Read Twi Asante Yesaia 59 Bible Online

Yesaia 59 - Twi Asante bible

Yesaia 59

¹ Hwɛ, AWURADE nsa nyɛ tiaa a ɛnso ɔgyeɛ, na n’aso mu nyɛ den a ɛrente asɛm,

²na mmom mo amumuyɛ ne deɛ ɛma mo ne mo Nyankopɔn ntam ateteɛ, na mo bɔne na akata n’ani afiri mo ho a enti ɔntie.

³ Na mogya akeka mo nsam, na amumuyɛ agu mo nsateaa ho fi; mo ano keka atorosɛm, mo tɛkyerɛma woro nkontompo.

⁴Obiara nsaman asɛntenenee so, na obiara nsaman wɔ nokorɛ asɛm ho. Wɔde wɔn ho to nsɛnhunu so, na wɔka nsɛnhuhuo; wɔnyinsɛn bɔne, na wɔwo mmusuo.

⁵Wɔhwane ɔkyerebene nkosua, na wɔnwono ananse ntentan; deɛ ɔdi wɔn nkosua wu, na wɔtia bi so a, ɛpae ahuritia.

⁶Wɔn ntentan no renyɛ atadeɛ, na nnipa remfa deɛ wɔyɛ no nkata wɔn ho; Wɔn nnwuma yɛ abusudwuma, na akakabensɛm wɔ wɔn nsam.

⁷ Wɔn nan tutu mmirika kɔyɛ bɔne, na wɔyɛ ntɛm kɔhwie mogya a ɛdi bem gu; wɔn adwene yɛ abusudwene, ɔsɛeɛ ne obubuo wɔ wɔn atempɔn ho.

⁸Asomdwoeɛ kwan deɛ, wɔnnim, na atɛntenenee nni wɔn akwan mu; wɔayɛ wɔn akwan nkontonkyi, obiara a ɔfa soɔ nnim asomdwoeɛ.

⁹Enti na atemmuo ne yɛn ntam awareɛ, na tenenee nso nto yɛn no; yɛtwɛn hann, na hwɛ, esum nie, ne ɔhyerɛn nso, na sum kabii mu na yɛnam.

¹⁰Yɛkeka ɔfasuo ho sɛ anifirafoɔ, na yɛkeka sɛ wɔn a wɔnni ani; yɛsunti awia ketee sɛ kusuu mu, yɛhinhim ahoɔdenfoɔ mu sɛ awufoɔ.

¹¹Yɛn nyinaa pɔ so sɛ asisire, na yɛsi apini sɛ mmuburo; yɛtwɛn atemmuo nso ebi nni hɔ, ne nkwagyeɛ, na ɛne yɛn ntam ware.

¹²Na yɛn mmarato dɔɔso w’anim, na yɛn bɔne di adanseɛ tia yɛn; na yɛn mmarato da yɛn anim, na yɛn amumuyɛ nso, yɛnim.

¹³Yɛato AWURADE mmara atwa no nkontompo, na yɛapa yɛn Nyankopɔn akyi; yɛkasa nhyɛsoɔ ne atuateɛ kasa, yɛsusu atorosɛm wɔ akoma mu na yɛka.

¹⁴Na wɔadane atemmuo ani, na tenenee akɔgyina akyirikyiri; na nokorɛ ahwe ase edwam, na deɛ ɛtene ntumi mma mu.

¹⁵Na nokorɛ ayɛ adeɛ a ɛho yɛ na, na deɛ ɔtwe ne ho firi bɔne ho no, wɔfom no fa. Na AWURADE hunui, na ansɔ n’ani sɛ atemmuo biara nni hɔ,

¹⁶ na ɔhunuu sɛ ɔbarima biara nni hɔ, na ɛyɛɛ no nwanwa sɛ ɔkamafoɔ biara nni hɔ; ɛnna ne basa gyee no, na ne tenenee wowaa no.

¹⁷Na ɔhyɛɛ tenenee sɛ nkataboɔ, na nkwagyeɛ dadeɛ kyɛ hyɛɛ ne ti, na ɔhyɛɛ aweretɔ atadeɛ kataa ne ho, na ɔfiraa aweretɔ sɛ ntoma.

¹⁸Sɛ wɔyɛeɛ no, saa ara na ɔbɛhyɛ wɔn ananmu de abufuhyeɛ ama n’ahohiahiafoɔ, ne akatua ama n’atamfo; nsuano aman nso, ɔde akatua bɛhyɛ wɔn ananmu.

¹⁹Na wɔbɛsuro AWURADE din afiri atɔeɛ, ne n’animuonyam afiri owia puebea, na ɔbɛba sɛ asuo a ano yɛ den a AWURADE ahum de reba.

²⁰ Na ɔbɛba sɛ Ɔgyefoɔ ama Sion ne Yakob mu wɔn a wɔsane firi mmarato mu no, AWURADE asɛm nie.

²¹ Na me deɛ, yei ne me ne wɔn apam no, AWURADE na ɔseɛ: Me honhom a ɛwɔ wo soɔ no ne me nsɛm a mede mahyɛ w’anomu no, ɛremfiri w’anomu ne w’asefoɔ anomu ne w’asefoɔ asefoɔ anomu, AWURADE na ɔseɛ, ɛfiri sesɛɛ de bɛkɔ akɔsi daa.