Read Twi Asante Amos 9 Bible Online

Amos 9 - Twi Asante bible

Amos 9

¹Mehunuu AWURADE sɛ ɔgyina afɔrebukyia no ho, na ɔkaa sɛ: Bɔ atifi pɔ no ma aponnwa nwoso, na dwiri gu wɔn nyinaa atifi! Na akyirikafoɔ no, mede afena bɛkunkum wɔn; odwanefoɔ rennwane mma wɔn, na mfirimufoɔ remfiri mu mfi mma wɔn.

² Sɛ wɔfunifuni kɔ Asamando a, me nsa bɛfa wɔn afiri hɔ aba, na sɛ wɔforo kɔ ɔsoro a, mede wɔn bɛfiri hɔ asiane.

³Na sɛ wɔde wɔn ho kɔsie Karmel atifi a, mɛtwee wɔn makɔfa wɔn afiri hɔ. Na sɛ wɔfiri m’anim kɔhunta ɛpo ase a, ɛhɔ na mɛhyɛ ɔwɔ na wakeka wɔn;

⁴ na sɛ wɔkɔ nnommumfa mu, wɔn atamfoɔ anim a, ɛhɔ na mɛhyɛ afena na akunkum wɔn, na mede m’ani bɛhwɛ wɔn mama bɔne na ɛnyɛ papa.

⁵ Na AWURADE, asafo AWURADE ne deɛ ɔka asase ma no nane na ɛsofoɔ nyinaa di abooboo, na ne mu no nyinaa puhu sɛ Nil, na ɛtwe sɛ Misraim asuo no.

⁶ Ɔsi ne nsamsoɔ ɔsoro, na ɔto ne kuntunu fapem, asase so, ɔfrɛ po mu nsuo na ɔhwie gu asase ani, AWURADE ne ne din.

⁷ Monyɛ me sɛ Etiopiafoɔ, mo Israel mma anaa? AWURADE asɛm nie. Ɛnyɛ Israel na meyii no firii Misraim asase soɔ, na Filistifoɔ nso firi Kaftor, na Siriafoɔ nso firi Kir?

⁸Hwɛ, AWURADE Nyankopɔn ani sa bɔne ahennie no, na mɛsɛe no afiri asase ani, nanso sɛeɛ no meremfa mensɛe Yakob fie no koraa, AWURADE asɛm nie.

⁹Na hwɛ, mɛhyɛ na masɔne Israel fie so amanaman nyinaa mu, sɛdeɛ wɔsɔne adeɛ soɔ sɔneeɛ mu, nanso ayufua rentɔ fam.

¹⁰ Afena ano na me man mu nnebɔneyɛfoɔ nyinaa bɛwuwuo, wɔn a wɔka sɛ: Bɔne no renso yɛn so na ɛrento yɛn no.

¹¹ Ɛda no, mɛma Dawid sese a ahwe aseɛ no agyina hɔ, na mapempam wɔn mpaepaeɛ no, na magyina n’afasusini, na mato no sɛ tete nna no.

¹²Na wɔafa Edom nkaeɛ adi, ne amanaman a wɔbɛbɔ me din afrɛ wɔn no nyinaa; AWURADE a ɔyɛ yeinom no asɛm nie.

¹³ Hwɛ, nna bi reba, AWURADE asɛm nie, sɛ deɛ ɔfɛntɛm bɛka deɛ ɔtwa, na deɛ ɔtiatia bobe aba soɔ bɛka deɛ ɔgu ayuo, na mmepɔ bɛsosɔ nsamono, na nkokoɔ nyinaa ahono.

¹⁴ Na mɛdane me man Israel nnommumfa no, na wɔabɛkyekyere nkuro agoago no atena mu, na wɔatɛ bobe nturo na wɔanom mu nsa, na wɔayɛ nturo na wɔadi mu aba.

¹⁵Na mɛdua wɔn wɔn asase so, na wɔrentu wɔn mfiri wɔn asase a mede mama wɔn no so bio, AWURADE wo Nyankopɔn na ɔseɛ.