Read Twi Asante Lewitikɔs 9 Bible Online

Lewitikɔs 9 - Twi Asante bible

Lewitikɔs 9

¹ Na da a ɛtɔ so nwɔtwe no Mose frɛɛ Aaron ne ne mma no ne Israel mpanimfoɔ,

²na ɔka kyerɛɛ Aaron sɛ: Fa nantwie ba a wode bɛyɛ bɔne ho afɔdeɛ ne odwennini a wode bɛyɛ ɔhyeɛ afɔdeɛ, wɔnni mu, na fa bra AWURADE anim.

³Na Israelfoɔ no nso, kasa kyerɛ wɔn sɛ: Momfa ɔpapo mmɛyɛ bɔne ho afɔdeɛ ne nantwie ba ne odwanten ba a wɔadi afe afe a wɔdi mu mmɛyɛ ɔhyeɛ afɔdeɛ,

⁴ne nantwinini ne odwennini mmɛyɛ asomdwoeɛ afɔdeɛ, na wɔmfa mmɔ afɔdeɛ AWURADE anim ne aduane afɔdeɛ a wɔagu so ngo, ɛfiri sɛ ɛnnɛ na AWURADE bɛyi ne ho akyerɛ mo.

⁵Na wɔde deɛ Mose hyɛeɛ no baa ahyiaeɛ ntomadan no anim, na asafo no nyinaa twe bae bɛgyinaa AWURADE anim.

⁶Na Mose kaa sɛ: Yei ne asɛm a AWURADE hyɛeɛ no, monyɛ, na AWURADE animuonyam nyi ne ho nkyerɛ mo.

⁷ Na Mose ka kyerɛɛ Aaron sɛ: Twe pini afɔrebukyia no ho, na bɔ wo hyeɛ afɔdeɛ ne wo bɔne ho afɔdeɛ, na pata ma wo ho ne ɔman no; na fa ɔman no ayɛyɛdeɛ bra, na pata ma wɔn, sɛdeɛ AWURADE hyɛeɛ no.

⁸Na Aaron twe pinii afɔrebukyia no ho, na ɔkum ne bɔne ho afɔdeɛ nantwie ba no.

⁹Na ne mma no de mogya no kɔmaa no, na ɔde ne nsateaa bɔɔ mogya no mu de kekaa afɔrebukyia no mmɛn ho, na ɔhwiee mogya no petee afɔrebukyia no ase.

¹⁰ Na bɔne ho afɔdeɛ no mu sradeɛ ne sawa ne mmerɛboɔ so ntentan no, ɔtoo mu gya, afɔrebukyia no so, sɛdeɛ AWURADE hyɛɛ Mose no.

¹¹Na ɛnam no ne nwoma no deɛ, ɔde ogya hyee no nsraban no akyi.

¹² Na ɔkumm ɔhyeɛ aboa afɔdeɛ no nso, na Aaron mma no de mogya no brɛɛ no, na ɔhwie petee afɔrebukyia no so hyiae.

¹³Na wɔde ɔhyeɛ afɔdeɛ no asinasini ne ne tiri no brɛɛ no, na ɔhyee no afɔrebukyia no so.

¹⁴Na ɔhohoroo ayamdeɛ ne nnyawa no ho, na ɔhyee no ɔhyeɛ afɔdeɛ a ɛwɔ afɔrebukyia no soɔ no so.

¹⁵Ɛnna ɔde ɔman no afɔdeɛ no baeɛ, na ɔfaa bɔne ho afɔdeɛ papo a ɔyɛ ɔman no deɛ no kumm no de bɔɔ bɔne ho afɔdeɛ sɛ kane deɛ no.

¹⁶Na ɔde ɔhyeɛ afɔdeɛ no bae, na ɔbɛyɛɛ no sɛdeɛ ne yɛbea teɛ no.

¹⁷Na ɔde aduane afɔdeɛ no bae, na ɔfaa emu nsa ma hyee no afɔrebukyia no so kaa anɔpa ɔhyeɛ afɔdeɛ no ho.

¹⁸Ɛnna ɔkumm nantwinini ne odwennini a ɛyɛ ɔman no asomdwoeɛ afɔdeɛ no, na Aaron mma no de mogya no brɛɛ no, na ɔhwie petee afɔrebukyia no so hyiae.

¹⁹Na nantwinini ne odwennini no sradeɛ no, sradedua no ne deɛ ɛkata sawa ho no ne mmerɛboɔ so ntentan no,

²⁰wɔde sradeɛ no nyinaa guu ɔyan no so, na wɔhyee sradeɛ no afɔrebukyia no so.

²¹ Na ɔyan no ne srɛ nifa no, Aaron him de yɛɛ ohim afɔdeɛ, AWURADE anim, sɛdeɛ Mose hyɛeɛ no.

²² Ɛnna Aaron maa ne nsa so kyerɛɛ ɔman no, na ɔhyiraa wɔn. Na ɔbɔɔ bɔne ho afɔdeɛ, ne ɔhyeɛ afɔdeɛ ne asomdwoeɛ afɔdeɛ wieeɛ no, ɔsianee.

²³ Na Mose ne Aaron hyɛnee ahyiaeɛ ntomadan no mu; na wɔfirii adie no, wɔhyiraa ɔman no. Ɛnna AWURADE animuonyam yii ne ho kyerɛɛ ɔman no nyinaa.

²⁴ Na ogya firii AWURADE anim bɛhyee afɔrebukyia no so ɔhyeɛ afɔdeɛ ne sradeɛ no. Na ɔman no nyinaa hunui, na wɔde anigyeɛ huroe, na wɔde wɔn anim butubutuu fam.