Read Twi Asante Yoel 1 Bible Online

Yoel 1 - Twi Asante bible

Yoel 1

¹AWURADE asɛm a ɛbaa Petuel ba Yoel nkyɛn nie.

²Montie yei, mo mpanimfoɔ, na monyɛ aso, mo asase sofoɔ nyinaa. Saa adeɛ yi aba mo berɛ so anaa mo agyanom berɛ so pɛn?

³Monka ɛho asɛm nkyerɛ mo mma, na mo mma nka nkyerɛ wɔn mma, na wɔn mma, nso nka nkyerɛ awoɔ ntoatoasoɔ a ɛdi soɔ no.

⁴Deɛ aketekyire adi aka no, ntutummɛ adi. Na deɛ ntutummɛ adi aka no, mfuntie adi. Na deɛ mfuntie adi aka no, mmɛbɛ adi.

⁵Mo nsabofoɔ, monnyane na monsu, na mo nsanomfoɔ nyinaa, montwa adwo, nsamono nti, ɛfiri sɛ wɔatwa afiri mo anomu.

⁶ Na ɛdɔm bi atu aba m’asase so, wɔn ho yɛ den na wɔn dodoɔ nni ano; wɔn se te sɛ gyata se, na wɔwɔ gyatabereɛ nnyepi.

⁷Wɔasɛe me bobe pasaa, na wɔapempane me borɔdɔma mman; wɔawaewae ho hono agu, na ne mman ho ahoa fitafitaa.

⁸Twa adwo sɛ ababaa a ɔfira ayitoma ma ne mmabaaberɛ mu kunu.

⁹ Wɔatwa aduane ayɛyɛdeɛ ne ahwiesa afiri AWURADE fie; asɔfoɔ no, AWURADE asomfo no, di abooboo.

¹⁰Mfuo asɛe, asase di abooboo, na aduane asɛe, nsamono awe, ngo so ate.

¹¹Akuafoɔ, mo ani nwu, O nturoyɛfoɔ, ayuo ne atokoɔ nti montwa adwo, ɛfiri sɛ mfuo mu aduanetwa asɛe.

¹²Obobe akusa, na borɔdɔma atwam, atoaa aba, abɛ nso ne aprɛ. Petee mu nnua nyinaa akusa, ampa, anika atu afiri nnipa mma mu.

¹³ Asɔfoɔ, momfira ayitoma na mommɔ bena, afɔrebukyia asomfoɔ, montwa adwo, me Nyankopɔn asomfoɔ, mommra mmɛda ayitoma mu anadwo nyinaa! na aduane ayɛyɛdeɛ ne ahwiesa agyae mo Nyankopɔn fie ba.

¹⁴Monyɛ abuadadie kronkron, mompae asɔfoɔ nhyiamu, mommoa mpanimfoɔ ano, asase sofoɔ nyinaa mmra AWURADE mo Nyankopɔn fie, na monsu mfrɛ AWURADE.

¹⁵ Ao, ɛda no! Na AWURADE da no abɛn, na ɛreba sɛ ɔsɛeɛ tumi afiri Otumfoɔ nkyɛn.

¹⁶ Wɔantwa aduane amfiri yɛn anim, na anigyeɛ ne ahosɛpɛ amfiri yɛn Nyankopɔn fie anaa?

¹⁷Aba a wɔadua aporɔ ne nkofie mu, aduanekora adan ada mpan, asan abubu, na ayuo asɛe.

¹⁸Hwɛ sɛ mmoadoma penepene, anantwikuo rebrɛ, ɛfiri sɛ wɔnni adidibea; nnwankuo nso tiri ato.

¹⁹ Wo, AWURADE, na mesu mefrɛ woɔ, na ogya ahye ɛserɛ so wira mono, na ogyaframa ahye petee mu nnua nyinaa.

²⁰ Ewiram mmoa nso repere frɛ wo, na nsuwansuwa awewe, na ogya ahye ɛserɛ so wira mono.