Read Twi Asante Lewitikɔs 7 Bible Online

Lewitikɔs 7 - Twi Asante bible

Lewitikɔs 7

¹ Na yei ne asodie ho afɔdeɛ ho mmara; ɛyɛ akronkronneɛ mu ade kronkron.

² Faako a wɔkum ɔhyeɛ afɔdeɛ aboa no, ɛhɔ ara na wɔnkum asodie ho afɔdeɛ deɛ no nso; na ɔnhwie ne mogya mpete afɔrebukyia no so nhyia.

³Na ɔnyi ne sradeɛ nyinaa mmra: Ne sradedua, ne sradeɛ a ɛkata ayamdeɛ ho no,

⁴ ne sawa mmienu ne sradeɛ a ɛwɔ ho, sisia mu no, ne mmerɛboɔ so ntentan, ɔmfiri sawa ho nyi;

⁵na ɔsɔfoɔ no nhye ne nyinaa afɔrebukyia no so nyɛ AWURADE gya afɔdeɛ; asodie ho afɔdeɛ ne no.

⁶Mmarima a wɔfiri asɔfoɔ abusuakuo nyinaa nni; deɛ ɛhɔ yɛ kronkron na wɔnnie; ɛyɛ akronkronneɛ mu ade kronkron.

⁷Sɛ bɔne ho afɔdeɛ teɛ no, sɛ asodie ho afɔdeɛ nso teɛ ne no, mmara korɔ na ɛda ho; ɔsɔfoɔ a ɔde pata no, ɛnyɛ ne dea.

⁸ Na ɔsɔfoɔ a ɔbɔ ɔhyeɛ afɔdeɛ ma obi no, ɔhyeɛ afɔdeɛ a ɔbɔeɛ no nwoma nyɛ ɔsɔfoɔ no dea.

⁹ Na aduane afɔdeɛ a wɔto no fononoo mu nyinaa ne deɛ wɔsiesie no kukuo mu ne ɛkyeɛ dadeɛ soɔ nyinaa, ɔsɔfoɔ a ɔde ba no na ɛnyɛ ne dea.

¹⁰Na aduane afɔdeɛ a wɔagu so ngo anaa deɛ ɛyɛ wesee nyɛ Aaron mma nyinaa deɛ, obiara nnya sɛdeɛ ne yɔnko nya.

¹¹ Na yei ne asomdwoeɛ afɔdeɛ a wɔbɔ ma AWURADE no ho mmara.

¹² Sɛ wɔyɛ no aseda afɔdeɛ de ba a, aseda afɔdeɛ a ɔde ba no nyɛ apiti taterɛ a wɔde ngo afɔre, ne apiti ɔfam a wɔde ngo agu soɔ ne esiam taterɛ a wɔde ngo afɔre akyeɛ.

¹³Mmɔreka paanoo taterɛ na ɔmfa nka n’ayɛyɛdeɛ ne n’asomdwoeɛ aseda afɔdeɛ no ho mmra.

¹⁴Na ɔmfa ayɛyɛdeɛ no mu biara baako mmra, na wɔmma so mma AWURADE, ɔsɔfoɔ a ɔde asomdwoeɛ afɔdeɛ mogya peteeɛ no na ɛnyɛ ne dea.

¹⁵ Na n’asomdwoeɛ aseda afɔdeɛ no nam no, wɔnni no da a wɔde baeɛ no ara, wɔnnnya bi nnkɔsi adekyeeɛ.

¹⁶Na sɛ n’ayɛyɛdeɛ no yɛ bɔhyɛ anaa ayamyi ayɛyɛdeɛ a, wɔnni no da a ɔbɔ n’afɔdeɛ no, na sɛ adeɛ kye bi so a, wɔnni ara;

¹⁷na afɔdeɛ no nam a ɛbɛka akɔsi da a ɛtɔ so mmiɛnsa no, wɔmfa ogya nhye.

¹⁸Na sɛ obi di n’asomdwoeɛ afɔdeɛ nam no bi da a ɛtɔ so mmiɛnsa no a, ɛrensɔ ani, na wɔremmu mma deɛ ɔde baeɛ no, ɛyɛ akyiwadeɛ, na ɔkra a ɔbɛdi bie no bɛsoa ne mmusuo.

¹⁹Na nam a aka biribi a ɛho nteɛ no, wɔnnni; wɔmfa ogya nhye. Na nam deɛ, obiara a ne ho teɛ nni,

²⁰nanso ɔkra a ɔbɛdi asomdwoeɛ afɔdeɛ nam a ɛyɛ AWURADE dea no bie, na n’afideɛ da ne soɔ no, wɔbɛtwa saa ɔkra no afiri ne man mu atwene.

²¹Na ɔkra bi a ɔbɛka afideɛ biara, onipa ho afideɛ bi oo, aboa a ne ho nteɛ oo, akyiwadeɛ biara a ɛho nteɛ oo, na ɔbɛdi AWURADE asomdwoeɛ afɔdeɛ nam no bie no, wɔbɛtwa saa ɔkra no afiri ne man mu atwene.

²²Na AWURADE kasa kyerɛɛ Mose sɛ:

²³ Kasa kyerɛ Israelfoɔ sɛ: Nantwie ne odwanten ne abirekyie sradeɛ biara, monnni.

²⁴ Na aboa funu sradeɛ ne deɛ wɔatete no sradeɛ, wɔmfa nyɛ adwuma biara, na die na monnnie.

²⁵Na obiara a ɔbɛdi afieboa a wɔde bi bɛbɔ AWURADE gya afɔdeɛ sradeɛ no, wɔbɛtwa ɔkra a ɔdie no afiri ne man mu atwene.

²⁶ Na mogya biara nso, anomaa deɛ oo, atɔteboa deɛ oo, monnni wɔ mo tenabea biara mu.

²⁷Ɔkra biara a ɔbɛdi mogya biara no, wɔbɛtwa saa ɔkra no afiri ne man mu atwene.

²⁸Na AWURADE kasa kyerɛɛ Mose sɛ:

²⁹Kasa kyerɛ Israelfoɔ sɛ: Deɛ ɔbɛbɔ n’asomdwoeɛ afɔdeɛ ama AWURADE no, ɔmfa n’asomdwoeɛ afɔdeɛ no mu ayɛyɛdeɛ mmrɛ AWURADE.

³⁰ Ɔno ara ne nsa na ɔmfa nsɔ AWURADE gya afɔdeɛ no mu mmra, sradeɛ ne ɔyan na ɔmfa mmra; ɔyan no, wɔnhim nyɛ ohim afɔdeɛ AWURADE anim.

³¹Na ɔsɔfoɔ no nhye sradeɛ no, afɔrebukyia no so, na ɔyan no nyɛ Aaron ne ne mma dea.

³² Na ɔsrɛ nifa no, momfa nyɛ mo asomdwoeɛ afɔdeɛ mu mmasoɔ adeɛ mma ɔsɔfoɔ no.

³³Aaron mma mu deɛ ɔde asomdwoeɛ afɔdeɛ mogya ne sradeɛ ba no, ɔno na ɔsrɛ nifa no nyɛ ne kyɛfa.

³⁴Na ohim yan ne mmasoɔ srɛ no na mafa, Israelfoɔ asomdwoeɛ afɔdeɛ no mu, na mede mama Ɔsɔfoɔ Aaron ne ne mma sɛ wɔn daa kyɛfa a ɛfiri Israel mma nsam.

³⁵Yei ne Aaron kyɛfa ne ne mma kyɛfa a ɛfiri AWURADE gya afɔdeɛ mu, ɛda a wɔde wɔn baa sɛ wɔmmɛdi AWURADE asɔfoɔ

³⁶na AWURADE hyɛɛ sɛ wɔmfa mma wɔn, ɛda a wɔsraa wɔn ngo firii Israelfoɔ mu, sɛ ɛnyɛ wɔn daa kyɛfa, wɔn awoɔ ntoatoasoɔ nyinaa mu no.

³⁷ Yei ne mmara a ɛda hɔ ma ɔhyeɛ afɔdeɛ ne aduane afɔdeɛ ne bɔne ho afɔdeɛ ne asodie ho afɔdeɛ ne atuhoakyɛ afɔdeɛ ne asomdwoeɛ afɔdeɛ

³⁸a AWURADE hyɛɛ Mose, Sinai bepɔ soɔ, ɛda a ɔhyɛɛ Israelfoɔ sɛ wɔmfa wɔn ayɛyɛdeɛ mmrɛ AWURADE, Sinai serɛ soɔ no.