Read Twi Asante Lewitikɔs 15 Bible Online

Lewitikɔs 15 - Twi Asante bible

Lewitikɔs 15

¹Na AWURADE kasa kyerɛɛ Mose ne Aaron sɛ:

² Monkasa nkyerɛ Israelfoɔ no nse wɔn sɛ: Ɔbarima biara sɛ ne ho sene gu a, n’ahosene no nti ne ho nte.

³Na deɛ ɛgu ne ho fi n’ahosene no mu nie: Sɛ n’ahosene firi ne honam anaasɛ n’ahosene ma ne honam ano si a, ɛyɛ ne ho figuo.

⁴Mpa biara a deɛ ne ho sene no bɛda so no ho nte, na adeɛ biara a ɔbɛtena soɔ no ho nte.

⁵Na deɛ ɔka ne mpa no nsi ne ntadeɛ na ɔmfa nsuo nnware, na ne ho nte kɔsi anwummerɛ;

⁶na deɛ ɔtena adeɛ a deɛ ne ho sene no tenaa soɔ no, ɔnsi ne ntadeɛ na ɔmfa nsuo nnware, na ne ho nte kɔsi anwummerɛ.

⁷Na deɛ ɔka deɛ ne ho sene no honam no, ɔnsi ne ntadeɛ na ɔmfa nsuo nnware na ne ho nte kɔsi anwummerɛ;

⁸na sɛ deɛ ne ho sene no to ntasuo gu deɛ ne ho teɛ so a, ɔnsi ne ntadeɛ na ɔmfa nsuo nnware, na ne ho nte kɔsi anwummerɛ.

⁹Na aboa so adwa biara a ɔhosenefoɔ no bɛtena soɔ no ho nte; na obiara a ɔka biribiara a ɛwɔ ɔhosenefoɔ no ase no ho nte kɔsi anwummerɛ.

¹⁰Na deɛ ɔsoa saa adeɛ no nsi ne ntadeɛ na ɔmfa nsuo nnware, na ne ho nte kɔsi anwummerɛ.

¹¹Na obiara a ɔhosenefoɔ no amfa nsuo anhohoro ne nsa na ɔbɛka no no, ɔnsi ne ntadeɛ na ɔmfa nsuo nnware, na ne ho nte kɔsi anwummerɛ.

¹² Na kukuo a ɔhosenefoɔ no bɛka no, wɔmmɔ, na dua adeɛ biara deɛ, wɔmfa nsuo nhohoro ho.

¹³Na sɛ ɔhosenefoɔ no ho te firi n’ahosene no mu a, ɔnkan nnanson ngu n’ahofire so, na ɔnsi ne ntadeɛ, na ɔmfa mmasuo nnware ne honam, na ne ho ate.

¹⁴ Na da a ɛtɔ so nwɔtwe no, ɔmfa anyankuku mmienu anaa mmorɔnoma mma mmienu mmra AWURADE anim, ahyiaeɛ ntomadan no ano, na ɔmfa mma ɔsɔfoɔ no.

¹⁵Na ɔsɔfoɔ no mfa baako nyɛ bɔne ho afɔdeɛ, na baako no nso ɔmfa nyɛ ɔhyeɛ afɔdeɛ, na ɔsɔfoɔ no mpata mma no AWURADE anim mfiri n’ahosene no mu.

¹⁶ Na sɛ ɔbarima bi ahoba firi ne mu a, ɔmfa nsuo nnware ne honam nyinaa, na ne ho nte kɔsi anwummerɛ.

¹⁷Na ntoma biara anaa nwoma biara a ahoba bɛgu mu no, wɔmfa nsuo nsi, na ɛho nte kɔsi anwummerɛ.

¹⁸Na sɛ ɔbarima ne ɔbaa da na ahoba gu no a, wɔmfa nsuo nnware na wɔn ho nte kɔsi anwummerɛ.

¹⁹ Na ɔbaa sɛ ne ho sene na mogya firi ne honam mu gu a, ɔntena ne nsabuo no mu nnanson, na obiara a ɔka no no ho nte kɔsi anwummerɛ.

²⁰Na adeɛ biara a ɔda soɔ ne nsabuo mu no ho nte, na adeɛ a ɔtena soɔ no ho nte.

²¹Na obiara a ɔka ne mpa no, ɔnsi ne ntadeɛ na ɔmfa nsuo nnware, na ne ho nte kɔsi anwummerɛ;

²²na obiara a ɔka adeɛ biara a watena soɔ no, ɔnsi ne ntadeɛ na ɔmfa nsuo nnware na ne ho nte kɔsi anwummerɛ;

²³na sɛ biribi wɔ mpa no so anaasɛ adeɛ a watena soɔ no so a, obi ka a, ne ho nte kɔsi anwummerɛ.

²⁴Na sɛ ɔbarima ne no da na ne nsabuo adeɛ no bi ka ne ho a, ne ho nte nnanson, na ne mpa a ɔda soɔ no nyinaa ho nte.

²⁵Na ɔbaa sɛ ne ho sene mogya gu nna pii, na ɛnyɛ ne nsabuo berɛ, anaasɛ ne ho sene tra ne nsabuo a, ɛnneɛ n’ahosene a ɛho nteɛ nna no nyinaa ne ho nte te sɛ ne nsabuo nna mu.

²⁶Ne mpa a ɔda soɔ biara n’ahosene nna nyinaa mu no nyɛ no sɛ ne nsabuo mpa, na adeɛ biara a ɔtena soɔ no ho nte sɛ ne nsabuo mu deɛ no.

²⁷Na obiara a ɔka nnoɔma yi no ho nte, na ɔnsi ne ntadeɛ na ɔmfa nsuo nnware, ne ho nte kɔsi anwummerɛ.

²⁸Na sɛ ne ho te firi n’ahosene no mu a, ɔnkan nnanson mfa, na ɛno akyiri no ne ho ate.

²⁹ Na da a ɛtɔ so nwɔtwe no, ɔmfa anyankuku mmienu anaa mmorɔnoma mma mmienu mmrɛ ɔsɔfoɔ, ahyiaeɛ ntomadan no ano.

³⁰Na ɔsɔfoɔ no mfa baako mmɔ bɔne ho afɔdeɛ, na baako no ɔmfa mmɔ ɔhyeɛ afɔdeɛ, na ɔsɔfoɔ no mpata mma no, AWURADE anim, mfiri n’ahosene a ɛho nteɛ no mu.

³¹Na momma Israelfoɔ no nyi wɔn ho mfiri wɔn fi mu, na wɔanwuwu wɔn fi mu sɛ wɔrekɔgu me tenabea a ɛwɔ wɔn mu no ho fi.

³²Yei ne mmara a ɛda hɔ ma deɛ ne ho sene ne deɛ ne ho nsuo firi ne mu gu ne ho fi,

³³ne ɔbaa a ne ho nyɛ no den ne nsabuo mu, ne deɛ ne ho sene, ɔbarima oo, ɔbaa oo, ne ɔbarima a ɔne ɔbaa a ne ho nteɛ bɛda.