Read Twi Asante Hosea 6 Bible Online

Hosea 6 - Twi Asante bible

Hosea 6

¹ Mommra mma yɛnsane nkɔ AWURADE nkyɛn, na ɔno na watete yɛn mu na ɔbɛsa yɛn yadeɛ, ɔno na wabobɔ yɛn na ɔbɛkyekyere yɛn.

² Nnanu akyiri no ɔbɛma yɛanya nkwa, da a ɛtɔ so mmiɛnsa no ɔbɛma yɛasɔre na yɛanya n’anim nkwa.

³Na momma yɛnhunu na yɛnti AWURADE nimdeɛ no. Wɔasiesie n’adifire sɛ adekyeeɛ, na ɔbɛba ama yɛn sɛ osutorɔ, sɛ bereamporɔsuo a ɛtɔ gu asase soɔ.

⁴Ɛdeɛn na menyɛ woɔ, Efraim? Ɛdeɛn na menyɛ woɔ, Yuda? Na mo adɔeɛ te sɛ anɔpa mununkum, na ɛte sɛ obosuo a ɛrepɛ ntɛm akorɔ.

⁵ Enti menam adiyifoɔ no so mabubu wɔn, na mede m’anomu nsɛm makum wɔn, na m’atemmuo ayi adi sɛ hann.

⁶ Na mepɛ adɔeɛyɛ na ɛnyɛ afɔrebɔ, ne Nyankopɔn ho nimdeɛ sene ɔhyeɛ afɔdeɛ.

⁷ Na wɔn deɛ, wɔafom apam no sɛ Adam, ɛhɔ na wɔatwa me nkontompo.

⁸Gilead yɛ mmusubɔfoɔ kuro a mogya akeka mu.

⁹Na asɔfoɔ asafokuo no te sɛ ɔkwanmukafoɔ asafo a wɔtɛ nnipa, wɔdi awu ɔkwan mu, wɔde rekɔ Sekem no; aane abusudeɛ ara na wɔyɛ.

¹⁰ Mahunu ahodwirideɛ Israel fie, ɛhɔ na Efraim bɔ adwaman, Israel ho agu fi.

¹¹ Yuda nso, wɔahyɛ twaberɛ ama wo, berɛ a mede me man nnommum bɛsane aba no.