Read Twi Asante Yesaia 28 Bible Online

Yesaia 28 - Twi Asante bible

Yesaia 28

¹Efraim nsabofoɔ ahantan abotire, ne wɔn ahokyerɛ ahyehyɛdeɛ nhwiren a ɛretwam no nnue, kuro a ɛwɔ wɔn a nsa tɔ wɔn ntintan no sradeɛ bonhwa atifi no.

²Hwɛ, AWURADE wɔ ɔhoɔdenfoɔ ne otumfoɔ bi, sɛ asukɔtweaa a ɛreguo, ahum a ɛsɛe adeɛ; ɔbɛka agu fam ahoɔden so sɛ osutɔ a ɛde nsuo bebree a ɛyɛ den a ɛsram soɔ ba no.

³Na wɔbɛtiatia Efraim nsabofoɔ ahantan abotire no so,

⁴na n’ahokyerɛ ahyehyɛdeɛ nhwiren a ɛretwam a ɛwɔ sradeɛ bonhwa atifi no ayɛ sɛ borɔdɔmakan a teɛberɛ nnya nnurui a obiara a ɔhu no nsa ka ara pɛ, a ɔdi.

⁵Ɛda no na asafo AWURADE bɛyɛ animuonyam abotire ne ahoɔfɛ ahenkyɛ ama ne man nkaeɛ no,

⁶ne atemmuo honhom ama deɛ watena aseɛ rebu atɛn no, ne mmaninyɛ ahoɔden ama wɔn a wɔka dɔm ma wɔsane korɔ wɔ wɔn kuro pono ano no.

⁷Na yeinom nso tɔ ntintan wɔ nsa mu na wɔhinhim wɔ nsaden mu, ɔsɔfoɔ ne odiyifoɔ tɔ ntintan wɔ nsaden mu. Nsa amene wɔn, nsaden nti wɔhinhim, wɔyɛ mfomsoɔ wɔ adehunu mu, wɔpo dodoɔ wɔ asennie mu.

⁸Na ɛfeɛ ne efi ayeyɛ apono nyinaa so ma a ɔkwan biara nni hɔ.

⁹Hwan na ɔbɛkyerɛ no nimdeɛ, na hwan nso na ɔbɛma no ate asɛnka aseɛ? Wɔn a wɔatwa wɔn nufoɔ, wɔn a wɔate wɔn afiri mpokua ano?

¹⁰Na mmara akyi mmara, mmara akyi mmara; ahyɛdeɛ akyi ahyɛdeɛ, ahyɛdeɛ akyi ahyɛdeɛ; ɛha kakra, ɛhɔ kakra.

¹¹ Na apɔtɔfoɔ ano ne tɛkyerɛma foforɔ na AWURADE de bɛkasa akyerɛ ɔman yi;

¹² ɔno na ɔka kyerɛɛ wɔn sɛ: Ɔhome nie! momma deɛ wabrɛ nhome! na ahodwoɔ nie! nanso wɔampɛ sɛ wɔtie no.

¹³ Enti AWURADE asɛm bɛdane wɔn mmara atia mmara, mmara atia mmara, ahyɛdeɛ atia ahyɛdeɛ, ahyɛdeɛ atia ahyɛdeɛ, ɛha kakra, ɛhɔ kakra, na wɔahwe ase, na wɔabubu wɔn, na wɔatotɔ fidie mu, na wɔakyekye wɔn.

¹⁴Enti montie AWURADE asɛm, mo afɛdifoɔ a modi ɔman a ɛwɔ Yerusalem yi soɔ.

¹⁵Na moka sɛ: Yɛne owuo apam, na yɛne Asamando adi nkasasie; mpire a ɛhwe tra soɔ no, sɛ ɛretwam a, ɛrenka yɛn; ɛfiri sɛ yɛde atorɔ ayɛ yɛn dwanekɔbea, na yɛde nnaadaa akata yɛn so.

¹⁶ Enti sɛ AWURADE Nyankopɔn seɛ nie: Hwɛ, mede ɔboɔ bi retim Sion, ɔboɔ a wɔasɔ no ahwɛ, tweaso tiboɔ a ne boɔ yɛ den a ɛtim hɔ timpa, deɛ ɔgye die no rennwane.

¹⁷Na mede atemmuo bɛyɛ susuhoma, na mede tenenee mayɛ nsania, na asukɔtweaa ahum bɛhwim atorɔ dwanekɔbea no, na huntabea no nso, nsuo bɛsram so;

¹⁸na mo ne owuo apam no wɔbɛtwam, na mo ne Asamando nkasasie no rennyina; mpire a ɛhwe tra soɔ no, sɛ ɛretwam a, ɛbɛtiatia mo so;

¹⁹ mprɛ dodoɔ a ɛretwa mu no, ɛbɛfa mo, ɛfiri sɛ daa anɔpa, awia ne anadwo na ɛbɛtwam; na ɛho kaseɛ aseteɛ bɛyɛ ehu ara nko.

²⁰Na mpa no nware sɛdeɛ obi bɛtene ne mu wɔ soɔ, ne dabua no nso sɛdeɛ ɔde bɛbua ne soɔ.

²¹ Na AWURADE bɛsɔre sɛdeɛ ɔyɛɛ no Perasim bepɔ soɔ no, na ne bo ahuru sɛdeɛ ɛyɛe wɔ Gibeon bonhwa mu no, na wayɛ n’adeɛ bi a ɛyɛ anwanwadeɛ, na wayɛ n’adwuma bi a ɛyɛ anwanwa dwuma no.

²² Na afei monnni fɛw bio, na mo nkyehoma no mu anyɛ den. Na mate ɔsɛeɛ pasaa a wɔasuae ato hɔ, firi asafo AWURADE Nyankopɔn no nkyɛn, sɛ ɛreba asase nyinaa so.

²³Monyɛ aso na montie me nne, monwɛn mo aso ntie m’asɛm.

²⁴Daa nyinaa na ɔfuntumfoɔ funtum sɛ ɔbɛgu n’aba? Ɔtutu siesie n’asase ani daa anaa?

²⁵Sɛ ɔma ani tae wie a, ɔgu ɛme, na ɔpete tɛtɛ, na ɔdua ayuo kyerɛpɛn, ne atokoɔ nso wɔ n’afa. Ɛyɛ yei ne afuo no ano?

²⁶Ɛfiri sɛ wɔakyerɛ no ne yɛbea a ɛyɛ, ne Nyankopɔn na ɔkyerɛkyerɛ no.

²⁷Na ɛnyɛ ayuporeɛ adeɛ na wɔde pore ɛme, na teaseɛnam nan mfa tɛtɛ so; na poma na wɔde boro ɛme, na wɔde abaa boro tɛtɛ.

²⁸Wɔyam paanoo aburoo, na wɔnna ho mpore no daapem; na sɛ obi teaseɛnam nan ne n’apɔnkɔ na ɛpete mpo a, ɛnyɛ ɔno na ɔyam.

²⁹Yei nso, asafo AWURADE nkyɛn na ɛfire; n’agyinatuo yɛ nwanwa na ne nyansa nni ano.