatanimu mu.

⁸ Ahemmaa yɛ aduosia, na mpenafoɔ yɛ aduɔwɔtwe, ne mmabaa a ɛnni ano.

⁹ M’aburuburo a ɔdi mu yɛ baako pɛ, ne na bakorɔ ne no, deɛ ɔwoo no ɔdɔba ne no; mmammaa hu no, na wɔfrɛ no anigyeɛ, ahemmaa ne mpenafoɔ nso, na wɔkamfo no.

¹⁰Hwan ne oyi a ɔpue sɛ adekyeeɛ, ne ho yɛ fɛ sɛ ɔsrane, ne ho te sɛ owia, na ne ho yɛ hu sɛ asraafoɔ a wɔkura frankaa yi?

¹¹Mesiane mekɔɔ adwe turo mu, sɛ merekɔhwɛ bonhwa mu nhahamma frɔmfrɔm, sɛ merekɔhwɛ sɛ obobe afefɛ, sɛ atoaa gu nhyerɛne anaa?

¹²Na mennim sɛ me kra de me bɛsi me man adehyeɛ nteaseɛnam mu.

¹³Sane, sane bra, Sulamit, sane, sane bra, na yɛnhwɛ wo. Adɛn na mohwɛ Sulamitni no? Ɔte sɛ Mahanaim asa no.