Read Twi Asante Lewitikɔs 4 Bible Online

Lewitikɔs 4 - Twi Asante bible

Lewitikɔs 4

¹Na AWURADE kasa kyerɛɛ Mose sɛ:

²Kasa kyerɛ Israelfoɔ sɛ: Sɛ obi anhyɛda na ɔyɛ nnoɔma a AWURADE ahyɛ sɛ wɔnnyɛ no mu biara,

³sɛ nso ɔsɔfoɔ a wɔasra no ɔsɔfo panin yɛ bɔne ma ɔman no di so a, ɛnneɛ ne bɔne a ɔyɛeɛ nti ma no mfa nantwie ba onini a ɔdi mu mmrɛ AWURADE mmɛyɛ bɔne ho afɔdeɛ.

⁴Na ɔmfa nantwinini no mmra ahyiaeɛ ntomadan no ano, AWURADE anim, na ɔmfa ne nsa nto n’atifi, na ɔnku no, AWURADE anim.

⁵Na ɔsɔfoɔ a wɔasra no no mfa nantwie no mogya no bi nkɔ ahyiaeɛ ntomadan no mu,

⁶ na ɔsɔfoɔ no mfa ne nsateaa mmɔ mogya no mu, na ɔmpete mogya no bi mprɛnson, AWURADE anim, kronkronbea ntwamutam no anim.

⁷ Na ɔsɔfoɔ no mfa mogya no bi nkeka aduhwamhyeɛ bukyia a ɛwɔ AWURADE anim, ahyiaeɛ ntomadan mu no mmɛn ho, na ɔnhwie nantwie no mogya nyinaa ngu ɔhyeɛ afɔrebukyia a ɛwɔ ahyiaeɛ ntomadan ano no ase.

⁸Na ɔnyi bɔne ho afɔdeɛ nantwie no sradeɛ nyinaa mfiri ne ho; sradeɛ a ɛkata ayamdeɛ so ne ayamdeɛ ho sradeɛ nyinaa,

⁹ne sawa mmienu no ne sradeɛ a ɛwɔ so, sisia mu no ne mmerɛboɔ so ntentan no; ɔmfiri sawa ho nyi,

¹⁰sɛdeɛ wɔyi firi asomdwoeɛ afɔdeɛ nantwie ho no; na ɔsɔfoɔ no nhye no ɔhyeɛ afɔrebukyia no so.

¹¹ Na ɔmfa nantwinini no nwoma ne ne nam nyinaa ne ne ti ne ne nnyawa ne n’ayamdeɛ ne n’agyanan no,

¹² nantwinini mu no nyinaa, mfiri nkɔ nsraban no akyi, deɛ ɛhɔ teɛ, deɛ wɔhwie nso guo, na ɔmfa ogya nhye no nnyina so; deɛ wɔhwie nso guo na wɔnhye no.

¹³ Na sɛ Israel asafo nyinaa fom, na asɛm no ahunta ɔman no ani so, na wɔyɛ nnoɔma a AWURADE ahyɛ sɛ wɔnnyɛ no mu bi, na wɔdi so,

¹⁴ na wɔhunu bɔne a wɔayɛ de afom no a, ɛnneɛ, asafo no mfa nantwie ba onini mmra mmɛyɛ bɔne ho afɔdeɛ, na wɔmfa no mmra ahyiaeɛ ntomadan no ano.

¹⁵Na asafo no mu mpanimfoɔ mfa wɔn nsa ngu nantwinini no atifi, na wɔnkum nantwie no, AWURADE anim.

¹⁶Na ɔsɔfoɔ a wɔasra no no mfa nantwinini no mogya no bi nhyɛne ahyiaeɛ ntomadan no mu;

¹⁷na ɔmfa ne nsateaa mmɔ mogya no mu mfa mpete mprɛnson, AWURADE anim, ntwamutam no anim,

¹⁸na ɔmfa mogya no bi nkeka afɔrebukyia a ɛsi AWURADE anim, ahyiaeɛ ntomadan no mu, no mmɛn ho, na ɔnhwie mogya no nyinaa ngu ɔhyeɛ afɔrebukyia a ɛsi ahyiaeɛ ntomadan ano no ase.

¹⁹Na ɔnyi ne sradeɛ nyinaa mfiri so, na ɔnhye no afɔrebukyia no so.

²⁰Na sɛdeɛ ɔyɛɛ bɔne ho afɔdeɛ nantwinini no, saa ara na wɔnyɛ yei nso; na ɔsɔfoɔ no mpata mma wɔn, na wɔde bɛkyɛ wɔn.

²¹ Na ɔmfa nantwinini no mfiri nkɔ nsraban no akyi, na ɔnhye no sɛdeɛ wɔhyee kane nantwinini no, asafo no bɔne ho afɔdeɛ ne no.

²²Sɛ otitire bi anhyɛ da na ɔyɛ nnoɔma a AWURADE ne Nyankopɔn ahyɛ sɛ wɔnnyɛ no nyinaa mu adeɛ baako, na ɔdi so, na sɛ wɔma no hunu ne bɔne a wayɛ no a,

²³ɛnneɛ, ɔmfa n’ayɛyɛdeɛ a ɛyɛ ɔpapo a ɔdi mu mmra;

²⁴na ɔmfa ne nsa nto ɔpapo no atifi, na ɔnku no deɛ wɔkum ɔhyeɛ afɔdeɛ no wɔ AWURADE anim: Bɔne ho afɔdeɛ ne no.

²⁵Na ɔsɔfoɔ no mfa ne nsateaa mfa bɔne ho afɔdeɛ no mogya no bi nkeka ɔhyeɛ afɔrebukyia no mmɛn ho, na ɔnhwie ne mogya no ngu ɔhyeɛ afɔrebukyia no ase.

²⁶Na ɔnhye ne sradeɛ nyinaa wɔ ɔhyeɛ afɔrebukyia no so sɛ asomdwoeɛ afɔdeɛ sradeɛ no; na ɔsɔfoɔ no mpata mma no, ne bɔne no ho, na wɔde bɛkyɛ no.

²⁷Na sɛ asase no so nkurɔfoɔ no mu biara anhyɛda na ɔyɛ nnoɔma a AWURADE ahyɛ sɛ wɔnnyɛ no mu adeɛ baako, na ɔdi so, na sɛ wɔma no hunu ne bɔne a wayɛ a,

²⁸ɛnneɛ, ne bɔne a wayɛ no nti, ɔmfa n’ayɛyɛdeɛ, abirekyibereɛ a ɔdi mu mmra mmɛma;

²⁹na ɔmfa ne nsa nto bɔne ho afɔdeɛ no atifi, na ɔnkum bɔne ho afɔdeɛ no deɛ wɔkum ɔhyeɛ afɔdeɛ hɔ.

³⁰Na ɔsɔfoɔ no mfa ne nsateaa nka mogya no bi nkeka ɔhyeɛ afɔrebukyia no mmɛn ho, na ɔnhwie ne mogya nyinaa ngu ɔhyeɛ afɔrebukyia no ase.

³¹ Na ɔnyi ɛho sradeɛ sɛdeɛ wɔyi asomdwoeɛ afɔdeɛ deɛ no, na ɔsɔfoɔ no nhye no ɔhyeɛ afɔrebukyia no so, na ɛnyi hwa hwanhwam mma AWURADE; na ɔsɔfoɔ no mpata mma no, na wɔde bɛkyɛ no.

³²Na sɛ ɔde adwammaa bɛyɛ n’ayɛyɛdeɛ ba bɛbɔ bɔne ho afɔdeɛ a, ɔmfa ɔbedeɛ a ɔdi mu mmra.

³³Na ɔmfa ne nsa nto bɔne ho afɔdeɛ no atifi, na ɔnku no nyɛ bɔne ho afɔdeɛ, deɛ wɔkum ɔhyeɛ afɔdeɛ hɔ.

³⁴Na ɔsɔfoɔ no mfa ne nsateaa nka bɔne ho afɔdeɛ no mogya no bi nkeka ɔhyeɛ afɔrebukyia no mmɛn ho, na ɔnhwie mogya no nyinaa ngu afɔrebukyia no ase.

³⁵Na ɔnyi ne sradeɛ nyinaa, sɛdeɛ wɔyi asomdwoeɛ afɔdeɛ adwammaa ho sradeɛ no, na ɔsɔfoɔ no nhye no afɔrebukyia so, sɛdeɛ AWURADE gya afɔrebɔ teɛ no; na ɔsɔfoɔ no mpata mma no, ne bɔne a wayɛ no ho, na wɔde bɛkyɛ no.