Read Twi Asante Yeremia 8 Bible Online

Yeremia 8 - Twi Asante bible

Yeremia 8

¹Ɛberɛ no mu no, AWURADE asɛm nie, wɔbɛsa Yuda ahemfo nnompe, n’asafohene nnompe, asɔfoɔ nnompe, adiyifoɔ nnompe ne Yerusalemfoɔ nnompe afiri wɔn adamena mu,

² na wɔahata wɔn owia ne ɔsrane ne ɔsoro asafo nyinaa a wɔdɔɔ wɔn, na wɔsomm wɔn, na wɔdii akyire na wɔpɛɛ akyiri kwan na wɔsɔree wɔn no anim. Wɔremmoa ano, na wɔrenkora, ɛbɛyɛ sumina wɔ asase ani.

³Na abusua bɔne yi mu nkaeɛ a wɔbɛka nyinaa bɛpɛ owuo asene nkwa, wɔ baabiara a metuu wɔn mekɔeɛ no, asafo AWURADE asɛm nie.

⁴Na ka kyerɛ wɔn sɛ: Sɛ AWURADE seɛ nie: Wɔhwe ase a, wɔnsan nsɔre bio anaa? Anaasɛ wɔmane kɔ a, wɔnsane mma?

⁵Ɛdeɛn nti na Yerusalem man yi amane a wɔnsane da? Wɔkura nnaadaa kwan mu pintinn, wɔmpɛ sɛ wɔsane ba.

⁶Mawɛn m’aso matie, nso deɛ ɛntene na wɔka. Obiara nni hɔ a ɔnu ne ho wɔ ne bɔne ho ka sɛ: Ɛdeɛn na mayɛ yi? Obiara asi ne kwan so sɛ ɔpɔnkɔ a ɔrebɔ ahyia dɔm.

⁷ Asukɔnkɔn a ɔwɔ wiem mpo nim ne berɛ, anyankuku, asomfenakatakyi ne nantwinoma wɛn wɔn ba berɛ, nanso me man deɛ wɔnnim AWURADE ahyɛdeɛ.

⁸Nanso na moka sɛ: Yɛyɛ anyansafoɔ, AWURADE mmara wɔ yɛn hɔ? Ampa, hwɛ, atwerɛfoɔ pɛnsere torofoɔ ama no adane atorɔ.

⁹Anyansafoɔ ani bɛwu, wɔbɛbɔ binim na wɔakye wɔn. Hwɛ, AWURADE asɛm na wɔapoɔ yi, na nyansa bɛn na wɔwɔ?

¹⁰ Ɛno nti mede wɔn yerenom bɛma afoforɔ, na mama ahɔhoɔ afa wɔn mfuo atena so, ɛfiri sɛ ɛfiri akumaa so kɔsi ɔkɛseɛ soɔ wɔn nyinaa yɛ adifudepɛfoɔ, ɛfiri odiyifoɔ so kɔsi ɔsɔfoɔ soɔ, wɔn nyinaa yɛ nkontompofoɔ.

¹¹Na wɔsaa me man kuro adwenhare so sɛ: Asomdwoeɛ, asomdwoeɛ! Nso asomdwoeɛ nni hɔ.

¹²Wɔn ani wuu akyiwadeɛ a wɔyɛeɛ no ho? Dabi, wɔn ani anwu koraa, na wɔn anim nso ansiam. Saa nti wɔbɛtotɔ atɔfoɔ mu, berɛ a mɛba abɛtwe wɔn aso no, wɔbɛhwehwe ase, AWURADE na ɔseɛ.

¹³Berɛ a mɛsesa wɔn akorɔ no, AWURADE asɛm nie, wɔrenhunu esia esia bobe ho, anaa borɔdɔma wɔ borɔdɔma nnua so, na ahahan mpo adwinnwan, na deɛ mede memaa wɔn no afiri wɔn nsa.

¹⁴ Yɛda so tete hɔ reyɛ dɛn? Mommoaboa mo ho ano, na yɛnhyɛne nkuro a ɛyɛ den mu, na yɛnkɔwuwu wɔ hɔ, na AWURADE yɛn Nyankopɔn adome yɛn ama owuo, na wama yɛn nsuo a borɔ wɔ mu anom, ɛfiri sɛ yɛayɛ AWURADE bɔne.

¹⁵ Yɛhwɛɛ asomdwoeɛ kwan, nso biribi pa biara amma, ne ɔyaresa berɛ nso, na hwɛ, akomatuo nko.

¹⁶Wɔte wɔn apɔnkɔ home foofoo firi Dan. Wɔn apɔnkɔnini su dede nti asase no nyinaa woso; ɛfiri sɛ wɔreba abɛdi asase ne ɛso adeɛ nyinaa, nkuro ne wɔn a wɔte mu.

¹⁷ Na hwɛ, merema awɔ, nhuritia a ntafowayie biara ntumi wɔn aba mo mu, na wɔabɛkeka mo, AWURADE asɛm nie.

¹⁸ Mennya m’awerɛhoɔ mu awerɛkyekyerɛ, m’akoma aboto wɔ me mu.

¹⁹Tie, me man babaa sufrɛ nne firi akyirikyiri asase so: AWURADE nni Sion, anaasɛ ne hene no nni mu bio? Ɛdeɛn nti na wɔde wɔn ahoni ne amannɔne abosom no ahuru me boɔ?

²⁰Twaberɛ atwam, aduabateɛberɛ asa, na yɛn deɛ, wɔnnyee yɛn.

²¹Me man babaa kuro nti mayɛ siamoo, mayɛ kusuu, ahodwirie akuta me.

²² Aduhwam biara nni Gilead, anaasɛ ɔyaresafoɔ biara nni hɔ? Na adɛn nti na wɔnnya nsaa me man babaa no yadeɛ?