Read Twi Asante Yeremia 18 Bible Online

Yeremia 18 - Twi Asante bible

Yeremia 18

¹Asɛm a ɛfiri AWURADE nkyɛn baa Yeremia nkyɛn nie:

²Sɔre siane kɔ ɔnwonfoɔ fie, na mɛma woate me nsɛm hɔ.

³Ɛnna mesiane kɔɔ ɔnwomfoɔ fie, na hwɛ, na ɔreyɛ n’aboɔ so adwuma.

⁴Na kukuo a ɔreyɛ no sɛee, sɛ ɔnwomfoɔ nsam dɔteɛ, na ɔsane de yɛɛ ade foforɔ, sɛdeɛ ɛtene ɔnwomfoɔ no ani soɔ sɛ ɔbɛyɛ no.

⁵Ɛnna AWURADE asɛm baa me nkyɛn sɛ:

⁶ Merentumi nyɛ mo, Israel fie, sɛ ɔnwomfoɔ yi anaa? AWURADE asɛm nie. Hwɛ, sɛdeɛ dɔteɛ teɛ wɔ ɔnwomfoɔ nsam no, saa ara na mo, Israel fie, nso moteɛ wɔ me nsam.

⁷ Sɛ meka wɔ ɔman anaa ahennie bi ho, sɛ mɛtu na madwerɛ na masɛe no,

⁸ na sɛ ɔman no sane firi ne bɔne a mekaa ho asɛm no mu a, ɛnneɛ mɛnu me ho adebɔne a mesusuu sɛ mɛyɛ wɔn no ho.

⁹Na sɛ meka wɔ ɔman anaa ahennie bi ho, sɛ mede bɛsi hɔ na matɛ.

¹⁰Na sɛ wɔyɛ m’ani so bɔne, antie me a, ɛnneɛ mɛnu me ho, yie a mekaa sɛ mɛyɛ wɔn no ho.

¹¹ Na afei ka kyerɛ Yuda mmarima ne Yerusalemfoɔ sɛ: Sɛ AWURADE seɛ nie: Hwɛ, meredwene mo ho bɔne, na mapam mo ho apam. Mo nyinaa monsane mo akyi mfiri mo kwammɔne so, na momma mo akwan ne mo nneyɛɛ nyɛ yie ɛ!

¹² Na wɔbɛka sɛ: Ɔkwa! Na mmom yɛbɛdi yɛn tirim asɛm akyi, na yɛayeyɛ yɛn akoma bɔne denyɛ no ho adeɛ.

¹³Enti sɛ AWURADE seɛ nie: Monkɔbisa amanaman no mu ɛ, hwan na wate saa adeɛ yi bi pɛn? Ahodwirideɛ pa ara na Israel ababaa no ayɛ.

¹⁴Lebanon sukyerɛmma pa Sirion abotan no so? Amannɔne nsuwansuwa wiridudu a ɛsene no bɛwe anaa?

¹⁵Na me man werɛ afiri me, wɔahye aduhwam ama abosom hunu, na wɔmaa wɔsuntisuntii wɔn akwan so, wɔ teteete atempɔn so, sɛ wɔnnante akwan a ɛnyɛ akwammɔeɛ so.

¹⁶Sɛ wɔnnane wɔn asase no amamfo ne daa fɛdie adeɛ. Obiara a ɔbɛtwam hɔnom no ho bɛdwiri no, na wawoso ne ti.

¹⁷ Mɛyɛ sɛ apueeɛ mframa mabɔ wɔn mapete wɔn atamfoɔ anim, m’akyiri mmom, na ɛnyɛ m’anim, na mede bɛkyerɛ wɔn, wɔn sɛeɛ da no.

¹⁸Na wɔkaa sɛ: Mommra mma yɛnkɔpam Yeremia tiri so, na mmara renyera mfiri ɔsɔfoɔ hɔ, na afotuo rempa onyansafoɔ anomu, na asɛm remmɔ odiyifoɔ. Mommra mma yɛmfa tɛkyerɛma nkum no, na mommma yɛnnyɛ aso nntie ne nsɛm no biara.

¹⁹Yɛ aso ma me ɛ, O AWURADE, na tie wɔn a wɔne me ham no.

²⁰ Wɔmfa bɔne nhyɛ papa ananmu anaa? Nso wɔatu amena ama me kra. Kae sɛdeɛ megyinaa w’anim sɛ meresrɛ papa ama wɔn, sɛ meresane w’abufuo afiri wɔn soɔ no.

²¹Enti yiyi wɔn mma ma ɛkɔm, na yi wɔn to afena ano, na wɔn yerenom nni mmasugya na wɔnnanedane akunafoɔ, na owuyadeɛ nkum wɔn mmarima, na wɔmfa afena nkum wɔn mmeranteɛ ɛdɔm ano.

²²Ma wɔnte esu nka mfiri wɔn afie mu, berɛ a wode asafo bi bɛba wɔn so mpofirim no, ɛfiri sɛ wɔabɔ amena sɛ wɔde reyi me, na wasunsum me nan fidie.

²³ Na wo, AWURADE, wonim wɔn agyina a wɔkɔ no me ho repɛ me wuo no nyinaa. Nkata wɔn amumuyɛ so, na mpepa wɔn bɔne mfiri w’anim, ma wɔnhwehwe ase w’anim; w’abufuo berɛ mu na ɛne wɔn nnie.