Read Twi Asante Nnwom mu dwom 8 Bible Online

Nnwom mu dwom 8 - Twi Asante bible

Nnwom mu dwom 8

¹O, sɛ anka woyɛ me nuabarima, a ɔnom me na nufoɔ ɛ! Sɛ merehu wo borɔno so a, anka mɛfe w’ano, nso obiara remmu me animtia.

² Anka mɛdi w’anim de wo aba me na fie, na woakyerɛkyerɛ me ɔdɔ, na mama woanom nsa a wɔde aduhwam bi agu mu, m’atoaa nsa no bi.

³ Ne benkum hyɛ me tiri ase, na ne nifa yɛ me atuu.

⁴ Meka mo ntam, O Yerusalem mmammaa, monnnyane ɔdɔ na monnhwanyane no, gye sɛ ɔno ara pɛ ansa!

⁵Hwan ne ɔbaa yi a ɔforo firi ɛserɛ so reba a ɔtwere ne dɔfoɔ yi? Menyanee wo aprɛ no ase, ɛhɔ na awoɔ kaa wo na woɔ, ɛhɔ na wo wofoɔ kyemeeɛ.

⁶Fa me si w’akoma so sɛ nsɔanodeɛ, fa me si wo basa so sɛ nsɔanodeɛ. Na ɔdɔ yɛ den sɛ wuo, ninkuntwe mu yɛ duru sɛ asamando, ne nsramma yɛ ogya nsramma, ogyaframa a ano yɛ den pa ara.

⁷Nsuo pii ntumi nnum ɔdɔ, na nsubɔntene ntumi nsram so; sɛ obi de ne fie adedodoɔ nyinaa ma de tɔ ɔdɔ mpo a, wɔremmu no hwee.

⁸Yɛwɔ onuabaa kumaa bi a ɔmmobɔɔ nufoɔ. Ɛdeɛn na yɛbɛyɛ ama yɛn nuabaa no da a wɔbɛbisa n’aseɛ no?

⁹Sɛ ɔyɛ ɔfasuo a, yɛbɛto ne so dwetɛ aban, na sɛ ɔyɛ ɛpono a, yɛde tweneduro ntaaboɔ bɛbram ne ho.

¹⁰Me deɛ, meyɛ ɔfasuo, na me nufoɔ te sɛ aban atentene, ɛno na meyɛɛ n’ani so sɛ deɛ ɔde asomdwoeɛ ba.

¹¹Salomo wɔ bobeturo bi Baal-hamon, ɔde bobeturo no maa ahwɛfoɔ, sɛ n’aba nti wɔn nyinaa mmema no dwetɛ apem apem.

¹²Me bobeturo a ɛyɛ me deɛ no wɔ m’anim; apem no nyɛ wo deɛ, O Salomo, na ahanu nyɛ n’aba ahwɛfoɔ deɛ.

¹³ O wo a wote nturo no mu no, wo mfɛfoɔ retie wo nne; ma mentie ɛ!

¹⁴ Fa ntɛm dwane, me dɔfoɔ, na yɛ wo ho sɛ ɔtwe anaa ɔforoteburuwa, wɔ nnuhwam mmepɔ so.