Read Twi Asante Yesaia 9 Bible Online

Yesaia 9 - Twi Asante bible

Yesaia 9

¹ Nanso kusuuyɛ no rentena hɔ mma deɛ na ɔwɔ ahodwan mu no; akane berɛ no wammu Sebulon asase ne Naftali asase no, nanso akyire yi no, ɔbɛhyɛ amanaman Galilea a ɛwɔ ɛpo kwan, Yordan agya no animuonyam.

² Ɔman a na wɔnam sum mu no, ahunu hann kɛseɛ, wɔn a na wɔte sum kabii asase soɔ no, hann ahyerɛn wɔn so.

³Woama ɔman no adɔre, woama n’anigyeɛ ayɛ kɛseɛ, wɔn ani gye w’anim sɛ twaberɛ mu anigyeɛ, sɛdeɛ wɔdi asadeɛkyɛ mu ahurisie.

⁴ Na wɔn adesoa dua ne wɔn akyiri abaa ne wɔn kafoɔpoma no, woabubu mu sɛ Midian da no.

⁵Na ɔko kitikitiyɛ mu amiafoɔ amiadeɛ nyinaa ne ntoma a wɔde afɔrefɔre mogya no, wɔbɛhye no sɛ adeɛ a wɔde sɔ gya.

⁶ Na wɔawo akɔkoaa ama yɛn, wɔama yɛn ɔbabanin; na n’ahennie bɛda ne mmatiri so, na wɔafrɛ ne din sɛ: Ɔfotufoɔ Nwanwani, Onyankopɔn Tumfoɔ, Daa Agya, Asomdwoeɛ Hene.

⁷ Na n’ahennie mu bɛtrɛ, na asomdwoeɛ a ɛnni awieeɛ aba, Dawid ahennwa so ne n’ahennie so, na ɔde atemmuo ne tenenee awowa no ma atim firi sɛsɛɛ de akɔsi daa. Asafo AWURADE mmɔdemmɔ na ɛbɛyɛ yei.

⁸AWURADE de asɛm bi akra Yakob, na ɛbɛtɔ Israel so,

⁹na ɔman mu no nyinaa bɛhunu, Efraim ne Samariafoɔ a wɔde ahantan ne ahomasoɔ akoma ka sɛ:

¹⁰Ntayaa adan abubu, nanso yɛde aboɔ a wɔatwa bɛto; wɔabubu akyee, na yɛde ntweneduro bɛsi ananmu.

¹¹Na AWURADE bɛma Resin ahohiahiafoɔ so atia no, na wahwanyan n’atamfo:

¹² Siriafoɔ wɔ apueeɛ, na Filistifoɔ wɔ atɔeɛ, na wɔbɛtrɛ wɔn anomu amene Israel. Yei nyinaa mu no, n’abufuo nnyaee, na ne nsa atene ara.

¹³Na ɔman no ansane amma deɛ ɔhwee wɔn no nkyɛn, na asafo AWURADE akyiri kwan nso, wɔanhwehwɛ.

¹⁴ Enti AWURADE bɛtwa Israel mu etire ne dua, papa ne mmɛwa da koro.

¹⁵Ɔpanin ne animuonyamfoɔ no ne etire no, na odiyifoɔ atorɔkyerɛkyerɛni ne dua no.

¹⁶Na ɔman yi akwankyerɛfoɔ ma wɔfom na wɔn a wɔkyerɛ wɔn kwan no, wɔamene wɔn.

¹⁷ Enti AWURADE rennya wɔn mmeranteɛ ho anigyeɛ, na ne yam renhyehye no wɔn nwisiaa ne wɔn akunafoɔ ho; na wɔn nyinaa yɛ nnebɔneyɛfoɔ ne wɔn a nyamesuro nni wɔn mu, na ano nyinaa ka agyegyentwisɛm. Yei nyinaa nti na n’abufuo nnyaee, na ne nsa atene ara.

¹⁸Na abɔnefosɛm dɛre sɛ ogya, ɛhye nnɛnkyɛnse ne nkasɛɛ, na ɛsɔ kwaeɛ mu adɔtɔ mu ma no firi wisie kumoo foro kɔ soro.

¹⁹Asafo AWURADE abufuhyeɛ nti na asase no ahye tumm, na ɔman no ayɛ sɛ adeɛ a wɔde sɔ gya; obi nkora ne nua.

²⁰Na wɔhwim di, nifa so, nanso ɛkɔm de wɔn ara, na wɔdidi benkum so, nanso wɔmmee, wɔwewe wɔn ara wɔn nsa ho nam.

²¹ Manase we Efraim, na Efraim we Manase, na wɔn baanu nyinaa sɔre tia Yuda. Yei nyinaa nti na n’abufuo nnyaee, na ne nsa atene ara.