Read Twi Asante Yeremia 28 Bible Online

Yeremia 28 - Twi Asante bible

Yeremia 28

¹Na afe no ara mu, Yudahene Sedekia ahennie mfitiaseɛ afe a ɛtɔ so nnan no bosome a ɛtɔ so nnum so, Asur ba Odiyifoɔ Hanania a ɔfiri Gibeon no ka kyerɛɛ me wɔ AWURADE fie, asɔfoɔ ne ɔman no nyinaa anim sɛ:

²Sɛ asafo AWURADE, Israel Nyankopɔn seɛ nie: Mabubu Babel hene kɔnnua no,

³ ɛha mfirinhyia mmienu pɛ, mede AWURADE fie nnoɔma a Babelhene Nebukadnessar bɛfa firii ha yi de kɔɔ Babel no nyinaa bɛsane aba ha bio.

⁴ Na Yudahene Yekonia a ɔyɛ Yehoiakim ba ne Yuda atukɔfoɔ a wɔkɔɔ Babel no nyinaa, mede wɔn bɛsane aba ha yi bio, AWURADE asɛm nie, na mɛbubu Babel hene kɔnnua no.

⁵Na Odiyifoɔ Yeremia ka kyerɛɛ Odiyifoɔ Hanania, asɔfoɔ no ne ɔman a wɔgyinagyina AWURADE fie no nyinaa anim,

⁶na Odiyifoɔ Yeremia kaa sɛ: Amen, AWURADE ma no nyɛ saa! AWURADE mma wo nsɛm a worehyɛ nkɔm sɛ wɔde AWURADE fie nnoɔma ne atukɔfoɔ nyinaa bɛfiri Babel asane aba ɛha yi no mmra mu.

⁷Nanso tie asɛm a mereka wo ne ɔman no nyinaa aso mu yi ɛ:

⁸Adiyifoɔ a wɔdii m’anim ne w’anim firi teteete no, wɔhyehyɛɛ nsase bebree ne ahennie akɛseɛ akodie ne bɔne ne owuyadeɛ ho nkɔm.

⁹Odiyifoɔ a ɔhyɛ asomdwoeɛ ho nkɔm no, sɛ odiyifoɔ no asɛm nya ba mu a, ɛno na wɔhunu odiyifoɔ a AWURADE somaa no nokorɛ mu.

¹⁰ Ɛnna Odiyifoɔ Hanania yii kɔnnua no firii Odiyifoɔ Yeremia kɔn mu bubuu mu.

¹¹ Na Hanania kaa no ɔman no nyinaa anim sɛ: Sɛ AWURADE seɛ nie: Saa ara na mɛbubu Babelhene Nebukadnessar kɔnnua no afiri amanaman nyinaa kɔn mu, ɛha mfeɛ mmienu pɛ! Na Yeremia sii mu kɔɔ ne kwan.

¹²Na Odiyifoɔ Hanania bubuu kɔnnua no firii Odiyifoɔ Yeremia kɔn mu no akyiri no, AWURADE asɛm baa Yeremia nkyɛn sɛ:

¹³Kɔ na kɔka kyerɛ Hanania sɛ: Sɛ AWURADE seɛ nie: Dua kɔnnua na woabubu mu, na mɛyɛ dadeɛ kɔnnua asi ananmu.

¹⁴ Na sɛ asafo AWURADE, Israel Nyankopɔn seɛ nie: Dadeɛ kɔnnua na mede mato amanaman yi nyinaa kɔn mu, sɛ wɔnsom Babelhene Nebukadnessar; nso wɔbɛsom no, na mede wiram mmoa mpo mama no.

¹⁵Na Odiyifoɔ Yeremia ka kyerɛɛ Odiyifoɔ Hanania sɛ: Hanania, tie ɛ, AWURADE nsomaa wo, na wo na woama ɔman yi de wɔn ho ato atorɔ soɔ.

¹⁶ Ɛno nti, sɛ AWURADE seɛ nie: Hwɛ, meretu wo afiri asase ani: Afe yi na wobɛwuo, ɛfiri sɛ woaka atuateɛ atia AWURADE.

¹⁷Na Odiyifoɔ Hanania wuu afe no ara mu bosome a ɛtɔ so nson no mu.