Read Twi Asante Lewitikɔs 25 Bible Online

Lewitikɔs 25 - Twi Asante bible

Lewitikɔs 25

¹Na AWURADE kasa kyerɛɛ Mose Sinai bepɔ so sɛ:

²Kasa kyerɛ Israelfoɔ na ka kyerɛ wɔn sɛ: Sɛ moduru asase a mede merema mo no so a, asase no nhome nni home afe mma AWURADE.

³ Mfeɛ nsia na dua w’afuo mu adeɛ, na mfeɛ nsia no pempane wo bobe turo mu nnua ho na boa emu nnɔbaeɛ ano;

⁴na afe a ɛtɔ so nson no nyɛ ahomegyeɛ home mma asase no, ɛnyɛ home mma AWURADE: Nnua w’afuo mu adeɛ, na mpempane wo bobe turo mu nnua ho.

⁵Wo ntwakaeɛ a ɛfifire no, ntwa, na wo bobehoma a woampempane no so esa esa no, ntete, ɛnyɛ ahomegyeɛ afe mma asase no.

⁶Na asase no home mu adeɛ nyɛ mo deɛ, na monni, wo ne w’akoa ne w’afenaa ne wo paani ne wo hɔhoɔ a wɔabɛtena wo nkyɛn,

⁷ne w’afieboa ne mmoa a wɔwɔ w’asase no soɔ, na ɛso nnɔbaeɛ no nyinaa nyɛ wɔn aduane.

⁸Na kan home mfeɛ nson, mfeɛ nson ahodoɔ nson, fa, na home mfeɛ nson no mu nna nyɛ aduanan nkron.

⁹ Na bosome a ɛtɔ so nson no da a ɛtɔ so du no, ma wɔnhyɛne totorobɛnto ntwa mu; mpata da no mu na momma wɔnhyɛne totorobɛnto ntwam mo asase nyinaa soɔ.

¹⁰ Na monyɛ afe a ɛtɔ so aduonum no afe kronkron, na mompae ahofadie, asase no so, mma ɛsotefoɔ nyinaa; ɛnyɛ mo ahosɛpɛ afahyɛ na mo mu biara nsane nkɔ mo agyapadeɛ mu, na obiara nsane nkɔ n’abusua mu.

¹¹Ahosɛpɛ afahyɛ na saa afe a ɛtɔ so aduonum no nyɛ mma mo: Monnnua adeɛ na monntwa ne ntwakaeɛ a ɛfifiriiɛ, na monntete mo bobe homa a wɔampempane ho no so aba.

¹²Na ɛyɛ ahosɛpɛ afahyɛ afe, ɛnyɛ kronkron mma mo. Monni mfuo mu nnɔbaeɛ a ɛba afe no mu no.

¹³Ahosɛpɛ afahyɛ afe yi mu no, mo mu biara nsane nkɔ mo agyapadeɛ mu.

¹⁴ Na sɛ wotɔn biribi ma wo yɔnko anaasɛ wotɔ wo yɔnko nsam biribi a, mo mu bi nnni ne nua amim.

¹⁵Sɛdeɛ ahosɛpɛ afahyɛ afe no akyiri mfirinhyia ano teɛ na tɔ wo yɔnko nkyɛn adeɛ, sɛdeɛ nnɔbaeɛ mfirinhyia ano teɛ na ɔntɔn mma woɔ.

¹⁶Mfeɛ no dɔɔso a, to ne boɔ so, na mfeɛ no sua a, te ne boɔ so, ɛfiri sɛ afe afe nnɔbaeɛ na ɔtɔn ma woɔ.

¹⁷Na mo mu biara nnni ne yɔnko amim, na suro wo Nyankopɔn: Na mene AWURADE mo Nyankopɔn.

¹⁸ Na monyɛ m’ahyɛdeɛ na monni m’atemmudeɛ so nyɛ, na montena asase no so dwoodwoo.

¹⁹Na asase no bɛba n’aduane na moadi amee, na moatena so dwoodwoo.

²⁰Na sɛ moka sɛ: Ɛdeɛn na yɛbɛdi afe a ɛtɔ so nson no mu? Hwɛ, yɛnnua na yɛntwa yɛn nnɔbaeɛ a,

²¹ ɛnneɛ, mɛhyɛ me nhyira mama mo afe a ɛtɔ so nsia no mu, na aba mfeɛ mmiɛnsa aduane;

²²na modua aduane afe a ɛtɔ so nwɔtwe no mu a, mobɛdi nnɔbaeɛ dada no akɔsi afe a ɛtɔ so nkron no mu. Mobɛdi aduane dada no akɔsi sɛ ne nnɔbaeɛ bɛba.

²³ Na wɔnntɔn asase no korakora, ɛfiri sɛ asase no yɛ me dea na moyɛ me nkyɛn ahɔhoɔ ne atubrafoɔ.

²⁴Na asase a modi soɔ nyinaa, momma asase no gyeɛ ho kwan.

²⁵ Sɛ ɛhia wo nua na ɔtɔn n’adeɛ bi a, ɛnneɛ ne gyefoɔ a ɔyɛ obusuani a ɔbɛn no mmra mmɛgye deɛ ne nua tɔneeɛ no.

²⁶Na sɛ obi nni gyefoɔ na ne nsa aso na wanya deɛ ɛso gyeɛ a,

²⁷ɛnneɛ, ɔmmu mfeɛ a ɔtɔneeɛ no ano na ɔnhyɛ deɛ ɛboro soɔ no ananmu mma deɛ ɔtɔn maa no no, na ɔnsane mmra n’adeɛ ho.

²⁸Na sɛ ne nsa anso deɛ ɛso ananmuhyɛ no so a, ɛnneɛ, adeɛ a ɔtɔneeɛ no ntena deɛ ɔtɔeɛ no nsam nkɔsi ahosɛpɛ afahyɛ afe no, na ɛfiri ahosɛpɛ afahyɛ afe no mu no, ɔnsane mmra n’adeɛ ho.

²⁹Na sɛ obi tɔn efie a wɔtena mu wɔ kuro a ɔfasuo wɔ ho mu a, wɔmma ne gyeɛ ho kwan nkɔsi sɛ ne tɔn afe no duru soɔ; nna yi na ɔwɔ ne gyeɛ ho kwan.

³⁰Na sɛ wannye ma afe mu wie duru a, ɛnneɛ, efie a ɛwɔ kuro a ɔfasuo wɔ ho mu no nyɛ deɛ ɔtɔeɛ no dea korakora, n’awoɔ ntoatoasoɔ nyinaa mu; ɔdenadeɛ no ntumi mmɛgye bio ahosɛpɛ afahyɛ afe no mu.

³¹Na adan a ɛwowɔ nkuraa a ɔfasuo nni ho aseɛ no deɛ, wɔmmu nka asase no so mfuo ho: Wɔmma ne gyeɛ ho kwan; na wɔmmɛgye no ahosɛpɛ afahyɛ afe no mu.

³² Na Lewifoɔ nkuro a ɛyɛ nkuro a wɔdi soɔ no mu afie deɛ, Lewifoɔ wɔ ne gyeɛ ho kwan daa.

³³Na sɛ Lewifoɔ mu bi annye ne fie a wɔatɔn a ɛwɔ kuro a ɔdi soɔ mu a, ahosɛpɛ afahyɛ afe no mu no, ɔmfa n’adeɛ, ɛfiri sɛ Lewifoɔ nkuro mu afie ne wɔn adeɛ a wɔdi soɔ Israelfoɔ mu.

³⁴Na wɔn nkuro ho mmoa adidibea nsase deɛ, wɔnntɔn, na ɛyɛ wɔn adeɛ a wɔdi so daa.

³⁵Na sɛ ɛhia wo nua na ɔpa aba a, sɔ ne mu na ɔntena wo nkyɛn sɛ ɔhɔhoɔ ne otudanfoɔ.

³⁶ Nnye ne hɔ mfɛntomu, na nhuri ne ka a ɔde woɔ no, na suro wo Nyankopɔn, na wo nua nnya wo nkyɛn nkwa.

³⁷Mfa wo sika mma no nnye ɛho mfɛntomu, na nhuri w’aduane a woma no no:

³⁸Mene AWURADE mo Nyankopɔn a meyii mo firii Misraim asase soɔ sɛ mede Kanaan asase merema mo na mayɛ mo Nyankopɔn.

³⁹ Na sɛ ɛhia wo nua a ɔwɔ wo nkyɛn na wɔtɔn no ma wo a, nni no nya,

⁴⁰na mmom ɔntena wo nkyɛn sɛ ɔpaani ne otudanfoɔ; ɔnsom wo nkɔsi ahosɛpɛ afahyɛ afe no so.

⁴¹Ɛno na ɔmfiri wo nkyɛn, ɔno ne ne mma nyinaa, na ɔnsane nkɔ n’abusua mu ne n’agyanom adeɛ a wɔdi soɔ no ho.

⁴²Na wɔyɛ me nkoa a meyii wɔn firii Misraim asase so. Wɔnntɔn wɔn nkoatɔn.

⁴³ Mfa nyadie nhyɛ no so, na suro wo Nyankopɔn.

⁴⁴Na w’akoa ne w’afenaa a wobɛnya no, amanaman a wɔgugu mo ho no, wɔn mu na tɔ akoa ne afenaa.

⁴⁵Na ahɔhoɔ a wɔatu abɛtena mo nkyɛn no mma no nso, montɔ wɔn mu bi ne wɔn abusuafoɔ a wɔne mo teɛ a wɔawo wɔn mo asase soɔ no bi, na wɔnyɛ mo agyapadeɛ,

⁴⁶na moagya wɔn ama mo mma wɔ mo akyi ayɛ wɔn awunnyadeɛ ne adeɛ a wɔdi so daa, na wɔnsom mo nkoasom; na mo nuanom Israelfoɔ deɛ, obiara mmfa nyadie nnhyɛ ne nua so.

⁴⁷Na sɛ wo nkyɛn hɔhoɔ anaa otubrafoɔ bi nsam wɔ biribi, na ɛhia wo nua a ɔne no wɔ hɔ, na wɔtɔn no ma ɔhɔhoɔ a watu abɛtena wo nkyɛn anaa ɔhɔhoɔ no abusua mu nipa bi a,

⁴⁸ɛnneɛ, ne tɔn akyiri no, wɔmma ne gyeɛ ho kwan; ne nuanom mu baako nnye no,

⁴⁹anaasɛ n’agya nua anaa n’agya nua ba nnye no, anaasɛ n’abusua mu bogya bi nnye no, anaasɛ ne nsam wɔ biribi a, ɔnnye ne ho.

⁵⁰Na ɔne deɛ ɔtɔɔ no no mmu nkonta mfiri afe a wɔtɔn no maa no no so nkɔsi ahosɛpɛ afahyɛ afe no so, na ne tiriadeɛ nyɛ sɛdeɛ mfeɛ no dodoɔ teɛ, ɔne no asetena nyɛ sɛ ɔpaani nna.

⁵¹Sɛ mfeɛ no da so dɔɔso a, ne tiri sika no mu gyeɛ adeɛ a ɔbɛdane ama no no nnɔɔso saa ara;

⁵²na sɛ aka mfeɛ kakraa bi na aduru ahosɛpɛ afahyɛ afe no so a, ɔmmu mma no: Ne mfeɛ no ano pɛ na ɔnnane ne gyeɛ adeɛ mma no:

⁵³ Ɔne no asetena nyɛ sɛ ɔpaani deɛ afe afe: Ɔmmfa nyadie nnhyɛ no so wɔ w’anim.

⁵⁴Na sɛ wɔamfa yeinom so annye no a, ɛnneɛ, ahosɛpɛ afahyɛ afe no mu, ɔmfa ne ho nkɔdi, ɔno ne ne mma nyinaa.

⁵⁵Na me na Israelfoɔ yɛ me nkoa. Me nkoa a meyii wɔn firii Misraim asase soɔ ne wɔn: Mene AWURADE mo Nyankopɔn.