Read Twi Asante Hesekiel 16 Bible Online

Hesekiel 16 - Twi Asante bible

Hesekiel 16

²Onipa ba, ma Yerusalem nhunu n’akyiwadeɛ no,

³na ka sɛ: Sɛ AWURADE Nyankopɔn ka kyerɛ Yerusalem nie: W’ase ne w’awoɔ asase ne Kanafoɔ asase so, w’agya yɛ Amorini, na wo na yɛ Hetini.

⁴Na w’awoɔ mu deɛ, da a wɔwoo woɔ no, wɔantwa wo funuma, na wɔamfa nsuo annware wo amma wo ho amfi, nkyene nso wɔamfa ansra wo, na wɔamfa ntoma ankyekyere wo.

⁵Obiara yam anhyehye no amma wo anyɛ wo yeinom mu biara amfa anhu wo mmɔbɔ, na wɔtoo wo twenee ɛserɛ so, too wo kra ho pe, da a wɔwoo woɔ no.

⁶Ɛnna mebɛsianee wo ho na mehunuu woɔ, sɛ wɔabɔ wo adapaa, wo mogya mu, na meka mekyerɛɛ wo, wo mogya no mu, sɛ: Nya nkwa!

⁷Meyɛɛ wo dodoɔ pɛnhunuano sɛ wiram mfefɛeɛ, na wodɔre yɛɛ kɛseɛ, na w’ahoɔfɛ boroo so, wo mpokua bobɔe na wo nwi fui; nanso na woda adagya, nam kwaterekwa.

⁸ Na mebɛsianee wo ho na mehunuu wo, na hwɛ, ɛyɛ wo berɛ, ɔdɔ berɛ; na mede me ntaban metrɛɛ wo so, na mekataa w’adagya so, na mekaa wo ntam, na me ne wo yɛɛ apam, AWURADE Nyankopɔn asɛm nie, na woyɛɛ me deɛ.

⁹Na mede nsuo dwaree wo, na mehohoroo wo ho mogya no, na mesraa wo ngo;

¹⁰na mede atadeɛ a wɔadi mu adwini hyɛɛ wo, na mede sukraman nwoma mpaboa hyɛɛ wo, na mede nwera pa kyekyeree wo, na mede serekye ntoma kataa wo ho;

¹¹na mede ahyehyɛdeɛ hyehyɛɛ wo, na mede nkapo hyehyɛɛ wo nsa, na mede nkɔnmuadeɛ guu wo kɔn mu,

¹²na mede adwinneɛ hyɛɛ wo hwene mu, na mede asomuadeɛ hyehyɛɛ wo, na mede abotire fɛfɛ bɔɔ wo.

¹³Na wɔde sika ne dwetɛ hyehyɛɛ wo ho, na wo ntadeɛ yɛ nwera pa ne serekye ne nkyeremu; esiam ne ɛwoɔ ne ngo na wodiiɛ, na wo ho yɛɛ fɛ pa ara, na wodii yie kɔduruu ahennie mu.

¹⁴ Na w’ahoɔfɛ nti wo din trɛtrɛ kɔɔ amanaman mu, ɛfiri sɛ m’animuonyam a mede hyɛɛ woɔ no maa no wiee fɛyɛ, AWURADE Nyankopɔn asɛm nie.

¹⁵ Nanso wode wo ho too w’ahoɔfɛ so, na wobɔɔ adwaman guu wo din so, na wohwiee w’adwamammɔ guu obiara a ɔretwam so; ne no daeɛ.

¹⁶Na wofaa wo ntadeɛ no bi de yɛɛ nsaasaawa wɔ sorɔnsorɔmmea hɔ fae, na wobɔɔ so adwaman, nnoɔma a ɛte saa bi mmaa da, ɛrenyɛ saa nso.

¹⁷Na wofaa wo nnwinneɛ fɛfɛ no, me sika ne me dwetɛ a memaa woɔ no bi, na wode yɛɛ mmarima ahoni fae, na wode bɔɔ adwaman;

¹⁸na wode wo nkyeremu ntadeɛ kataa wɔn ho, na wode me ngo ne m’aduhwam sisii wɔn anim.

¹⁹Na m’aduane a memaa woɔ, esiam ne ngo ne ɛwoɔ a mede meyɛnee woɔ no, wode sisii wɔn anim sɛ ɛnyi hwa hwamhwam. Deɛ ɛyɛeɛ nie, AWURADE Nyankopɔn asɛm nie.

²⁰ Na wofaa wo mmabanin ne wo mmammaa a wowo maa me no de wɔn bobɔɔ afɔdeɛ maa wɔn sɛ wɔnni. W’adwamammɔ yɛ ade ketewa,

²¹sɛ wokunkumm me mma na woyii wɔn maeɛ maa wɔfaa ogya mu maa wɔn no?

²² Na w’akyiwadeɛ ne w’adwamanneɛ nyinaa mu no, woankae wo mmabaaberɛ nna no a na woda adagya na wonnam kwaterekwa bɔ wo ho adapaa, wo mogya mu no.

²³Na wo nnebɔne nyinaa akyiri no, wo ara, (due, due! AWURADE Nyankopɔn asɛm nie),

²⁴wotoo dampan faeɛ na woyɛɛ pampa faeɛ, mmɔntene nyinaa soɔ.

²⁵Nkwantia nyinaa wotoo wo pampa, na woguu w’ahoɔfɛ no ho fi, na wobaee w’ananmu maa obiara a ɔsene, na womaa w’adwamammɔ dɔɔso.

²⁶Na wo ne Misraim mma a wɔte wo ho a wɔn honam soso no bɔɔ adwaman, na womaa w’adwamammɔ dɔɔso de huruu me bo.

²⁷Na hwɛ, wo so na metenee me nsa, na metee w’aduane a mehyɛeɛ soɔ, na meyii wo mae sɛ w’atamfo, Filistifoɔ mmammaa a wɔn ani wuu w’ahohwibɔ ho no pɛ no.

²⁸Nso wo ne Asiria mma bɔɔ adwaman, ɛfiri sɛ na wommee. Na wo ne wɔn bɔɔ adwaman, nanso woammee.

²⁹Nso womaa w’adwamammɔ dɔɔso kɔduruu Kanaan asase a ɛne Kaldea, na yei nso ammee wo.

³⁰Sɛdeɛ w’akoma asi ahodwo afa, AWURADE Nyankopɔn asɛm nie, sɛ wɔyɛɛ yeinom a ɛyɛ ɔbaa dwamamfoɔ a ɔso ne tire no nneyɛɛ no nyinaa!

³¹ Wotoo wo dampan, akwan nyinaa tia, na woyɛɛ pampa, mmɔntene nyinaa soɔ no, woanyɛ sɛ odwamamfoɔ mpo, ɛne sɛ wopoo apɛdeɛ.

³²Ɛyerɛ a ɔsɛe awadeɛ, ɔfa ananafoɔ si ne kunu ananmu.

³³Nnwamamfoɔ nyinaa, wɔma wɔn akyɛdeɛ, na wo deɛ, wode w’akyɛdeɛ kyekyɛ w’adɔfoɔ nyinaa, na woma wɔn adanmudeɛ, sɛ wɔmfiri mmaa nyinaa mmra wo nkyɛn adwamammɔ.

³⁴Enti wo deɛ, woyɛ sononko wɔ mmaa a aka no wɔ adwamammɔ mu: Sɛ obi nhyɛ da mmɛpɛ wo ne wo mmɔ adwaman, na wo na woma apɛdeɛ; na wo deɛ, obi mma wo apɛdeɛ, enti na woyɛ sononko no.

³⁵Ɛno nti, odwamamfoɔ, tie AWURADE asɛm!

³⁶Sɛ AWURADE Nyankopɔn seɛ nie: Ɛsiane sɛ wɔhwiee wo ho fi guiɛ, na wɔayi w’adagya soɔ, w’adwamammɔ mu, ama w’akyiwadeɛ abosonhunu no nyinaa ne wo mma a wode wɔn maa wɔn no mogya nti,

³⁷ hwɛ, merehyiahyia w’adɔfo a woafam wɔn ho no nyinaa ne wɔn a woadɔ wɔn nyinaa mabɔ wɔn a woatane wɔn no nyinaa so. Ɛfiri afa nyinaa na maboaboa wɔn ano atia wo, na mayi w’adagya adi akyerɛ wɔn, na wɔahunu w’adagya nyinaa.

³⁸Na mede mmaa awaresɛefoɔ ne mogyakagufoɔ atemmudeɛ bɛbu wo atɛn, na mayɛ wo abufuhyeɛ ne ninkuntwe mogya,

³⁹na mede wo ahyɛ wɔn nsa, na wɔadwiri wo dampan, na wɔaburi wo mpampa, na wɔaworɔ wo ho ntadeɛ, na wɔafa wo nnwinneɛ fɛfɛ no, na wɔagya wo adagya ne kwaterekwa mu,

⁴⁰na wɔama wɔabɛbɔ wo so dwa, na wɔasi wo aboɔ, na wɔde wɔn nkrantɛ atwitwa wo mu,

⁴¹na wɔde ogya ahye w’adan, na wɔde w’atemmuo mu adeɛ ayɛ wo, mmaa bebree ani so, na mama woagyae adwamammɔ; na akyɛdeɛ nso, worenkyɛ bio.

⁴² Na mɛma m’abufuhyeɛ no adwo wɔ wo ho, na me ninkuntwe afiri wo so, na mɛyɛ komm a me bo renhuru bio.

⁴³Ɛsiane sɛ wonkaee wo mmabaaberɛ mu nna no, na wode yeinom ha me nti, na me nso, hwɛ, mede w’abrabɔ bua w’atifi, AWURADE Nyankopɔn asɛm nie, na mammɔ w’akyiwadeɛ nyinaa so mmusuo.

⁴⁴Hwɛ, obiara a ɔbubu mmɛ no bɛbu wo ho bɛ yi sɛ: Sɛdeɛ ɛna teɛ na ne ba teɛ.

⁴⁵ Wo ne wo na a ɔpo ne kunu ne ne mma no ba, na wo ne nuammaanom a wɔpo wɔn kununom ne wɔn mma no nuabaa; mo na yɛ Hetini, na mo agya yɛ Amorini.

⁴⁶ Na wo nuabaa panin ne Samaria, ɔno ne ne mmammaa a wɔte wo benkum soɔ no, na wo nuabaa kumaa a ɔte wo nifa soɔ ne Sodom ne ne mmammaa.

⁴⁷Nso woamfa wɔn akwan so na wɔyɛɛ wɔn akyiwadeɛ no nko, na mmom ɛyɛɛ kakraa bi pɛ, na wosɛe senee wɔn, w’akwan nyinaa so.

⁴⁸Sɛ mete aseɛ yi, AWURADE Nyankopɔn asɛm nie, ampa, wo nuabaa Sodom ne ne mmammaa anyɛ sɛdeɛ wo ne wo mmammaa ayɛ yi.

⁴⁹Hwɛ, yei ne wo nuabaa Sodom amumuyɛ no: Ahantan, adidimeeɛ ne yiedie dwoodwoo mu na ɔno ne ne mmammaa tenaeɛ, na mmɔborɔni ne ohiani nsa deɛ, wansɔ mu;

⁵⁰ na wɔyɛɛ ahantan yɛɛ akyiwadeɛ wɔ m’anim, na meyii wɔn hɔ sɛdeɛ me ara mepɛ.

⁵¹Na Samaria anyɛ wo bɔne no mu fa, na womaa w’akyiwadeɛ dɔɔso senee wɔn, na wode w’akyiwadeɛ a woyɛeɛ no nyinaa buu wo nuammaanom bem.

⁵²Wo nso, soa w’ahohora a wobu maa atɛn maa wo nuammaanom no. Wo bɔne a woama no ayɛ akyiwadeɛ asene wɔn no nti, wɔtene sene wo, na wo nso, ma w’ani nwu na soa w’ahohora, sɛ woabu wo nuammaanom bem.

⁵³ Na mede wɔn nnommum, Sodom ne ne mma nnommum, ne Samaria ne ne mmammaa nnommum, ne wo nnommumfa mu nnommum a ɛwɔ wɔn mu no bɛsane aba,

⁵⁴deɛ ɛbɛyɛ na woasoa w’ahohora, adeɛ a woayɛ nyinaa ho de akyekyere wɔn werɛ.

⁵⁵Na wo nuammaanom, Sodom ne ne mmammaa bɛsane aba wɔn kane dibea mu, na Samaria ne ne mmammaa bɛsane aba wɔn kane dibea mu, na wo nso wo ne wo mmammaa bɛsane aba mo kane dibea mu.

⁵⁶Na wo nuabaa Sodom anyɛ w’anomu asɛnka, w’ahantan nna no mu,

⁵⁷ansa na wɔreyi wo bɔne adie, sɛ ɛberɛ a Siria mmammaa ne wɔn a wɔtwa ne ho hyia nyinaa, Filistifoɔ mmammaa a wɔyi wo ahi no sopaa wo, afa nyinaa no.

⁵⁸W’abusudeɛ ne w’akyiwadeɛ no, wo ara na woso, AWURADE asɛm nie.

⁵⁹Na sɛ AWURADE Nyankopɔn seɛ nie: Meyɛ wo sɛdeɛ woyɛeɛ no ara a, wobuu ntanka animtia sɛ worebu apam soɔ no.

⁶⁰ Na me deɛ, mɛkae m’apam a me ne wo pamm no wo mmabaaberɛ mu no, na mɛma daa apam atim hɔ ama wo.

⁶¹ Na sɛ mede wo nuammaanom a wɔsene wo panin ka wo nuammaanom a wɔyɛ w’akyiri mma no ho de wɔn meyɛ wo mmammaa a ɛnnyina m’apam no so a, ɛno na wobɛkae w’akwan na w’ani awu.

⁶²Na me na mɛma me ne wo apam no agyina, na woahunu sɛ, me ne AWURADE,

⁶³ deɛ ɛbɛyɛ na woakaeɛ, na w’ani awuo, na w’aniwuo nti woammue w’ano bio, sɛ makata deɛ woyɛeɛ no nyinaa so mama woɔ, AWURADE Nyankopɔn asɛm nie.