Read Twi Asante Numeri 2 Bible Online

Numeri 2 - Twi Asante bible

Numeri 2

¹Na AWURADE kasa kyerɛɛ Mose ne Aaron sɛ:

² Israelfoɔ no nkyere nsraban, wɔn mu biara wɔ ɔno ara ne frankaa ho, ɛne wɔn mpanimfie nsɛnkyerɛnneɛ ho; ahyiaeɛ ntomadan no ntentensoɔ na wɔnkyere nsraban no nhyia.

³Wɔn a wɔnkyere nsraban apueeɛ fam no ne Yuda nsraban frankaa no ase nnipa sɛdeɛ wɔn dɔm teɛ. Yuda mma no safohempanin Aminadab ba Nahason,

⁴na ne dɔm a wɔkan wɔn no, mpem aduɔson nnan ne ahansia.

⁵Na wɔn a wɔnkyere nsraban ntoa soɔ ne Isakar abusuakuo. Isakar mma no safohempanin Suar ba Netanel,

⁶na ne dɔm a wɔkan wɔn no, mpem aduonum nnan ne ahanan.

⁷Sebulon abusuakuo na ɛtoa soɔ. Sebulon mma no safohempanin ne Helon ba Eliab,

⁸na ne dɔm a wɔkan wɔn no yɛ mpem aduonum nson ne ahanan.

⁹Wɔn a wɔkan wɔn maa Yuda nsraban no nyinaa yɛ ɔpeha aduɔwɔtwe nsia ne ahanan, sɛdeɛ wɔn dɔm ahodoɔ no teɛ; wɔn na wɔntu kane.

¹⁰Ruben nsraban frankaa ase nnipa nni anafoɔ fam, sɛdeɛ wɔn dɔm ahodoɔ no teɛ. Ruben mma no safohempanin ne Sedeur ba Elisur,

¹¹na ne dɔm a wɔkan wɔn no yɛ mpem aduanan nsia ne ahanum.

¹²Na wɔn a wɔnkyere nsraban ntoa ne soɔ ne Simeon abusuakuo. Simeon mma safohempanin Surisadai ba Selumiel,

¹³na ne dɔm a wɔkan wɔn no yɛ mpem aduonum nkron ne ahasa.

¹⁴Na Gad abusuakuo na ɛntoa soɔ. Gad mma no safohempanin ne Reuel ba Eliasaf,

¹⁵na ne dɔm a wɔkan wɔn mpem aduanan nnum ne ahansia aduonum.

¹⁶Wɔn a wɔkan wɔn maa Ruben nsraban no nyinaa yɛ ɔpeha aduonum baako ne ahanan aduonum, sɛdeɛ wɔn dɔm ahodoɔ no teɛ, na wɔn na wɔntɔ so mmienu ntu.

¹⁷Afei ahyiaeɛ ntomadan no ne Lewifoɔ nsraban no ntu nni nsraban ahodoɔ no ntam. Sɛdeɛ wɔkyere nsraban no, saa ara na wɔntuo, wɔn nyinaa wɔ wɔn dibea sɛdeɛ wɔn mfrankaa no teɛ.

¹⁸Efraim nsraban frankaa nni atɔeɛ fam, sɛdeɛ wɔn dɔm ahodoɔ no teɛ. Efraim mma safohempanin ne Amihud ba Elisama,

¹⁹na ne dɔm a wɔkan wɔn no, mpem aduanan ahanum.

²⁰Na Manase abusuakuo ntoa so. Manase mma no safohempanin ne Pedahsur ba Gamaliel,

²¹na ne dɔm a wɔkan wɔn no, mpem aduasa mmienu ne ahanu.

²²Na Benyamin abusuakuo no na ɛntoa soɔ. Benyamin mma no safohempanin ne Gideoni ba Abidan

²³na ne dɔm a wɔkan wɔn no, mpem aduasa nnum ne ahanan.

²⁴Wɔn a wɔkan wɔn maa Efraim nsraban no nyinaa yɛ nnipa mpemha ne nwɔtwe, ne ɔha sɛdeɛ wɔn dɔm ahodoɔ no teɛ; na wɔn na wɔntɔ so mmiɛnsa ntuo.

²⁵Dan nsraban frankaa nni atifi fam, sɛdeɛ wɔn dɔm ahodoɔ no teɛ. Dan mma no safohempanin ne Amisadai ba Ahieser,

²⁶na ne dɔm a wɔkan wɔn no yɛ mpem aduosia mmienu ne ahanson.

²⁷Na wɔn a wɔnkyere nsraban ntoa ne soɔ ne Aser abusuakuo. Aser mma no safohempanin ne Okran ba Pagiel,

²⁸na ne dɔm a wɔkan wɔn no yɛ mpem aduanan baako ne ahanum.

²⁹Na Naftali abusuakuo na ɛntoa soɔ. Naftali mma no safohempanin ne Enan ba Ahira,

³⁰na ne dɔm a wɔkan wɔn no, mpem aduonum mmiɛnsa ne ahanan.

³¹Wɔn a wɔkan wɔn maa Dan nsraban yɛ ɔpeha aduonum nson ne ahansia; wɔn na wɔnni akyire ntuo sɛdeɛ wɔn mfrankaa no teɛ.

³² Yeinom ne Israelfoɔ a wɔkan wɔn, sɛdeɛ wɔn mpanimfie teɛ, nsraban ahodoɔ no mu wɔn a wɔkan wɔn nyinaa, sɛdeɛ wɔn dɔm ahodoɔ no teɛ, yɛ ɔpeha nsia ne mmiɛnsa ne ahanum aduonum.

³³ Na Lewifoɔ no deɛ, wɔankan wɔn amfra Israelfoɔ no, sɛdeɛ AWURADE hyɛɛ Mose no.

³⁴ Na Israelfoɔ no yɛɛ sɛdeɛ AWURADE hyɛɛ Mose no nyinaa. Wɔkyeree nsraban, sɛdeɛ wɔn mfrankaa no teɛ, na saa nso na wɔtuiɛ, wɔn nyinaa, sɛdeɛ wɔn mmusua ne wɔn mpanimfie teɛ no.