Read Twi Asante Lewitikɔs 8 Bible Online

Lewitikɔs 8 - Twi Asante bible

Lewitikɔs 8

¹ Na AWURADE kasa kyerɛɛ Mose sɛ:

²Fa Aaron ne ne mma ka ne ho, ɛne ntadeɛ no ne sra ngo no, ne bɔne ho afɔdeɛ nantwinini no ne adwennini mmienu no ne apiti kɛntɛn no.

³Na ma asafo no nyinaa mmɔ dwa, ahyiaeɛ ntomadan no ano.

⁴Na Mose yɛɛ sɛdeɛ AWURADE hyɛɛ no no, na ɔmaa asafo no bɔɔ dwa, ahyiaeɛ ntomadan no ano.

⁵Na Mose ka kyerɛɛ asafo no sɛ: Yei ne adeɛ a AWURADE ahyɛ sɛ wɔnyɛ.

⁶Na Mose de Aaron ne ne mma no bae, na ɔde nsuo hohoroo wɔn ho;

⁷na ɔde atadeɛ yuu no hyɛɛ no, na ɔde aboomu no bɔɔ n’asene, na ɔde batakari no hyɛɛ no, na ɔde asɔfotadeɛ no hyɛɛ no, na ɔde asɔfotadeɛ no nkyekyeremu no bɔɔ no abɔsoɔ;

⁸ na ɔde adaaboɔ no hyehyɛɛ no, na ɔde Urim ne Tumim no hyɛɛ adaaboɔ no mu;

⁹ na ɔde abotitene no bɔɔ ne ti, na ɔde sikaterɛ no, kronkronyɛ ahyehyɛdeɛ no, fam abotitene no anim sɛdeɛ AWURADE hyɛɛ Mose no.

¹⁰ Na Mose faa sra ngo no de sraa tenabea no ne deɛ ɛwɔ mu nyinaa, na ɔyɛɛ no kronkron;

¹¹na ɔde bi petee afɔrebukyia no so mprɛnson, na ɔsraa afɔrebukyia no ne ɛho nnoɔma nyinaa ne kuduo no ne ntaaseɛ no ngo de yɛɛ no kronkron.

¹²Na ɔhwiee sra ngo no bi guu Aaron atifi sraa no ngo de yɛɛ no kronkron.

¹³Na Mose de Aaron mma no nso bae, na ɔhyehyɛɛ wɔn ntadeɛ, na ɔde aboomu bobɔ wɔn mu, na ɔde abotire bobɔɔ wɔn, sɛdeɛ AWURADE hyɛɛ Mose no.

¹⁴ Na ɔmaa wɔde bɔne ho afɔdeɛ nantwinini no bae, na Aaron ne ne mma no de wɔn nsa guu bɔne afɔdeɛ nantwinini no atifi.

¹⁵Na Mose kumm no, na ɔde ne nsateaa kaa mogya no bi kekaa afɔrebukyia no mmɛn ho hyiae, na ɔyii afɔrebukyia no ho bɔne, na ɔhwiee mogya no petee afɔrebukyia no ase de dwiraa sɛ ɔde repata so.

¹⁶Na ɔfaa sradeɛ a ɛwɔ ayamdeɛ no ho nyinaa ne mmerɛboɔ so ntentan no ne sawa mmienu no ne ɛho sradeɛ, na Mose hyee no afɔrebukyia no so.

¹⁷Na nantwinini no ara ne ne nwoma ne ne nam ne n’agyanan no, ɔde ogya hyee, nsraban no akyi, sɛdeɛ AWURADE hyɛɛ Mose no.

¹⁸ Na ɔde ɔhyeɛ afɔdeɛ dwennini no bae, na Aaron ne ne mma de wɔn nsa guu odwennini no atifi.

¹⁹Na ɔkum no, na Mose hwiee mogya no petee afɔrebukyia no so hyiae,

²⁰na ɔtwitwaa odwennini no mu asinasini, na Mose too tire no ne asinasini no ne sradeɛ no mu gya.

²¹Na n’ayamdeɛ ne ne nnyawa no, ɔde nsuo hohoroo ho. Na Mose too odwennini mu no nyinaa mu gya, afɔrebukyia no so; ɔhyeɛ afɔdeɛ a ɛyi hwa hwanhwam ne no, AWURADE gya afɔdeɛ ne no, sɛdeɛ AWURADE hyɛɛ Mose no.

²² Na ɔde odwennini a ɔtɔ so mmienu no, atuhoakyɛ afɔdeɛ dwennini no bae, na Aaron ne ne mma no de wɔn nsa guu odwennini no atifi.

²³Na Mose kumm no, na ɔfaa ne mogya no bi de kaa Aaron aso nifa ano ne ne nsa nifa kokurobetie ne ne nan nifa kokurobetie ano.

²⁴Na ɔde Aaron mma no bae, na Mose de mogya no bi kekaa wɔn aso nifa ano ne wɔn nsa nifa kokurobetie ne wɔn nan nifa kokurobetie ano; na Mose hwiee mogya no petee afɔrebukyia no so hyiae.

²⁵Na ɔfaa sradeɛ no ne sradedua no ne sradeɛ a ɛwɔ ayamdeɛ no ho nyinaa ne mmerɛboɔ so ntentan no ne sawa mmienu no ne ɛho sradeɛ ne srɛ nifa no,

²⁶na ɔfaa apiti kɛntɛn a ɛsi AWURADE anim no mu apiti taterɛ baako ne ngo paanoo taterɛ baako ne ɔfam baako de guu sradeɛ ne srɛ nifa no so,

²⁷na ɔde ne nyinaa hyɛɛ Aaron ne ne mma no nsa, na ɔhim yɛɛ ohim afɔdeɛ, AWURADE anim.

²⁸Na Mose gyee wɔn nsam, na ɔtoo mu gya wɔ afɔrebukyia no so wɔ ɔhyeɛ afɔdeɛ no so de yɛɛ atuhoakyɛ afɔdeɛ a ɛyi hwa hwanhwam; Ɛyɛ ogya afɔdeɛ ma AWURADE.

²⁹Na Mose faa atuhoakyɛ afɔdeɛ dwennini no yan no, na ɔhim yɛɛ ohim afɔdeɛ AWURADE anim; ɛyɛɛ Mose dea, sɛdeɛ AWURADE hyɛɛ Mose no.

³⁰Na Mose faa sra ngo no bi ne afɔrebukyia no so mogya no bi de petee Aaron ne ne ntadeɛ ne ne mma ne ne mma ntadeɛ nyinaa so de dwiraa Aaron ne ne ntadeɛ ne ne mma ne ne mma ntadeɛ no.

³¹Na Mose ka kyerɛɛ Aaron ne ne mma no sɛ: Monnoa nam no ahyiaeɛ ntomadan no ano, na monni no hɔ ara, ɛne atuhoakyɛ afɔdeɛ kɛntɛn no mu paanoo no, sɛdeɛ mehyɛɛ sɛ: Aaron ne ne mma nnie no.

³²Na nam ne paanoo no mu deɛ ɛbɛka no, momfa ogya nhye.

³³Na mommfiri ahyiaeɛ ntomadan no ano nnanson nkɔsi da a mo atuhoakyɛ nna no bɛwie duro, ɛfiri sɛ, nnanson na wɔde rehyɛ mo asɔfoɔ.

³⁴Sɛdeɛ wɔreyɛ no nnɛ da yi no, AWURADE na ɔhyɛɛ sɛ wɔnyɛ mfa mpata mma mo.

³⁵Na montena ahyiaeɛ ntomadan no ano awia ne anadwo nnanson, na monwɛn sɛdeɛ AWURADE ahyɛ no, na moanwuwu, na saa na wɔahyɛ me.

³⁶Na Aaron ne ne mma no dii nsɛm a AWURADE nam Mose so hyɛeɛ no nyinaa so.