Read Twi Asante Amos 1 Bible Online

Amos 1 - Twi Asante bible

Amos 1

¹ Amos a ɔwɔ Tekoa nnwanyɛnfoɔ mu nsɛm a ɔhunuu no n’ani soɔ, Israel ho, ɛwɔ Yudahene Usia berɛ soɔ ne Israelhene Yeroboam a ɔyɛ Yoas ba berɛ soɔ, mfeɛ mmienu ansa na asasewosoɔ no reba nie.

² Na ɔse: AWURADE firi Sion bobom, na ɔfiri Yerusalem ma ne nne so; na nnwanhwɛfoɔ adidibea no atwintwam, na Karmel atifi akusa.

³ Sɛ AWURADE seɛ nie: Damasko amumuyɛ ntoatoasoɔ nti merennane n’asotwe no, sɛ wɔde dadeɛ ayuporeɛadeɛ dwerɛɛ Gilead nti.

⁴Na mɛto Hasael fie mu gya, na ahye Ben-hadad aban denden no.

⁵ Na mɛbubu Damasko pono akyiri adaban, na matwa wɔn a wɔte Awen bonhwa mu afiri hɔ, ne ɔhempomakurani no afiri Bet-eden; na wɔbɛtu Siria man akɔ Kir, AWURADE na ɔseɛ.

⁶ Sɛ AWURADE seɛ nie: Gasa amumuyɛ ntoatoasoɔ nti merennane n’asotwe no, sɛ wɔtuu atukɔfoɔ ɔman mu kɔɔ sɛ wɔde wɔn rekɔhyɛ Edom nsa nti.

⁷Na mɛto Gasa fasuo mu gya, na ahye n’aban denden no;

⁸na mɛtwa emufoɔ afiri Asdod ne ahempomakurani afiri Askelon, na mɛdane me nsa atia Ekron, na Filistifoɔ nkaeɛ ayera, AWURADE Nyankopɔn na ɔseɛ.

⁹ Sɛ AWURADE seɛ nie: Tiro amumuyɛ ntoatoasoɔ nti merennane n’asotwe no, sɛ wɔde atukɔfoɔ ɔman mu hyɛɛ Edom nsa, na wɔankae anuanom apam no nti.

¹⁰Na mɛto Tiro fasuo mu gya, na ahye n’aban denden no.

¹¹ Sɛ AWURADE seɛ nie: Edom amumuyɛ ntoatoasoɔ nti merennane n’asotwe no, sɛ ɔde afena tii ne nua, na ne yam anhyehye no, na n’abufuo sɛee adeɛ ara na ɔyɛɛ n’abohuro no so adeɛ daa nti.

¹²Na mɛto Teman mu gya, na ahye Bosra aban denden no.

¹³ Sɛ AWURADE seɛ nie: Amonfoɔ amumuyɛ ntoatoasoɔ nti merennane wɔn asotwe no, sɛ wɔgu so retrɛ w’ahyeɛ mu no, wɔpaepaee mpo Gilead anyinsɛnfoɔ mu,

¹⁴na mɛsɔ Raba fasuo mu gya, na ahye n’aban denden no, na wɔbɛte ɔko mu gyegyeegye, na ɔko no bɛyɛ den sɛ ahumtuo da no kirididibɔ mu.

¹⁵Na wɔn hene bɛkɔ otukorɔ mu, ɔno ne ne mmapɔmma bɛbom akɔ, AWURADE na ɔseɛ.