Read Twi Asante Hosea 2 Bible Online

Hosea 2 - Twi Asante bible

Hosea 2

¹ Monka nkyerɛ mo nuammarimanom sɛ: Ammi[4] ne mo nua mmaanom sɛ: Ruhama.[5]

² Mo ne mo na nkasa, monkasa, na ɔno deɛ, ɔnyɛ me yere, na me nso menyɛ ne kunu, na ɔnyi n’adwamammɔ no mfiri n’anim ne n’awaresɛeɛ no mfiri ne nufoɔ ntam,

³na mampa ne ho ntoma mamma no anna adagya, na mamfa no mansi hɔ sɛ da a wɔwoo no, na manyɛ no sɛ ɛserɛ so, na mamfa no mansi hɔ sɛ asase pɛsɛɛ, na mamfa sukɔm anku no.

⁴Na merenhu ne mma mmɔbɔ, na adwamammɔ mma ne wɔn.

⁵ Na adwaman na wɔn na bɔeɛ, na deɛ ɔnyinsɛnee wɔn no yɛɛ aniwudeɛ; na ɔkaa sɛ: Mɛdi m’adɔfo akyi; wɔn na wɔma me m’aduane ne me nsuo, me dwannwi ne m’asaawa, me ngo ne me nsa.

⁶Saa nti, hwɛ, mede nwerɛ bɛgye wo kwan mu ban, na mato emu fasuo, na wanhunu kwan mu.

⁷Na ɔbɛti n’adɔfo, na ne nsa renka wɔn, na ɔbɛhwehwɛ wɔn akyiri kwan, na ɔrenhunu; na ɔbɛka sɛ: Mɛsane m’akyiri makɔ me kane kunu no nkyɛn; na ɛno mu na ɛyɛ ma me sene afei.

⁸Na ɔno deɛ, na ɔnnim sɛ me na memaa no ayuo ne nsa ne ngo, na memaa ne dwetɛ dɔreeɛ, ne ne sika a wɔhwere maa Baal no.

⁹Saa nti mɛsane mabɛgye m’ayuo, ne berɛ mu, ne me nsa, ne hyɛberɛ mu, na mayi me dwannwi ne m’asaawa a ɔde kataa n’adagya soɔ no.

¹⁰ Na afei mɛyi n’ahuhusɛm adi, n’adɔfo anim, na obiara renyi no mfiri me nsam.

¹¹Na mɛma n’ahosɛpɛ nyinaa to atwa, ne nnapɔnna, ne bosome foforɔ ne ne homeda ne n’afahyɛ nyinaa.

¹²Na mɛsɛe ne bobe ne ne borɔdɔma a ɔkaa sɛ: Yeinom ne m’apɛdeɛ a m’adɔfoɔ de maa me no ne no; na mɛyɛ no kwaeɛ ama wiram mmoadoma adi.

¹³Na mɛba mabɛtwe no nna a ɔdi maa Baalim no ho aso, sɛ ɔhyee aduhwam maa wɔn, na ɔde ne hwene mu kaa ne ne nnwinneɛ kekaa ne ho, na ɔdii n’adɔfo akyi, na me deɛ, ne werɛ firii me no, AWURADE asɛm nie.

¹⁴ Saa nti, hwɛ, mɛbɔ no adafa mede no makɔ ɛserɛ so, na maka no abodwosɛm

¹⁵ na mafiri hɔ mama no ne bobe nturo, na Akor bonhwa no, mayɛ no anidasoɔ pono, na ɔbɛgye so wɔ hɔ sɛ ne mmabaaberɛ mu ne ɛda a ɔfiri Misraim asase so foro baeɛ no.

¹⁶Na ɛda no, AWURADE asɛm nie, wobɛfrɛ me: Ishi.[6] Na woremfrɛ me: Me Baal! bio.

¹⁷Na mɛyi Baal ahodoɔ din mafiri n’anomu, na wɔremfa wɔn din nkae wɔn bio.

¹⁸ Na mɛpam apam bi mama wɔn ɛda no, me ne ewiram mmoadoma ne ewiem nnomaa ne mmoa a wɔwea fam, na mɛbubu tadua ne nkrantɛ ne akodie mafiri asase no so, na mama wɔatena dwoodwoo.

¹⁹ Na mɛgye wo aware mafa akɔsi daa, na mɛgye wo aware mafa, tenenee ne atemmuo so, ne adɔeɛ ne mmɔborɔhunu so,

²⁰ na mɛgye wo aware mafa, gyidie so, na woahunu AWURADE.

²¹Na ɛda no ɛbɛba sɛ mɛgye so, AWURADE asɛm nie, mɛgye ɔsoro so, na ɛno nso agye asase so,

²²na asase agye ayuo ne nsa ne ngo so, na ɛno nso agye Yesreel so.

²³ Na mɛdua no mafa, asase so, na mɛhunu deɛ wɔnhunuu no mmɔborɔ no mmɔbɔ, na mɛka makyerɛ deɛ ɔnyɛ me man no sɛ: Me man ne wo! Na ɔno nso aka akyerɛ me sɛ: Me Nyankopɔn!