Read Twi Asante Hosea 4 Bible Online

Hosea 4 - Twi Asante bible

Hosea 4

¹Montie AWURADE asɛm, Israel mma, na AWURADE ne asase sofoɔ anya ɔham. Na nokorɛ ne adɔeɛ ne Nyankopɔn ho nimdeɛ biara nni asase so.

²Ntanka, nkontompo, awudie, korɔno ne awaresɛeɛ na ɛwɔ hɔ. Wɔdi akakabensɛm na mogyahwieguo toa mogyahwieguo so.

³Enti asase no di abooboo, na ɛsotefoɔ nyinaa anyinnyam, ewiram mmoadoma ne ewiem nnomaa; na ɛpo mu mpataa mpo reyɛ asa.

⁴ Nanso mma obi nnham na obi nnka anim, ɛfiri sɛ wo man te sɛ wɔn a wɔne ɔsɔfoɔ ham.

⁵Enti wobɛsunti awia, na odiyifoɔ nso ne wo bɛsunti anadwo, na mɛtwa wo na atwene.

⁶Nimdeɛ a me man nnie nti, wɔbɛtwa wɔn agu; na wo nso, woapo nimdeɛ nti, mepo wo sɛ: Nni me sɔfoɔ; na wo werɛ afiri wo Nyankopɔn mmara nti, me nso, me werɛ bɛfiri wo mma.

⁷ Wɔrekɔ so dɔre no, na wɔrekɔ so yɛ me bɔne; wɔn animuonyam no, mɛdane no ahohora.

⁸ Me man bɔne yɛ wɔn aduane, na wɔn amumuyɛ yɛ wɔn kra akɔnnɔ.

⁹Na wɔbɛyɛ ɔman no sɛdeɛ wɔbɛyɛ ɔsɔfoɔ no, na mɛba mabɛtwe wɔn aso, wɔn bɔne nti, na mama wɔn nneyɛɛ asane abɛbua wɔn atifi.

¹⁰Wɔbɛdidi, na wɔremmee; wɔbɛbɔ adwaman na wɔn ase renkyene; ɛfiri sɛ wɔagya buo a anka ɛsɛ sɛ wɔbu AWURADE no.

¹¹Adwamammɔ ne nsa ne nsa mono sɛe nteaseɛ.

¹² Me man bisa wɔn dua hɔ adeɛ, na wɔn poma ka asɛm kyerɛ wɔn, ɛfiri sɛ adwamammɔ honhom adaadaa wɔn, na wɔafiri wɔn Nyankopɔn ase akɔbɔ adwaman.

¹³ Mmepɔ atifi na wɔbobɔ afɔdeɛ, na wɔhye aduhwam nkokoɔ so, odum ne duafufuo ne odupɔn ase, ɛfiri sɛ ne nwunu yɛ. Enti mo mmammaa bɔ adwaman, na mo nsiwa sɛe awadeɛ.

¹⁴Merentwe mo mmammaa aso adwamammɔ ho, ne mo nsiwa awaresɛeɛ ho, na mmarima no nso wɔne mmaa nnwamamfoɔ mane, na wɔne mmosomfenaa bɔ afɔdeɛ; na ɔman a wɔnni nhunumu no bɛbɔ.

¹⁵ Sɛ wo, Israel, wobɔ adwaman a, mma Yuda nnni so. Na mommma Gilgal, na mommforo mmma Bet-awen, na monnkeka ntam sɛ: Sɛ AWURADE te aseɛ yi.

¹⁶Na Israel aso awu sɛ nantwiburuwa aso. Afei AWURADE bɛyɛne wɔn sɛ adwammaa, asase bayaa so.

¹⁷Efraim akɔdɔm abosom adum; gyaa no.

¹⁸Wɔn nsanom atra so; adwaman ara na wɔabɔ, pɛ na emu atitire pɛ ahohora.

¹⁹Mframa akyekyere wɔn wɔ ne ntaban mu, na wɔn ani bɛwuwu wɔn afɔrebɔ ho.