Read Twi Asante Yesaia 32 Bible Online

Yesaia 32 - Twi Asante bible

Yesaia 32

¹ Hwɛ, tenenee mu na ɔhene bi bɛdi hene, na asafohene nso, atemmuo mu na wɔbɛdi asafohene;

²na wɔn mu biara bɛyɛ sɛ mframa ano huntabea ne osuo ano dwanekɔbea, sɛ nkyɛkyerɛ so nsuwansuwa, sɛ asase a akyen so botan kɛseɛ nwunu.

³Na wɔremfira adehunufoɔ ani, na wɔn a wɔte asɛm aso bɛbue;

⁴ na wɔn a wɔn akoma pere wɔn no bɛyɛ nhunumufoɔ na dodoworofoɔ tɛkyerɛma akasa turodoo a emu teɛ.

⁵Wɔremfrɛ ogyegyentwie sɛ bapɔmma bio, na wɔrenka sɛ ɔdaadaafoɔ yɛ ɔdɛɛfoɔ.

⁶Na ogyegyentwie ka agyegyentwisɛm na ɔdwene amumuyɛsɛm, sɛ ɔbɛdi ahuhusɛm na waka AWURADE ho asɛm a ɛnyɛ, sɛ ɔbɛma deɛ ɔdi kɔm kra ada mpan, na wama anonneɛ abɔ deɛ sukɔm de no.

⁷ Na ɔdaadaafoɔ adeɛ yɛ bɔne, ɔbɔ ne tirim pɔ bɔne, sɛ ɔde atorosɛm bɛsɛe mmɔborɔni ne ohiani sɛ ɔka nokorɛ mpo a.

⁸Na ɔdɛɛfoɔ dwene ayamyɛ, na ayamyɛ ara na ɔde gyina.

⁹ Mo mmaa a mote hɔ dwoodwoo no, monsɔre ntie me! Mmammaa a mo ho dwo mo ho no, monyɛ aso mma m’asɛm.

¹⁰Afe ne akyire nna bi mu no, mo a mo ho dwo mo no ho bɛpopo, na bobe abateɛ to bɛtwa, nnuaba anoboa remma bio.

¹¹Mo mmaa a mote hɔ dwoodwoo no, mo ho nwoso, mo a mo ho dwo mo, mo ho mpopo! Mompa mo ho, monyɛ kwaterekwa, momfa ayitoma mmobɔ mo asene.

¹²Mommobɔ mo koko wɔ mfuo fɛfɛ no nti, bobe nnua a ɛso pii no ntira.

¹³Nkasɛɛ ne nwerɛ fu me man asase no so, aane, anigyeɛ kuro no mu anigyeɛ adan nyinaa so mpo.

¹⁴Na aban fɛfɛ bo bɛda mpan, wɔbɛgya kuro a nnipa dɔɔso wɔ mu no, ne kokoɔ ne ɔwɛn aban bɛdane atu de akɔsi daa, ɛserɛ so mfunumu anika ne mmoakuo adidibea.

¹⁵ Ɛde rekɔsi sɛ wɔbɛfiri soro ahwie honhom no agu yɛn soɔ, na ɛserɛ so adane asasebereɛ a ɛma nnɔbaeɛ, na wɔabu asasebereɛ a ɛma nnɔbaeɛ no sɛ kwaeɛ;

¹⁶na atemmuo bɛtena ɛserɛ so, na tenenee nso atena asasebereɛ a ɛma nnɔbaeɛ no mu;

¹⁷na tenenee no nneyɛɛ bɛyɛ asomdwoeɛ, na tenenee so aba ayɛ kommyɛ ne ahotosoɔ akɔsi daa;

¹⁸na me man bɛtena asomdwoeɛ fie, ahotɔ tenabea, ne kommyɛ homebea.

¹⁹Na asukɔtweaa bɛgu da a kwaeɛ no bɛhwe fam no, na wɔbɛbrɛ kuro no aseɛ korakora.

²⁰Nhyira ne mo a mogu aba, nsuo nyinaa ho, na moma nantwie ne afunumu kwan ma wɔkyinkyin.