Read Twi Asante Habakuk 2 Bible Online

Habakuk 2 - Twi Asante bible

Habakuk 2

¹ Mɛgyina m’ahwɛeɛ, na mede me ho bɛsi aban so, na masra mahwɛ asɛm ko a ɔbɛka akyerɛ me ne deɛ mede bɛbua no wɔ me nkurobɔ no ho.

²Na AWURADE buaa me sɛ: Twerɛ adehunu no, na kyerɛkyerɛ mu gu aboɔpono so, na wɔatumi akan no wɔ ahoɔherɛ so.

³ Na adehunu no da so kyerɛ berɛ a wɔahyɛ, na ɛrepɛ kwan aba mu, na ɛyɛ nokorɛ nso. Sɛ ɛtwentwɛn ase mpo a, twɛn no ara, na ba deɛ, ɛbɛba, ɛrenka akyi.

⁴ Hwɛ, ɔbɔnefoɔ kra huhuru, ɛntene wɔ ne mu, na ɔteneneeni deɛ, ɔnam ne nokorɛdie so na ɔbɛtena ase.

⁵Na bio nso, Kaldeafoɔ te sɛ nsabofoɔ. Na wɔyɛ nnipa ahokyerɛfoɔ a wɔn bo nnwo da; wɔatrɛ wɔn kra akɔnnɔ mu sɛ Asamando, na wɔte sɛ owuo a ɔmmeeɛ, wɔfa amanaman nnommum ba wɔn nkyɛn na wɔfom aman nyinaa fa.

⁶Ɛberɛ bi reba a wɔn nnomumfoɔ bɛsere na wɔadi wɔn ho fɛw sɛ: Ɔnnue, deɛ ɔnam asisie kwan so fa adeɛ a ɛnyɛ ne dea no. W’apoobɔ yi bɛkɔ so ara akɔsi da bɛn?

⁷Ɛnyɛ mpofirim na wɔn a wɔde wo ka bɛsɔreɛ atia wo, na wɔbɛnyane na wɔabɛhwanyan woɔ, na woadane wɔn asadeɛ?

⁸ Ɛsiane sɛ woafom amanaman pii afa nti, na woaka nnipa mogya agu, ne nhyɛsoɔ a wode ahyɛ asase, nkuro ne emufoɔ nyinaa soɔ nti aman mu nkaeɛ nyinaa bɛfom wo nso afa.

⁹Ɔnnue, deɛ ɔnya mfasoɔ bɔne ma ne fie, sɛ ɔde ne pirebuo bɛsi sorɔnsorɔmmea na wayi ne ho afiri mmusuo nsam no.

¹⁰Woatu agyina anya aniwuo ama wo fie, sɛ woatwitwa aman pii aguo, na woayɛ wo kra bɔne.

¹¹Ɔboɔ firi ɔfasuo mu bɛteam, na mpuna afiri nnua mu agye so.

¹² Ɔnnue, deɛ ɔkyekyere kuro mogya mu, na ɔto aban abusudeɛ mu.

¹³ Hwɛ, ɛmfiri asafo AWURADE nkyɛn sɛ aman yɛ adwuma brɛ ma ogya, na nkurɔfoɔ brɛ ma ade hunu?

¹⁴ Na afei deɛ, AWURADE animuonyam ho nimdeɛ bɛhyɛ asase so ma sɛdeɛ nsuo kata ɛpo soɔ.

¹⁵Due, wo a woma wo yɔnko nsa nom wɔ adwenbɔne kwan soɔ, na woma no borɔ na woahwɛ n’adagya mu.

¹⁶ Ahohora amee wo asene animuonyam; wo nso nom, na wo momonoto nna adi; AWURADE nifa mu kuruwa bɛdane aba wo so, na ɛfeɛ ne ahohora bɛgu w’animuonyam so.

¹⁷Na wo Babel, asɛmmɔne a wɔde dii Lebanon ne mmoa sɛeɛ a ɛbɔɔ wɔn binim no, nnipa mogya a woaka aguo, ne nhyɛsoɔ a wode ahyɛ asase, kuro ne emufoɔ nyinaa so no nyinaa bɛbua w’atifi.

¹⁸ Sɛ odwumfoɔ sene ohoni a, ɛho mfasoɔ ne deɛn? Ɛyɛ guo honi, kyerɛkyerɛni torofoɔ; ɛfiri sɛ odwumfoɔ yɛ ahoni mum a, ɔde ne ho to ɔno ara n’adwinnie a ɔdie no so.

¹⁹ Due, wo a woka kyerɛ dua sɛ: Nyane! Na woka kyerɛ ɔboɔ mum sɛ: Sɔre! Ɛno na ɛbɛkyerɛ adeɛ anaa? Hwɛ, wɔde sika ne dwetɛ adura ho, na ahome biara nni mu.

²⁰ Na AWURADE deɛ, ɔwɔ n’asɔrefie kronkron mu; na momma asase nyinaa nyɛ komm wɔ n’anim.