Read Twi Asante Hosea 9 Bible Online

Hosea 9 - Twi Asante bible

Hosea 9

¹ Israel, mma w’ani nnnye na nni ahurisie sɛ aman bi, ɛfiri sɛ woafiri wo Nyankopɔn akyi akɔbɔ adwaman. Woapɛ apɛdeɛ ayuporebea nyinaa so.

²Ayuporebea ne nsa-kyi-amena renyɛne wɔn, na nsamono no bɛdi wɔn hwammɔ.

³ Wɔrentena AWURADE asase so, na Efraim bɛsane akɔ Misraim, na wɔbɛdi deɛ ɛho nteɛ wɔ Asiria.

⁴Wɔremfa ahwiesa mmrɛ AWURADE, na wɔn kum afɔdeɛ renyɛ no dɛ; wɔn aduane bɛyɛ wɔn sɛ akyiduane, wɔn a wɔdie nyinaa ho bɛgu fi; na wɔn aduane yɛ wɔn ara wɔn deɛ, ɛremma AWURADE fie.

⁵Ɛdeɛn na mobɛyɛ afahyɛ da no ne AWURADE dapɔnna no?

⁶ Na hwɛ, ɔsɛeɛ nti wɔatu kɔ; Misraim bɛboa wɔn ano, Memfis bɛsie wɔn; wɔn dwetɛ nnwinneɛ ananmu na nnɛnkyɛnse bɛsie, na nkasɛɛ bɛfu deɛ wɔn ntomadan siiɛ no.

⁷Asotwe nna no anya aba, aweretɔ nna no anya adu; Israel bɛhunu sɛ odiyifoɔ no yɛ ogyimifoɔ, na honhom nipa no yɛ ɔbɔdamfoɔ, amumuyɛ dodoɔ ne ɔtane a ɛso pii no nti.

⁸ Odiyifoɔ no ne me Nyankopɔn yɛ ɔwɛmfoɔ ma Efraim, nanso anomayini fidie wɔ n’akwan nyinaa mu, ɔtane no wɔ ne Nyankopɔn fie.

⁹ Wɔama ɔsɛeɛ a wɔasɛe no mu adɔ sɛ Gibea nna no mu, ɔbɛkae wɔn amumuyɛ, ɔbɛtwe wɔn aso, wɔn bɔne ho.

¹⁰ Mehunuu Israel sɛ ɛserɛ so bobe aba, mehunuu mo agyanom sɛ borɔdɔmakan, ne bereɛ a ɛdi kan mu; nanso wɔkɔɔ Baal-peor nkyɛn, na wɔdwiraa wɔn ho de maa aniwudeɛ, na wɔn ho yɛɛ nwunu sɛ nnoɔma a na wɔpɛ no ara.

¹¹Efraim deɛ, wɔn animuonyam bɛtu sɛ anomaa, awoɔ ne afurofa ne nyinsɛn nni wɔn mu.

¹²Na sɛ wɔyɛne wɔn mma mpo a, mɛma wɔadi awommawuo na obi anka; na sɛ metwe me ho mefiri wɔn ho a, wɔnnue ara!

¹³ Efraim a meyii no sɛ ɔnyɛ sɛ Tiro a wɔadua no asase pa soɔ no, Efraim no ara bɛyi ne mma afiri akɔma okumfoɔ.

¹⁴AWURADE, ma wɔn ɛ! — Ɛdeɛn na wobɛma wɔn? Ma wɔn ɔyafunu a ɛpɔn, ne nufoɔ a emu aweɛ.

¹⁵Wɔn bɔne nyinaa wɔ Gilgal, na ɛhɔ na mefiri metanee wɔn; wɔn nneyɛɛ bɔne nti mɛpamo wɔn afiri me fie, merenna so mennɔ wɔn; wɔn mmapɔmma nyinaa yɛ atuatefoɔ nko.

¹⁶Wɔde adeɛ abɔ Efraim; wɔn ase nhini akyenkyen; aba nso wɔrenso; sɛ wɔwo nso a, mɛkum wɔn yafunum mma a wɔdɔ wɔn no.

¹⁷Me Nyankopɔn apo wɔn, ɛfiri sɛ wɔantie no; na wɔbɛyɛ abatafoɔ amanaman mu.