Read Twi Asante Yeremia 6 Bible Online

Yeremia 6 - Twi Asante bible

Yeremia 6

¹ O Benyamin mma, mommɔ mo ho adwaa mfiri Yerusalem! Na monhyɛne totorobɛnto wɔ Tekoa, na monsi frankaa Bet-hakerem! na adebɔne bi ne ɔsɛeɛ kɛseɛ repue afiri atifi fam.

²Ɔhoɔfɛni a ɔdɔ ne ho no, Sion babaa no, mɛtwa no atwene.

³ Mmoahwɛfoɔ ne wɔn mmoakuo bɛba ne so; wɔbɛsisi wɔn ntomadan atwa ne ho ahyia, na wɔn mu biara adidi n’afa.

⁴Monkyere ne so ɔsa, monsɔre mma yɛnkɔtoa no awia ketee. Yɛnnue, na adeɛ resa, na anwummerɛ sunsum mu atwe.

⁵Monsɔre mma yɛnkɔtoa no anadwo, na yɛnkɔsɛe n’ahemfie no.

⁶ Na sɛ asafo AWURADE seɛ nie: Mommu Yerusalem nnua ngu, na monhɔre ho epie, ɛyɛ kuro a ɛsɛ asotwe, amimdie nko ara na ɛwɔ mu.

⁷Sɛdeɛ asubura mu nsuo pu ba no, sɛ ne bɔne nso pu ba ne no; wɔte atirimuɔden ne nhyɛsoɔ nka wɔ mu, yadeɛ ne akuro wɔ m’anim daa.

⁸O, Yerusalem, ma wɔnkyerɛkyerɛ wo, na me kra antwe amfiri wo ho, na mamma woannane amamfo, asase a obiara nte soɔ.

⁹Sɛ asafo AWURADE seɛ nie: Wɔbɛdi Israel nkaeɛ ho mpɛpɛ sɛ obobe ho. Himahima wo nsa kɔ nkɛntɛn mu sɛ obobe abatefoɔ.

¹⁰Hwan na menkasa menkyerɛ no, na memmɔ no kɔkɔ, na wɔate? Hwɛ, wɔn aso asisi, na wɔntumi ntie asɛm; hwɛ, AWURADE asɛm adane wɔn ahohoradeɛ, ɛnyɛ wɔn dɛ.

¹¹Enti AWURADE abufuhyeɛ ahyɛ me ma, mabrɛ ne me ho so hyɛ: Hwie gu mmorɔno so mmotafowa ne mmeranteɛ asafo no nyinaa so; na wɔbɛkyere okunu ne ɔyere nyinaa, akɔkoraa ne deɛ wadi nna ameeɛ.

¹²Na wɔn afie bɛyɛ afoforɔ deɛ, nsase ne yerenom nyinaa, ɛfiri sɛ mɛtene me nsa maka asase no sofoɔ, AWURADE asɛm nie.

¹³ Na ɛfiri wɔn mu akumaa so kɔsi wɔn mu ɔkɛseɛ soɔ, wɔn nyinaa yɛ adifudepɛfoɔ, na ɛfiri odiyifoɔ so kɔsi ɔsɔfoɔ soɔ, wɔn nyinaa yɛ nkontompofoɔ.

¹⁴ Na wɔasa me man kuro adwenhare so aka sɛ: Asomdwoeɛ, asomdwoeɛ! Nso asomdwoeɛ nni hɔ.

¹⁵Wɔn ani wuu akyiwadeɛ a wɔyɛeɛ no ho? Dabi, wɔn ani anwu koraa, na wɔn anim nso ansiam: Saa nti wɔbɛtotɔ atɔfoɔ mu, berɛ a mɛba mabɛtwe wɔn aso no, wɔbɛhwehwe ase, AWURADE na ɔseɛ.

¹⁶ Sɛ AWURADE seɛ nie: Monkɔgyina akwan so na monhwɛ, na mommisa tete atempɔn no, deɛ ɔkwan pa no wɔ, na momfa so, na monnya home mma mo kra. Nanso wɔse: Yɛremfa so.

¹⁷ Na masisi mo so awɛmfoɔ sɛ: Monyɛ aso mma totorobɛnto hyɛne no. Nanso wɔse: Yɛrentie.

¹⁸Ɛno nti, amanaman, montie, na mo asafo, monhunu deɛ ɛrebɛyɛ wɔn.

¹⁹ Asase, tie, hwɛ, me na mede bɔne mereba ɔman yi soɔ, wɔn nneyɛɛ so aba no, ɛfiri sɛ wɔanyɛ aso amma me nsɛm, na me mmara nso, wɔapo.

²⁰ Ɛdeɛn na oduhwamfufuo a wɔde firi Seba ba ne ahwedeɛ pa a ɛfiri akyirikyiri asase soɔ no yɛ ma me? Mo hyeɛ afɔdeɛ nsɔ m’ani na mo kum afɔdeɛ nyɛ me dɛ.

²¹Enti sɛ AWURADE seɛ nie: Hwɛ, mede suntidua mɛto ɔman yi anim, na wɔasuntisunti wɔ so, agyanom ne mma nyinaa, na fipamni ne ɔyɔnko ayera.

²² Sɛ AWURADE seɛ nie: Hwɛ, ɔman bi firi atifi fam asase so reba, na ɔman kɛseɛ bi akanyan ne ho firi asase anoano tɔnn,

²³ wɔkurakura tadua ne pɛmɛ, wɔn tirim yɛ den na wɔnni atimmɔborɔ; wɔn nne te sɛ ɛpo huuyɛ, na wɔtete apɔnkɔ so; wɔamia sɛ akofoɔ, sɛ wɔne wo, Sion babaa, rebɛko.

²⁴Yɛate wɔn nka, yɛn nsam ago, yɛn ho yera yɛn, sɛ ɔbaa a ɔreko awoɔ.

²⁵Mfiri adi nkɔ wiram, na nnante ɔkwan so; na ɔtamfoɔ kura afena, ehu atwa wo ho ahyia.

²⁶ O me man babaa, fira ayitoma na yantam nso mu; twa adwo a ɛte sɛ ɔbakorɔ ho deɛ, twa agyaadwo a ɛyɛ ya, ɛfiri sɛ mpofirim na ɔsɛefoɔ bɛba yɛn soɔ.

²⁷Mede wo masi me man a ɛyɛ sikatwa boɔ so twahwɛfoɔ, sɛ hunu na sɔ wɔn akwan hwɛ.

²⁸ Wɔn nyinaa yɛ asoɔdenfoɔ atuatefoɔ, wɔnenam di nsekuro, wɔyɛ kɔbere mfrafraeɛ ne dadeɛ ara nko; wɔn nyinaa yɛ nkontompofoɔ.

²⁹Afa rehu dendeenden, ogya rehye sumpii; wɔbere ho kwa, ɛfiri sɛ wɔnyii abɔnefoɔ mfirii wɔn mu.

³⁰ Wɔfrɛ wɔn dwetɛ a wɔapoɔ, ɛfiri sɛ AWURADE apo wɔn.