Read Twi Asante Hosea 12 Bible Online

Hosea 12 - Twi Asante bible

Hosea 12

¹ Efraim hwe mframa, na ɔdi apueeɛ ahum akyi; daa nyinaa wɔma atorɔ ne ɔsɛeɛ dɔɔso, na wɔne Asiria kɔ apam, na wɔsoa ngo kɔ Misraim.

²Na AWURADE ne Yuda anya asɛm, na ɔreba abɛtwe Yakob aso sɛdeɛ n’akwan teɛ; sɛdeɛ ne nneyɛɛ teɛ no na ɔbɛtua no ka.

³ Ɔyafunum na ɔsɔɔ ne nua nantin, na n’ahoɔden mu na ɔne Onyankopɔn koeɛ.

⁴ Ɔne ɔbɔfoɔ no koe, na ɔtumii; ɔsui na ɔpaa no kyɛw; ɔhunuu no Betel, na ɛhɔ na ɔne yɛn kasaeɛ.

⁵ Na AWURADE yɛ asafo Nyankopɔn, AWURADE ne ne din a wɔde kae no.

⁶Na wo nso, sane kɔ wo Nyankopɔn nkyɛn; sɔ adɔeɛ ne atemmuo mu, na hwɛ wo Nyankopɔn kwan daa daa.

⁷Kanaan, nsisie nsania wɔ ne nsam, ɔpɛ amimdie.

⁸ Na Efraim ka sɛ: Manya me ho ara, manya adeɛ pii mafa; me brɛ nyinaa mu, wɔannya amumuyɛdeɛ a ɛyɛ bɔne amma me.

⁹ Nso mene AWURADE wo Nyankopɔn de firi Misraim asase so; mɛma woatena ntomadan mu bio sɛ afahyɛ nna no mu.

¹⁰Na makasa makyerɛ adiyifoɔ no, na mama anisoadehunu adɔɔso, na menam adiyifoɔ ano so mabubu mmɛ.

¹¹Gilead yɛ abusudeɛ anaa? Wɔadane ahuhudeɛ ara; Gilgal hɔ na wɔde anantwie bɔ afɔdeɛ, wɔn afɔrebukyia no nso te sɛ afuo mu nkofie so aboɔkuo.

¹² (Na Yakob dwane kɔɔ Siria asase so, na Israel som ɛyerɛ ho, na ɛyerɛ nti ɔhwɛɛ nnwan.)

¹³ Na AWURADE nam odiyifoɔ so yii Israel firii Misraim bae, na ɔnam odiyifoɔ so hwɛɛ wɔn.

¹⁴Efraim yii abufuo sɛ, enti ɔbɛma mogya a ɔdi ho so no abua n’atifi, na n’ahohora nso, n’AWURADE bɛdane agu ne so.