Read Twi Asante Numeri 32 Bible Online

Numeri 32 - Twi Asante bible

Numeri 32

¹ Na Ruben mma ne Gad mma no wɔ mmoa pii a wɔdɔɔso pa ara, na wɔhunuu Yaser ne Gilead asase, na hwɛ, na ɛhɔ yɛ baabi a ɛyɛ ma mmoa.

²Na Gad mma ne Ruben mma no ba bɛka kyerɛɛ Mose ne Ɔsɔfoɔ Eleasa ne asafo no mu mmapɔmma no sɛ:

³Nkuro Atarot, Dibon, Yaser, Nimra, Hesbon, Eleale, Sebam, Nebo ne Beon,

⁴asase a AWURADE abrɛ no aseɛ Israel asafo anim no, yɛ asase a ɛyɛ ma mmoa; na yɛn wo nkoa wɔ mmoa.

⁵Na wɔkaa sɛ: Sɛ yɛn anim aba nyam wɔ w’anim a, ma wɔmfa asase yi mma wo nkoa na yɛnni so, na mfa yɛn ntwa Yordan.

⁶Na Mose ka kyerɛɛ Gad mma ne Ruben mma no sɛ: Mo nuanom nkɔko, na mo deɛ, montena ha?

⁷Na adɛn na motu Israelfoɔ akoma sɛdeɛ wɔrentwa nkɔ asase a AWURADE de ama wɔn no soɔ?

⁸ Saa na mo nananom yɛeɛ berɛ a mesomaa wɔn firi Kades-barnea sɛ wɔnkɔhwɛ asase no,

⁹na wɔforo kɔduruu Eskol subonhwa no mu, na wɔhunuu asase no, wɔbɛtuu Israelfoɔ no akoma, na wɔankɔ asase a AWURADE de ama wɔn no so;

¹⁰na AWURADE bo fui da no, na ɔkaa ntam sɛ:

¹¹ Mmarima a wɔfiri Misraim baeɛ a wɔadi mfeɛ aduonu de rekorɔ no renhunu asase a mekaa ɛho ntam mekyerɛɛ Abraham ne Isak ne Yakob no, ɛfiri sɛ wɔanni m’akyiri anwie!

¹²Gye Kenisini Yefune ba Kaleb ne Nun ba Yosua, ɛfiri sɛ wɔn na wɔadi AWURADE akyiri nokorɛ mu.

¹³Na AWURADE bo fuu Israel, na ɔmaa wɔkyinkyinii ɛserɛ so mfirinhyia aduanan kɔsii sɛ awoɔ ntoatoasoɔ a wɔyɛɛ AWURADE anim bɔne no nyinaa wiee sa.

¹⁴Na hwɛ, moasɔre asi mo nananom ananmu, mmarima nnebɔneyɛfoɔ asefoɔ, sɛ mode AWURADE abufuhyeɛ no bi reka ho de aba Israel so ara.

¹⁵Sɛ mosane firi AWURADE akyi a, ɔbɛgya wɔn hɔ bio, ɛserɛ so, na moasɛe ɔman mu yi nyinaa.

¹⁶Ɛnna wɔtwe pinii no kaa sɛ: Yɛbɛgyegye nnwammuo wɔ ha ama yɛn mmoa, na yɛakyekyere nkuro nso ama yɛn mma;

¹⁷na yɛn deɛ, yɛamia asɔ akodeɛ mu adi Israelfoɔ anim akɔsi sɛ yɛde wɔn bɛduru wɔn tenabea ansa; na yɛn mma ntenatena nkuro a ɛyɛ den no mu, asase no sotefoɔ no nti.

¹⁸Yɛrensane mma yɛn afie de bɛkɔ akɔsi sɛ Israelfoɔ no nyinaa bɛnya wɔn agyapadeɛ mmaako mmaako adi soɔ.

¹⁹Na yɛne wɔn remfa agyapadeɛ wɔ Yordan agya ne akyire, ɛfiri sɛ yɛn agyapadeɛ abɛfiri Yordan agya ha wɔ apueeɛ fam ama yɛn.

²⁰ Na Mose ka kyerɛɛ wɔn sɛ: Sɛ mobɛyɛ yei na moamia wɔ AWURADE anim akɔko,

²¹na mo mu wɔn a wɔamia nyinaa bɛtwa Yordan adi AWURADE anim akɔsi sɛ ɔbɛpamo n’atamfo afiri n’anim,

²²na wɔabrɛ asase no ase AWURADE anim ansa na moasane a, ɛnneɛ na moayɛ mo asɛdeɛ AWURADE ne Israel ho, na asase yi nyɛ mo agyapadeɛ, AWURADE anim.

²³Na sɛ moanyɛ saa a, hwɛ, na moayɛ AWURADE bɔne, na monhunu yie sɛ, mo bɔne bɛyi mo ama.

²⁴Monkyekyere nkuro mma mo mma na monnyegye ban mma mo nnwan, na deɛ afiri mo anomu no, monyɛ.

²⁵Na Gad mma ne Ruben mma no ka kyerɛɛ Mose sɛ: Wo nkoa bɛyɛ sɛdeɛ me wura ahyɛ no.

²⁶Yɛn mma ne yɛn yerenom ne yɛn nnwan ne yɛn anantwie nyinaa ntena Gilead nkuro mu hɔ;

²⁷na wo nkoa mu wɔn a wɔamia rekɔ ɔsa nyinaa bɛtwam adi AWURADE anim akɔko, sɛdeɛ me wura kaeɛ no.

²⁸Ɛnna Mose hyɛɛ wɔn ho mmara maa Ɔsɔfoɔ Eleasa ne Nun ba Yosua ne Israelfoɔ mmusuakuo mu mpanimfie so atitire no.

²⁹ Na Mose ka kyerɛɛ wɔn sɛ: Sɛ Gad mma ne Ruben mma ne mo twa Yordan, wɔn a wɔamia di AWURADE anim rekɔ ɔsa nyinaa, na wɔnya brɛ asase no ase mo anim a, ɛnneɛ momfa Gilead asase mma wɔn na wɔnni so;

³⁰na sɛ wɔammia ne mo antwa a, ɛnneɛ Kanaan asase so na wɔmma wɔnnya tenabea wɔ mo mu.

³¹Na Gad mma ne Ruben mma buaa sɛ: Deɛ AWURADE aka akyerɛ wo nkoa no, saa ara na yɛbɛyɛ:

³²Yɛn deɛ, yɛbɛmia adi AWURADE anim atwam akɔ Kanaan asase so, na yɛn agyapadeɛ a yɛanya Yordan agya ha no atena yɛn hɔ.

³³ Ɛnna Mose de Amorifoɔ hene Sihon ahennie ne Basan hene Og ahennie, asase no ne n’ahyeɛ mu nkuro, asase no so nkuro a atwa ahyia nyinaa maa Gad mma ne Ruben mma ne Yosef ba Manase abusuakuo fa.

³⁴Na Gad mma no kyekyeree Dibon ne Atarot ne Aroer,

³⁵ne Atrot-sofan ne Yaser ne Yogbeha,

³⁶ne Bet-nimra ne Bet-haran, nkuro a wɔatoto ho afasuo ne nnwammuo.

³⁷Na Ruben mma no kyekyeree Hesbon, Eleale, Kiriataim,

³⁸Nebo ne Baal-meon (a din no sakyerasakyeraeɛ) ne Sibma, na wɔtotoo nkuro a wɔkyekyereeɛ no din.

³⁹Na Manase ba Makir mma sii mu kɔɔ Gilead kɔfae, na wɔpamm Amorifoɔ a wɔwɔ hɔ no.

⁴⁰Na Mose de Gilead maa Manase ba Makir, na ɔtenaa mu.

⁴¹ Na Manase ba Yair sii mu kɔfaa wɔn atenaeɛ no, na ɔfrɛɛ no Yair atenaeɛ.

⁴²Na Noba sii mu kɔfaa Kenat ne ɛho nkurowa, na ɔde ne din Noba toe.