Read Twi Asante Mika 7 Bible Online

Mika 7 - Twi Asante bible

Mika 7

¹Mennue, na mayɛ sɛ nnuabateɛ, sɛ bobe aba mpɛpɛdie, bobe esia a mɛdie, borɔdɔmakan a me kɔn dɔ no bi nni hɔ.

² Nnipa pa ayera afiri asase so; teefoɔ nni nnipa mu, wɔn nyinaa tetɛ mogya, wɔsunsum wɔn nuanom fidie.

³Wɔn nsa gu bɔne so sɛ ɛnyɛ yie; ɔsafohene bisa biribi, na ɔtemmufoɔ pɛ kɛtɛasehyɛ, na onipa kɛseɛ ka ne kra bɔnepɛ ho asɛm, sɛdeɛ wɔbom nwono amumuyɛ ne no.

⁴Wɔn mu nipa pa te sɛ hwerɛmo, wɔn mu teefoɔ sene nkasɛɛ ban. W’awɛmfoɔ da no, w’asotwe no reba, ɛno na wɔn sakasakayɛ bɛduro.

⁵Monnnye adamfoɔ nnni, mommfa mo ho nnto ɔyɔnkoɔ so; ɔbaa a ɔda wo koko mu no, ne ho na wɛn w’ano.

⁶ Na ɔbabanin bu n’agya ɔsesani, ɔbabaa sɔre tia ne na, aseɛ sɔre tia n’ase, onipa fiefoɔ yɛ n’atamfo.

⁷Na me deɛ, AWURADE na mehwɛ no kwan, mɛtwɛn me nkwagyeɛ Nyankopɔn no. Me Nyankopɔn bɛtie me.

⁸ Me tamfo, mma w’ani nnnye me ho; na mahwe ase a, mɛsɔre; na mete sum mu a, AWURADE ne me hann.

⁹ Mɛsoa AWURADE abufuhyeɛ no, ɛfiri sɛ mayɛ no bɔne, de akɔsi sɛ ɔbɛham me ham ama me, na wabu atɛn ama me; ɔbɛyi me afiri aba hann mu; mɛhwɛ ne tenenee no.

¹⁰ Na me tamfo bɛhunu, na aniwuo abɛkata ne so, ɔno a ɔka kyerɛɛ me sɛ: Ɛhe na wo Nyankopɔn no wɔ? Mede m’ani bɛhwɛ no, afei wɔbɛtiatia ne so sɛ mmorɔno so dɔteɛ.

¹¹Ɛda a wɔbɛto wo fasuo no reba; ɛda no so na w’ahyeɛ bɛkɔ akyirikyirie.

¹²Ɛda no na wɔbɛfiri Asiria ne Misraim nkuro mu aba wo nkyɛn, na wɔbɛfiri Misraim akɔsi asuo no ano, afiri po akɔsi po, afiri bepɔ no akɔsi bepɔ aba.

¹³Na asase no bɛdane amamfo, ɛsofoɔ no nti, wɔn nneyɛɛ so aba no nti.

¹⁴ Fa wo poma yɛne wo man, w’agyapadeɛ nnwan a wɔn nko ara te kwaeɛm, Karmel atifi no. Ma wɔnnidi Basan ne Gilead sɛ tete nna no mu.

¹⁵Mɛma wɔahunu anwanwadeɛ sɛ nna a wɔfirii Misraim asase so baeɛ no.

¹⁶ Amanaman bɛhunu, na wɔn ani awuwu wɔn mmaninneɛ nyinaa ho; wɔde wɔn nsa bɛtuatua wɔn ano, na wɔn aso nso bɛsisi.

¹⁷ Wɔbɛtafere mfuturo sɛ ɔwɔ, sɛ mmoa a wɔtwe wɔn ho fam, wɔde ahopopoɔ bɛfiri wɔn huntabea aba; wɔde suro bɛbɛn AWURADE yɛn Nyankopɔn, na wɔasuro w’anim.

¹⁸ Hwan na ɔte sɛ wo; Onyankopɔn a wode amumuyɛ kyɛ na wosiane mmarato ho ma w’agyapadeɛ nkaeɛ no? Worensɔ w’abufuo mu daa, na adɔeɛ mmom na wopɛ;

¹⁹yɛn ho na wobɛsane ama ne yam ahyehye wo, wobɛpepa yɛn amumuyɛ. Na wobɛto wɔn bɔne nyinaa agu ɛpo bunu mu.

²⁰ Fa nokorɛ kyerɛ Yakob, yi adɔeɛ kyerɛ Abraham, sɛdeɛ wokaa yɛn agyanom ntam firi tete nteredee nna mu no.