Read Twi Asante Hagai 2 Bible Online

Hagai 2 - Twi Asante bible

Hagai 2

¹Bosome a ɛtɔ so nson no da a ɛtɔ so aduonu baako no, AWURADE asɛm nam Odiyifoɔ Hagai so baa sɛ:

²Ka kyerɛ Sealtiel ba Serubabel, Yuda amrado no, ne Yehosadak ba Yosua, ɔsɔfo panin no, ne ɔman no nkaeɛ no sɛ:

³ Mo mu hwan na aka a ɔhunuu ɛdan yi n’akane animuonyam no? Na afei mohu no sɛn? Ɛnte sɛ adeɛ a ɛnyɛ hwee, mo ani so?

⁴Na afei, hyɛ wo ho den Serubabel, AWURADE asɛm nie, na hyɛ wo ho den, Yehosadak, ba Yosua, ɔsɔfo panin, na monhyɛ mo ho den, asase no so man nyinaa, AWURADE asɛm nie, na monyɛ adwuma no. Na medi mo akyi, asafo AWURADE asɛm nie.

⁵ Ɛsiane apam a me ne mo pameeɛ berɛ a mofirii Misraim baeɛ no, ɛna me honhom a ɛte mo mu no nti, monnsuro.

⁶ Na sɛ asafo AWURADE seɛ nie: Bio! Aka kumaa sɛ mawoso ɔsoro ne asase ne ɛpo ne asase pɛsɛɛ,

⁷na mɛwoso amanaman nyinaa, na amanaman nyinaa de w’agyapadeɛ bɛba, na mede animuonyam bɛhyɛ efie yi ma, asafo AWURADE na ɔseɛ.

⁸Me na sika ne dwetɛ wɔ me, asafo AWURADE asɛm nie.

⁹So na ɛdan yi animuonyam bɛso, akyire yi deɛ no bɛsene kane deɛ no, asafo AWURADE na ɔseɛ, na ɛha na mɛma asomdwoeɛ, asafo AWURADE asɛm nie.

¹⁰Bosome a ɛtɔ so nkron no da a ɛtɔ so aduonu nnan, Dario afe a ɛtɔ so mmienu no mu, AWURADE asɛm nam Odiyifoɔ Hagai so baa sɛ:

¹¹Sɛ asafo AWURADE seɛ nie: Bisa asɔfoɔ no na wɔmmua asɛmmisa yi sɛ:

¹²Hwɛ, sɛ obi kura nam kronkron n’atadeɛ mmuano mu, na ɔde mmuano no kɔka paanoo ne aduane a wɔanoa ne nsa ne ngo ne aduane biara a, ɛbɛyɛ kronkron anaa? Na asɔfoɔ no bua see sɛ: Dabi.

¹³ Na Hagai bisaa sɛ: Sɛ, efunu nti, deɛ ne ho akum kɔka yeinom biara a, na ɛho akum anaa? Na asɔfoɔ no bua see sɛ: Aane, ɛho akum.

¹⁴Ɛnna Hagai bua see sɛ: Saa na nkurɔfoɔ yi teɛ, na saa na ɔman yi teɛ wɔ m’anim, AWURADE asɛm nie, na saa na wɔn nsa ano adwuma nyinaa ne deɛ wɔde brɛ me hɔ no teɛ: Ɛho akum.

¹⁵Na afei monhwɛ deɛ ɛfiri nnɛ rekorɔ yi ɛbɛba. Wɔnnya mfaa ɔboɔ ntoo ɔboɔ soɔ AWURADE asɔrefie mu,

¹⁶ ɛyɛɛ mo deɛn? Obi ba ayukuo susuo adeɛ aduonu ho a, na ɛyɛ du. Obi ba nsa-kyi-amena ho bɛsa nhina aduonum a, na ɛyɛ aduonu.

¹⁷ Mede ɔhoɔ ne ɔpoɔ ne asukɔtweaa bɔɔ mo, mo nsa ano adwuma nyinaa, nanso moannane amma me nkyɛn, AWURADE asɛm nie.

¹⁸Afei monhwɛ mfiri ɛnnɛ da yi de rekorɔ, momfiri bosome a ɛtɔ so nkron no da a ɛtɔ so aduonu nnan a ɛne da a wɔhyɛɛ AWURADE asɔrefie no aseɛ no nhwɛ.

¹⁹Na aba bi da so wɔ ɛsan so? Bobe ne borɔdɔma ne atoaa aba ne ngodua ɛso anaa? Ɛda yi na mɛfiri aseɛ mahyira mo.

²⁰Na AWURADE asɛm baa Hagai nkyɛn ne mprenu so, bosome no da a ɛtɔ so aduonu nnan mu sɛ:

²¹ Ka kyerɛ Yuda amrado, Serubabel sɛ: Merebɛwoso ɔsoro ne asase,

²²na mɛbutu ahennie nhennwa, na masɛe amanaman ahennie ahoɔden, na mɛbutu nteaseɛnam ne wɔn a ɛtete mu, na apɔnkɔ ne wɔn a wɔtete wɔn soɔ sotenafoɔ ahwehwe ase, na obi atɔ ne nua afena ano.

²³ Ɛda no, asafo AWURADE asɛm nie, mɛfa wo, Sealtiel ba Serubabel, m’akoa, AWURADE na ɔseɛ, na mede wo ayɛ sɛ nsɔanodeɛ; na wo na mafa wo ayɛ me deɛ, asafo AWURADE asɛm nie.