Read Twi Asante Nahum 3 Bible Online

Nahum 3 - Twi Asante bible

Nahum 3

¹ Due, mogya kuro! Wo a apoobɔ ne awudie ayɛ wo mu ma na fomfa to ntwa da wɔ wo mu.

²Ɔpɔnkɔ abaa gyegye, teaseɛnam nan yɛ kirididi, apɔnkɔ fa mmirika, nteaseɛnam hurihuri.

³Apɔnkɔsotefoɔ nam so reba, afena te nyinamnyinam, na pea pa sɛ ɔsraman, atɔfoɔ dɔɔso, awufoɔ dodoɔ yɛ duru na afunu nni ano; wɔsuntisunti wɔn afunu no.

⁴ Yei nyinaa firi Ninewe, odwamamfoɔ hoɔfɛfoɔ ntafowayifoɔ no adwamammɔ dodoɔ no, ɔno na ɔde n’adwamammɔ tɔn amanaman, na ɔde ne ntafowayie tɔn mmusuakuo.

⁵ Hwɛ, me ne wo anya, asafo AWURADE asɛm nie, na mɛyi w’atadeɛ mmuano afa w’anim, na mama amanaman ahunu w’adagya, na ahennie aman ahunu w’ahohora.

⁶Na mɛto atantanneɛ agu wo so, na magu w’anim ase, na mede wo mayɛ ahwɛdeɛ.

⁷Na obiara a ɔbɛhu woɔ no bɛdwane wo, na waka sɛ: Ninewe adane kurofo! Hwan na ɔbɛdi ne ho abooboo? Ɛhe na mɛhwehwɛ awerɛkyekyefoɔ mama woɔ?

⁸ Woyɛ sene No-Amon a ɔte asutene ntam a nsuo nko atwa ne ho ahyia a n’aban ne ɛpo na wɔde ɛpo ayɛ ɛho fasuo no anaa?

⁹Etiopia ne Misraimfoɔ yɛ ne dɔm a ɛyɛ den na wɔnni ano; afei nso, Put ne Libiafoɔ nso di boaa wo.

¹⁰ Yei nyinaa akyi no, wɔfaa no kɔɔ nnommum mu, ne mmotafowa nso, wɔde wɔn abobɔ mmorɔno nyinaa ntweaso akunkum wɔn, na wɔtwee n’animuonyamfoɔ so ntonto, na wɔguu ne nnipa akɛseɛ nyinaa mpokyerɛ.

¹¹ Wo nso ahohiahia bɛboro wo na woayera mu, na wobɛhwehwɛ dwanekɔbea ɔtamfoɔ anim.

¹²W’aban a ɛyɛ den nyinaa bɛyɛ sɛ borɔdɔma nnua a ɛso wɔ adɔmakan, sɛ wɔwoso a, ɛtotɔ odifoɔ anomu.

¹³Hwɛ, w’akofoɔ ayɛ mmaa wɔ wo mu, bue na wɔabue w’asase apono ama w’atamfo, ogya ahye w’apono akyiri adaban.

¹⁴Sesa nsuo sie ma ntua no, miamia w’abandenden mu! Tia dɔteɛ mu wɔ ɛboɔ, miamia ntaayaa fononoo no mu.

¹⁵ Ɛhɔ ara na ogya bɛhye woɔ, afena bɛtwa wo adi wo sɛ ntutummɛ, mpo sɛ wo dodoɔ te sɛ ntutummɛ, na wo dɔɔso sɛ mmɛbɛ a.

¹⁶Woama w’adwadifoɔ adɔɔso asene ɔsoro nsoromma; nanso te sɛ ntutummɛ no wɔgu so fom fa na wɔtu kɔ.

¹⁷W’asafohene te sɛ mmɛbɛ, na wo dɔm a woapɔn wɔn te sɛ mmɛbɛ akuakuo a wɔsensam ban ho ban ho awɔ da; owia firi a, wɔtu kɔ a obiara biara nnim faako a wɔkorɔ.

¹⁸W’ahwɛfoɔ afa mu adeda, O Asiriahene, w’animuonyamfoɔ deda hɔ; wɔabɔ wo man apete mmepɔ so, na ɔnoboafoɔ nni hɔ.

¹⁹Wo kuro nni asayɛ, wo pira no mu yɛ den; obiara a ɔte wo nka no bɔ ne nsam gu wo so, ɛfiri sɛ hwan koraa so na womfaa wo daa daa haw no nkɔeɛ?