Read Twi Asante Mika 2 Bible Online

Mika 2 - Twi Asante bible

Mika 2

¹ Wɔnnue, wɔn a wɔdwene amumuyɛsɛm ne wɔn a wɔsiesie bɔne, wɔn mpa soɔ; anɔpa hann mu wɔyɛ, ɛfiri sɛ ɛwɔ wɔn nsam tumi mu,

²na wɔn ani bere mfuo, na wɔgye, ne afie, na wɔfefa, na wɔsi ɔbarima ne ne fie ne onipa ne n’agyapadeɛ apempem.

³ Enti sɛ AWURADE seɛ nie: Hwɛ, meredwene abusua yi ho asɛmmɔne bi a morentumi nyiyi mo kɔn mfiri mu, na morenyi akyea ahantan so nso, na ɛbɛyɛ berɛ bɔne.

⁴Ɛda no wɔbɛbu mo ho bɛ na wɔabe kwadwom sɛ: Ade ayɛ yɛn! Me man kyɛfa no, wasakyera. Wagye afiri me nsam; Atuateni na ɔkyɛ yɛn mfuo mu ma no yi.

⁵Enti worennya deɛ ɔde susuhoma bɛto wo kyɛfa soɔ, AWURADE asafo mu.

⁶ Monnka adiyisɛm! Sɛdeɛ wɔkeka no ne no; wɔnnka yeinom ho adiyisɛm; ahohora remma.

⁷ Yakob fie, wɔnka sɛ AWURADE honhom nni boasetɔ anaa? Yeinom ne ne nneyɛɛ anaa? Ɛnyɛ yie na me nsɛm yɛ deɛ ɔnam tee no?

⁸Nanso mosɔre tia me man sɛ ɔtamfoɔ, na moyi wɔn a wɔtwam dwoodwoo a wɔmpɛ ko no ho ntadeɛ so ngusoɔ.

⁹Mopamo me man mu mmaa firi wɔn afie fɛfɛ mu, na mogye wɔn animuonyam firi mmɔtafowa hɔ koraa.

¹⁰Monsɔre na monkɔ! Na ɛha nyɛ mo homebea, efiguo a ɛde sɛeɛ a ɛso ba no nti.

¹¹Sɛ ɔbarima a ɔnam keka ahuhusɛm na ɔdaadaa di atorɔ ka sɛ: Mɛka wo bobesa ne nsaden ho adiyisɛm, a, ɔno na ɔbɛyɛ ɔman yi adiyisɛnkafoɔ!

¹² Boa na mɛboa mo nyinaa ano, Yakob, nhyia na mɛhyia Israel nkaeɛ. Mɛka wɔn mabom sɛ nnwan wɔ nnwammuo mu, sɛ mmoakuo wɔn didibea so; nnipa dodoɔ a wɔyɛ hoo.

¹³ Otwafoɔ di wɔn anim reforo aba. Wɔbɔ kirididi sene fa kuro pono mu, na wɔfa mu firi adi bio. Na wɔn hene sene di wɔn anim, na AWURADE di wɔn kan.