Read Twi Asante Yeremia 11 Bible Online

Yeremia 11 - Twi Asante bible

Yeremia 11

¹Asɛm a ɛfiri AWURADE nkyɛn baa Yeremia nkyɛn nie:

²Tie apam yi mu nsɛm, na ka kyerɛ Yuda mmarima ne Yerusalemfoɔ.

³ Ka kyerɛ wɔn sɛ: Sɛ AWURADE, Israel Nyankopɔn, seɛ nie: Wɔadome deɛ ɔnte apam yi mu nsɛm

⁴a mehyɛɛ mo agyanom, da a meyii wɔn firii Misraim asase so, firii dadeɛ fononoo no mu sɛ: Montie me, na monyɛ nnoɔma a mahyɛ mo no nyinaa, na moayɛ me ɔman, na me nso mayɛ mo Onyankopɔn,

⁵ na mama ntam a mekaa mo agyanom no agyina, sɛ mede asase a nufosuo ne ɛwoɔ sene wɔ soɔ bɛma wɔn, sɛdeɛ ɛteɛ nnɛ yi. Na megyee so sɛ: Amen, AWURADE!

⁶Na AWURADE ka kyerɛɛ me sɛ: Pae mu ka nsɛm yi nyinaa mu ka wɔ Yuda nkuro ne Yerusalem mmorɔno so sɛ: Montie apam yi mu nsɛm, na monni so.

⁷Ɛfiri sɛ, mehyɛɛ mo agyanom da a meyii wɔn firii Misraim asase so baeɛ, na ɛde bɛsi nnɛ, metua nhema mehyɛ wɔn daa sɛ: Montie me!

⁸ Nanso wɔantie, na wɔammrɛ wɔn aso ase, na wɔn nyinaa dii wɔn akoma bɔne denyɛ so; enti mede apam yi a mehyɛɛ wɔn sɛ wɔnni soɔ na wɔanni soɔ no nsɛm nyinaa aba wɔn so.

⁹Na AWURADE ka kyerɛɛ me sɛ: Atuateɛ aba Yuda mmarima ne Yerusalemfoɔ mu,

¹⁰wɔasane kɔ wɔn tete agyanom a wɔampɛ sɛ wɔtie me nsɛm no amumuyɛ mu, na wɔdi anyame foforɔ akyi som wɔn. Israel fie ne Yuda fie ato m’apam a me ne wɔn agyanom pameeɛ no.

¹¹ Enti sɛ AWURADE seɛ nie: Hwɛ, mede bɔne a wɔrentumi mfiri mu reba wɔn so, na sɛ wɔsu frɛ me a, merentie wɔn.

¹² Ɛnna Yuda nkuro ne Yerusalemfoɔ bɛkɔ akɔsu afrɛ anyame a wɔrehye nnuhwam ama wɔn no, nanso wɔrennye wɔn, wɔn amanehunu berɛ no mu.

¹³Na sɛdeɛ wo nkuro dodoɔ teɛ no, sɛdeɛ w’anyame nso dodoɔ teɛ ne no, O Yuda; na sɛ Yerusalem mmorɔno dodoɔ teɛ no, saa ara na moasisi afɔrebukyia ama aniwudeɛ, afɔremmukyia a mohye so nnuhwam ma Baal.

¹⁴ Enti wo deɛ, mpa kyɛw mma ɔman yi, na mma wɔn ho su ne mpaebɔ so, ɛfiri sɛ wɔn amanehunu berɛ no mu, wɔsu frɛ me a, merentie.

¹⁵Me dɔfo adi asɛmmɔne yi, ɛdeɛn na ɔwɔ yɛ wɔ me fie? Bɔhyɛ ne afɔrebɔ nam bɛyi wo mmusuo no anaa? Sɛ w’amaneɛ no ba a, wobɛdi ahurisie?

¹⁶Anka AWURADE frɛ wo ngodua frɔmfrɔm fɛfɛ a ɛso aba pa; nanso afei ɔde ahum kɛseɛ huuyɛ asɔ ne ho gya, na abubu ne mman.

¹⁷Na asafo AWURADE a ɔtɛɛ woɔ no akyerɛ mmusuo a ɛreba wo soɔ, bɔne a Israel fie ne Yuda fie ayeyɛ, sɛ wɔhyee aduhwam maa Baal de huruu me boɔ no nti.

¹⁸Na AWURADE yi kyerɛɛ me, na mehunui nso; ɛno mu na wokyerɛɛ me wɔn nneyɛɛ bɔne.

¹⁹ Nanso me deɛ, na mete sɛ odwammaa a ɔdwoɔ a wɔde no rekɔ akumiiɛ; na mennim sɛ wɔapam me tiri so sɛ: Momma yɛnsɛe dua no ne n’aba, na yɛntwa mfiri ateasefoɔ asase so, na wɔankae ne din bio.

²⁰ Nanso wo Asafo AWURADE a woyɛ ɔtemmufoɔ teneneeni, a wosɔ akoma ne adwene hwɛ, ma menhunu w’aweretɔ wɔ wɔn so, na wo na mede m’asɛm ahyɛ wo nsa.

²¹ Enti sɛ AWURADE ka no Anatot mmarima a wɔrehwehwɛ wo akum woɔ, na wɔka sɛ: Nhyɛ AWURADE din mu nkɔm na woanwu yɛn nsa ano, no ho nie,

²²ɛno nti sɛ asafo AWURADE seɛ nie: Hwɛ, merebɛtwe wɔn aso: Mmeranteɛ bɛtotɔ afena ano, na ɛkɔm akunkum wɔn mmammarima ne wɔn mmammaa,

²³na nkaeɛ biara renka mma wɔn, na mede bɔne bɛba Anatot mmarima so, wɔn asotwe afe no mu.