Read Twi Asante Yesaia 14 Bible Online

Yesaia 14 - Twi Asante bible

Yesaia 14

¹ Na AWURADE yam bɛhyehye no Yakob ho, na wayi Israel bio, na ɔde wɔn adua wɔn asase so, na ananafoɔ de wɔn ho afam wɔn ho, na wɔabata Yakob fie ho.

² Na aman bɛfa wɔn de wɔn aba wɔn tenabea, na Israel fie afa wɔn adi wɔn so AWURADE asase no so, ma wɔayeyɛ nkoa ne mfenaa, na wɔafa wɔn a na wɔyɛ nnommumfafoɔ nnommum, na wɔahom wɔn ahodwanfoɔ so.

³Na ɛda a AWURADE bɛma wo ɔhome afiri wo yea ne w’ahoyera ne w’anyadie denden a wɔdii woɔ no mu no,

⁴wode ɛbɛ yi bɛbu Babel hene aka sɛ: Ɛyɛɛ dɛn na ɔhafoɔ no agyaeɛ, na ahodwan no to atwa yi?

⁵AWURADE abubu abɔnefoɔ abaa ne ɔman sodifoɔ poma no mu;

⁶ɔde abufuhyeɛ bobɔɔ aman ɔbɔ a ɛnnyaeɛ, ɔde abufuo hom amanaman so hyɛɛ wɔn ahometeɛ a emu ngoɔ.

⁷Asase nyinaa so adwo, ayɛ komm; wɔma dwom so;

⁸ pepeaa nso nya wo ho anigyeɛ, ɛne Lebanon ntweneduro no, na ɛka sɛ: Sɛ woabrɛ wo ase nti, obiara remforo mma yɛn so mmɛbubu yɛn.

⁹Asamando a ɛwɔ aseɛ no ka ne ho bɛhyia wo ba; ɛhwanyan nsamanfoɔ ma wo, wɔn a anka na wɔyɛ asase so akunini nyinaa; ɛma wɔn a anka wɔyɛ amanaman ahemfo nyinaa sɔresɔre firi wɔn ahennwa so.

¹⁰Wɔn nyinaa gye so ka kyerɛ wo sɛ: Wo nso woahodwo sɛ yɛn ara! Woayɛ sɛ yɛn ara pɛ!

¹¹ Wo kɛseyɛ asiane aba Asamando, wo mmɛnta nne no nso; w’ase kɛtɛ a wɔasɛ ne mmoaa birikabirika, na wo so nkatasoɔ ne nsonsono!

¹²Ɛyɛɛ dɛn na wofiri ɔsoro ahwe aseɛ? Ao, Nsoromma Hyerɛnfoɔ, Adekyeeɛ ba! Wɔatwa wo ahwe fam, wo a wobrɛɛ amanaman aseɛ no.

¹³ Na wo deɛ, wokaa no w’akomam sɛ: Ɔsoro na mɛforo makorɔ, Nyankopɔn nsoromma no atifi na mɛma m’ahennwa so asie, na matena ahyiaeɛ bepɔ no so, atifi fam asasetifi ano nohoa tɔnn;

¹⁴mɛforo akɔ mununkum sorɔnsorɔmmea, mɛyɛ me ho sɛ Ɔsorosoroni no.

¹⁵Mmom Asamando na woresiane akɔ akɔduru Amena no ase tɔnn.

¹⁶Wɔn a wɔhu woɔ no hwɛ wo haa de wɔn ani kari wo komm ka sɛ: Ɔbarima a ɔmaa asase wosoeɛ na ɔmaa ahennie hinhimiiɛ no nie anaa?

¹⁷Deɛ ɔmaa wiase danee anwea pradada soɔ, na ɔdwiridwirii emu nkuro, na wannya emu nneduafoɔ kwan ankɔ fie no nie?

¹⁸Amanaman ahemfo nyinaa, wɔn nyinaa deda hɔ animuonyam mu, obiara da ne damena mu;

¹⁹ na wo deɛ, wɔato wo afiri wo damena mu atwene sɛ duban a wɔapoɔ; sɛ atɔfoɔ a afena ahwire wɔn mu na wɔasiane kɔ aboɔ Amena mu no aduradeɛ, sɛ efunu a wɔatiatia ne soɔ.

²⁰Wɔremfa wo nka wɔn ho afunsie mu, ɛfiri sɛ woasɛe w’asase na woakunkum wo man. Wɔmmmɔ nnebɔneyɛfoɔ asefoɔ din da biara da bio.

²¹ Wɔn agyanom amumuyɛ nti monsiesie akumiiɛ mma ne mma; na wɔansɔre amfa asase anni so, na wɔamfa nkuro anyɛ asase ani ma.

²²Na mɛsɔre matia wɔn, asafo AWURADE asɛm nie, na matwa din ne wɔn a aka, mma ne mmanana afiri Babel, AWURADE na ɔseɛ.

²³Na mede no bɛyɛ mpɛsɛ agyapadeɛ ne nsuo atareɛ, na mede ɔsɛeɛ praeɛ mapra no, asafo AWURADE asɛm nie.

²⁴Asafo AWURADE aka ntam sɛ: Ampa ara, sɛdeɛ mesusuiɛ no, saa na ɛbɛba mu, na sɛdeɛ mabɔ me tirim no, saa ara na ɛbɛgyina,

²⁵sɛ mɛbubu Asiriafoɔ m’asase so, na matiatia ne so, me mmepɔ so, na ne kɔnnua no bɛfiri wɔn so akɔ, na n’adesoa no afiri wɔn mmatiri so.

²⁶Ɛno ne ɛpɔ a wɔabɔ no asase nyinaa ho, ɛno ne nsa a wɔatene no amanaman nyinaa soɔ.

²⁷Na asafo AWURADE abɔ ne tirim, hwan na ɔbɛma no ayɛ ɔkwa? Na ne nsa atene, hwan na ɔbɛsianka no?

²⁸ Afe a Ɔhene Ahas wuiɛ no mu na nkɔmhyɛ yi baeɛ:

²⁹ Nni ahurisie, wo Filistia nyinaa, sɛ abaa a ɛhwee woɔ no abu, na ɔwɔ nhini no mu na ɔkyerebene bɛfiri aba, na ne ba nso ayɛ ogya ɔwɔ a ɔtuo.

³⁰Na ahiafoɔ mmakan bɛdidi, na ahiafoɔ nso adeda hɔ dwoodwoo, na mede ɛkɔm bɛkum wo nhini, na w’akyikafoɔ nso, mɛma wɔatotɔ.

³¹O, Kuro pono, twa adwo; kurokɛseɛ, team ɛ; O wo, Filistia nyinaa, ma w’akoma ntu; ɛfiri sɛ wisie firi atifi fam aba, na n’asafo mu biara nka akyire.

³²Na asɛm bɛn na wɔde bɛbua ɔman no abɔfoɔ? Sɛ AWURADE de Sion atim, na ne man mu amanehunufoɔ de wɔn ho to ne so.