Read Twi Asante Yesaia 1 Bible Online

Yesaia 1 - Twi Asante bible

Yesaia 1

¹Amos ba Yesaia anisoadeɛ a ɔhunuu no Yuda ne Yerusalem ho, Yuda ahemfo Usia, Yotam, Ahas ne Hesekia nna no mu.

² O ɔsoro, montie, O asase, yɛ aso, na AWURADE akasa: Mayɛne mma ama wɔanyini, na mama wɔn so, na wɔn deɛ, wɔabɔ me so ko.

³Nantwie nim ne wura, na afunumu nim ne wura adididaka, na Israel deɛ, ɔnnim, me man nni nteaseɛ.

⁴Ao, ɔman nnebɔneyɛfoɔ, ɔman a wɔn asodie yɛ duro, amumuyɛfoɔ asefoɔ, mma a wɔaporɔ! Wɔagya AWURADE, wɔabu Israel Kronkronni no animtia, wɔasane wɔn akyi.

⁵ Adɛn nti na wɔmmɔ mo ara, sɛ morekɔ so ara te atua yi? Etire mu no nyinaa yare, na akoma mu no nyinaa ahodwo.

⁶ Ɛfiri nan ase kɔsi atifi, amudie biara nni ho, apirakuro ne nsoasoaeɛ ne akuro a ɛretu mogya; wɔmmiae na wɔnkyekyeree, ɛnna wɔmfaa ngo nnwodwoeɛ.

⁷Mo man mu ada mpan; mo nkuro, wɔde ogya ahye; mo anim pɛɛ na ananafoɔ redi mo mfuo; na asɛe sɛdeɛ ananafoɔ abutu no.

⁸Na wɔagya Sion babaa hɔ sɛ bobeturom sese, te sɛ ɛferɛ turom homebea, sɛ kuro a wɔatua no.

⁹ Sɛ asafo AWURADE annya yɛn nkaeɛ kakraa bi a, anka yɛayɛ sɛ Sodom, na yɛadane ayɛ sɛ Gomora.

¹⁰ Montie AWURADE asɛm, Sodom atitire! Monyɛ aso mma yɛn Nyankopɔn nkyerɛkyerɛ, mo Gomora man!

¹¹ Mo afɔdeɛ dodoɔ yɛ me deɛn? AWURADE na ɔseɛ. Adwennini hyeɛ afɔdeɛ ne nyɛmmoa sradeɛ afono me; na anantwie anaa nnwammaa anaa mpapo mogya, nsɔ m’ani.

¹²Sɛ moreba abɛpue m’anim a, hwan na ɔse ɔrehwehwɛ sɛ mobɛtiatia m’abannwa soɔ?

¹³Monnkɔ so mfa ayɛyɛdeɛ hunu mmma; aduhwam yɛ me akyiwadeɛ. Ɔsrane foforɔ ne homeda ne edwa a mobɔ no, mentumi nhwɛ amumuyɛ ne nhyiam kronkron.

¹⁴Mo asrane foforɔ ne mo afahyɛ no, me kra kyi; abɛyɛ adesoa ama me, mabrɛ wɔ ne soa ho.

¹⁵ Na sɛ motrɛ mo nsam a, mɛyi m’ani mahunta mo; nso sɛ momma mpaebɔ dɔɔso a, me deɛ, merentie; mogya ayɛ mo nsa mama.

¹⁶ Monnware, monnwira mo ho. Monyi mo nneyɛɛ mu bɔne mfiri m’ani so, monnyae bɔneyɛ.

¹⁷ Monsua papayɛ, monhwehwɛ atɛntenenee, montenetene omimfoɔ, monni mma awisiaa, na mompere nnye okunafoɔ.

¹⁸ Mommra mma yɛmfa adwene ɛ, AWURADE na ɔseɛ; sɛ mo bɔne te sɛ koogyan a, ɛbɛhoa sɛ nwera, sɛ ɛbere sɛ mogya a, ɛbɛyɛ fitaa sɛ akaadoo.

¹⁹ Sɛ mopɛ na motie a, mobɛdi asase no so nnepa;

²⁰ na sɛ moampene na mote atua a, afena bɛsɛe mo; na AWURADE ano na aka.

²¹ Sɛdeɛ kuro nokwafoɔ adane odwamamfoɔ yi, na anka atemmuo ayɛ no ma! Na tenenee nso te mu, na afei deɛ, awudifoɔ nko ara!

²²Wo dwetɛ adane fi, wo nsa pa, wɔde nsuo afra mu.

²³ Wo mansohwɛfoɔ ayɛ atuatefoɔ ne awifoɔ nnamfo. Wɔn nyinaa pɛ adanmudeɛ na wɔdi akyɛdeɛ akyi. Wɔnni mma nwisiaa, na akunafoɔ asɛm nnuru wɔn anim.

²⁴Enti AWURADE, asafo AWURADE, Israel Tumfoɔ no, asɛm nie: Ao, mɛyi m’abufuhyeɛ makyerɛ m’ahohiahiafoɔ, na mɛtɔ were wɔ m’atamfoɔ so.

²⁵ Na mɛdane me nsa aba wo so, na mede dɔw mɛnane wo na mayi wo mu fi, na mayi wo sumpii mfrafraeɛ nyinaa akɔ.

²⁶ Na mɛdane w’atemmufoɔ mama wo sɛ kane no, ne w’afotufoɔ sɛ mfitiaseɛ no. Ɛno ansa na wɔbɛfrɛ wo tenenee kuro, nokorɛ kuro no.

²⁷ Wɔde atemmuo bɛgye Sion, na wɔde tenenee agye ne mma a wɔanu wɔn ho.

²⁸Na wɔbɛdwɛre mmaratofoɔ ne nnebɔneyɛfoɔ abom, na wɔn a wɔgya AWURADE no bɛhye.

²⁹ Na mo ani bɛwu adum a mo ani gyee ho no ho, na moafɛre nturo a moyiiɛ no ho.

³⁰Na mobɛdane sɛ adum a n’ahahan apoɔ, na moayɛ sɛ turo a nsuo nni mu.

³¹Na ɔhoɔdenfoɔ bɛyɛ sɛ asaawa futuro, na n’adwuma ayɛ sɛ ogya nturituriiɛ, na ne mmienu nyinaa abom ahye a obiara biara rennum.