Read Twi Asante Obadia 1 Bible Online

Obadia 1 - Twi Asante bible

Obadia 1

¹ Obadia anisoadehunu nie. Sei na AWURADE Nyankopɔn ka fa Edom ho: Yɛate AWURADE anomu asɛm sɛ wasoma abɔfoɔ ma wɔakɔ amanaman mu sɛ: Monsɔre, momma yɛnsɔre ntia Edom ne no nkɔko.

²AWURADE ka kyerɛɛ Edom sɛ: Hwɛ, mayɛ wo amanaman mu ketewa, wɔabu wo animtia pa ara.

³ W’akoma ahantan adaadaa wo, wo a wote ɔbotan ntokuro mu, deɛ ɛhɔ korɔn ne w’adwa, wose no w’akoma mu sɛ: Hwan na ɔbɛtumi ayi me asi fam?

⁴Sɛ wotu kɔ soro sɛ ɔkɔdeɛ, na sɛ wode wo pirebuo si nsoromma ntam mpo a, ɛhɔ na mɛduru abɛfa wo afiri, AWURADE asɛm nie.

⁵Sɛ awifoɔ, anaa adwotwafoɔ ba wo so anadwo a, sɛ wɔrewia wo mpo a, anka wɔrennya wo ase anaa? Sɛ obobe abatefoɔ bɛtete w’aba a, anka wɔremma mpɛpɛ nka anaa?

⁶Na wo Esau deɛ, hwɛ wɔapra w’adeɛ apɛ w’ahuntadeɛ na wɔayɛ wo dosodoso.

⁷Wɔn a wɔne wo wɔ apam nyinaa adaadaa wo abɛduru ɛhyeɛ so; wɔn a wo ne wɔn te asomdwoeɛ mu adaadaa wo afa wo so; wɔn a wɔdii w’aduane asum w’ase fidie; nanso wonnim.

⁸Ɛnyɛ ɛda no, na mɛsɛe anyansafoɔ afiri Edom ne nhunumu afiri Esau bepɔ soɔ? AWURADE asɛm nie.

⁹Teman, wo nnɔmmarima akoma bɛtu, na wɔakum nnipa nyinaa afiri Esau bepɔ so.

¹⁰ Atirimuɔden a wode bɔɔ wo nua Yakob nti na aniwuo bɛkata wo ho, na wɔatwa wo atwene akɔsi daa.

¹¹Ɛda a wobɛgyinaa ntentensoɔ, ɛda a ananafoɔ faa ne dɔm nnommum kɔeɛ, na ahɔhoɔ hyɛnee ne kuro apono mu na wɔtwee Yerusalem so ntonto no, ɛno mu na wo nso woyɛɛ sɛ wɔn mu baako.

¹² Nanso ɛnsɛ sɛ anka wode anigyeɛ hwɛ wo nua, ɛda a abuo buu no no; ɛnsɛ sɛ anka w’ani gye Yuda mma wɔn sɛeɛ da no ho, ɛnsɛ sɛ anka wohyehyɛ wo ho wɔ ahohiahia da no,

¹³ɛnsɛ sɛ anka wohyɛne me man kuro pono no mu, wɔn amanehunu da no; ɛnsɛ sɛ anka wode anigyeɛ hwɛ wɔn amanehunu, wɔn amanehunu da no; ɛnsɛ sɛ anka wotene wo nsa sɔ wɔn ahodeɛ mu, wɔn amanehunu da no;

¹⁴ɛnsɛ sɛ anka wogyina nkwanta soɔ twitwa ne mfirimufoɔ guo; ɛnsɛ sɛ anka woyi ne nnipa a wɔaka no ma, ahohiahia da no.

¹⁵ Na AWURADE da no abɛn, amanaman nyinaa so; Edom sɛdeɛ woyɛeɛ no, saa ara na wɔbɛyɛ woɔ, wo nneyɛe bɛsane abɛbua w’atifi.

¹⁶ Na sɛdeɛ amanehunu boroo me man Yuda sɛ nsa wɔ me bepɔ kronkron no soɔ no, saa ara na ɛbɛboro amanaman nyinaa daa daa, na amanehunu no bɛmene wɔn na w’ase ahye koraa.

¹⁷ Na Sion bepɔ so deɛ, mfirimufoɔ bɛtena hɔ, na ayɛ kronkronbea, na Yakob fie bɛsane afa wɔn agyapadeɛ adi so.

¹⁸ Na Yakob fie bɛyɛ ogya, na Yosef fie ayɛ ogyaframa, na Esau fie deɛ ɛbɛyɛ nkyɛnkyɛmma, na wɔadɛre wɔn mu ahye wɔn a obiara renka mma Esau fie, ɛfiri sɛ AWURADE na waka.

¹⁹Na anafoɔ famfoɔ bɛfa Esau bepɔ adi so, na asaseta sofoɔ bɛfa Filistifoɔ deɛ adi so, na wɔbɛfa Efraim asase ne Samaria asase adi so, na Benyamin afa Gilead adi so.

²⁰Na dɔm yi a ɛyɛ Israelfoɔ deɛ no nnommum a wɔwɔ Kanaanfoɔ mu no bɛdi asase no so de akɔsi Sarefat, na Yerusalem nnommum a wɔwɔ Sefarad no bɛfa Negeb nkuro no adi so.

²¹Na agyefoɔ bɛforo aba Sion bepɔ so na wɔabɛdi Esau bepɔ so, na ahennie no bɛyɛ AWURADE dea.