Read Twi Asante Yesaia 40 Bible Online

Yesaia 40 - Twi Asante bible

Yesaia 40

¹Monkyekyere, monkyekyere me man werɛ! mo Nyankopɔn na ɔseɛ.

² Monka abodwosɛm nkyerɛ Yerusalem, na mommɔ no kaseɛ sɛ n’akodie asa, sɛ wɔde ne mfomsoɔ akyɛ, sɛ ne bɔne nyinaa ho wanya AWURADE nsam mmɔho.

³ Obi nne team sɛ: Mommɔ AWURADE kwan, wɔ ɛserɛ so, montene anwea pradada so tempɔn mma yɛn Nyankopɔn.

⁴Wɔbɛma mmonhwa nyinaa so, na wɔbɛbrɛ mmepɔ ne nkokoɔ nyinaa ase. Na deɛ ɛyɛ afuafu bɛyɛ asaseta, na mmonkyimmɔnka ayɛ tonomtonom.

⁵Na AWURADE animuonyam bɛyi ne ho adi, na honam nyinaa abom ahunu, ɛfiri sɛ AWURADE ano na aka.

⁶ Ɛnne bi se: Team! Na mebisaa sɛ: Menteam sɛn? Honam nyinaa yɛ wira, na ne papa nyinaa te sɛ wiram nhwiren.

⁷Nwira dwan, na nhwiren twam, na AWURADE home hu fa so. Ampa, ɔman no yɛ wira.

⁸ Nwira dwan, na nhwiren twam, na yɛn Nyankopɔn asɛm bɛtim hɔ daa.

⁹Foro kɔ bepɔ a ɛkorɔn soɔ, O, Ɔsɛmpakafoɔ Sion. Ma wo nne so ahoɔden so, O Ɔsɛmpakafoɔ Yerusalem. Ma so, nsuro; ka kyerɛ Yuda nkuro sɛ: Hwɛ, mo Nyankopɔn nie!

¹⁰ Hwɛ, AWURADE Nyankopɔn de tumi reba, na ne basa bɛdi nim ama no. Hwɛ, n’akatua ka ne ho, na n’ananmuhyɛ di n’anim.

¹¹ Ɔbɛyɛne ne nnwankuo sɛ odwanhwɛfoɔ, ɔbɛturu nnwammaa ne basa so, na wasoa wɔn ne kokom; nnwan mmaatan no, ɔbɛka wɔn brɛɛ.

¹²Hwan na ɔde ne nsayam susu nsuo, na ɔto ɔsoro saama, na ɔde susukoraa hyɛ asase so mfuturo, na ɔkari mmepɔ nsania mu ne nkokoɔ nsania nkoraa mu?

¹³ Hwan na ɔtenetene AWURADE honhom, na ɔfotufoɔ bɛn na ɔmaa no hunuu adeɛ?

¹⁴Ɔne hwan na atu agyina, na wama no ahunu biribi, na wakyerɛkyerɛ no atemmuo kwan, na wakyerɛ no nimdeɛ, na wama no ahunu nhunumu kwan?

¹⁵Hwɛ, amanaman te sɛ bokiti ho nsukoko a ɛresosɔ, na wɔbu wɔn sɛ nsania mu mfuturo bi. Hwɛ, ɔmema mmepɔ so sɛ mfuturo muhumuhu.

¹⁶Na Lebanon nnɔɔso mma ɔhyeɛ, na ne mmoadoma renso ɔhyeɛ afɔdeɛ.

¹⁷Amanaman nyinaa nyɛ hwee n’anim; ɔbu wɔn sɛ adeɛ a ɛnyɛ hwee ne adehunu.

¹⁸ Na hwan ho na mode Onyankopɔn bɛtoɔ, na suban bɛn na mode bɛsusu no?

¹⁹Ohoni deɛ, odwumfoɔ na ɔguo, na sikadwumfoɔ de sika adura ho, na ɔde dwetɛ ntweaban gugu ho;

²⁰deɛ ayɛyɛdeɛ abɔ no no yi dua a ɛmporɔ; ɔhwehwɛ odwumfoɔ nyansafoɔ fa, na wasene ohoni a ɛnkeka ne ho.

²¹Monhunui anaa? Montee anaa? Wɔmfirii mfitiaseɛ nka nkyerɛɛ mo anaa? Ɛfiri asase nnyinasoɔ so, montee biribiara asase aseɛ anaa?

²² Ɔno na ɔte asase kɔntɔnkrɔn soɔ, na ɛsotenafoɔ te sɛ ntutummɛ; ɔno na ɔtrɛ soro mu sɛ twamtam, na ɔyere mu sɛ ntomadan a wɔtena mu;

²³ɔno na ɔma aberempɔn yɛ sɛdeɛ wɔnyɛ hwee, ɔdane asase so atemmufoɔ sɛ ahuhudeɛ.

²⁴Wɔtɛɛ wɔn ara pɛ, wɔduaa wɔn ara pɛ, wɔn dua gyee asase mu nhini ara pɛ, na wahu afa wɔn so ama wɔakusa na ahum asoa wɔn kɔ sɛ ntɛtɛ.

²⁵Na hwan ho na mode me bɛtoɔ na me ne no asɛ? Ɔkronkronni no na ɔseɛ.

²⁶ Momma mo ani so nhwɛ soro, na monhwɛ deɛ ɔbɔɔ yeinom! Ɔno na ɔbu wɔn dɔm ano yi wɔn adie, na ɔbobɔ wɔn nyinaa din frɛfrɛ wɔn; ne tumi dodoɔ ne n’ahoɔden kɛseɛ nti, obiara nyera.

²⁷Adɛn nti na, Yakob, woka, na Israel, wokasa sɛ: Me kwan ahunta AWURADE, na me Nyankopɔn abu n’ani agu m’atemmuo so?

²⁸ Adɛn wonhunui? Adɛn wonteeɛ? AWURADE yɛ daa Nyankopɔn, ɔno na ɔbɔɔ asase awieeɛ no. Ɔmmrɛ, na ɔmpa aba; ne nhunumu mu nni ahwehwɛeɛ.

²⁹Ɔno na ɔma deɛ wabrɛ tumi, na ɔma deɛ ɔnni home ahoɔden dɔɔso.

³⁰Mmabunu mpo brɛ, na wɔpa aba, na mmeranteɛ hwehwe ase;

³¹ na wɔn a wɔtwɛn AWURADE no deɛ, wɔbɛnya ahoɔden foforɔ, wɔde ntaban bɛforo sɛ akɔdeɛ, wɔbɛtu mmirika, na wɔmmrɛ, wɔbɛnante, na wɔnntɔ piti.