Read Twi Asante Mateo 25 Bible Online

Mateo 25 - Twi Asante bible

Mateo 25

¹ Ɛnna wɔde ɔsoro ahennie no bɛto mmabaawa du bi a wɔtasee wɔn nkanea firi adi sɛ wɔrekɔhyia ayeforɔkunu no ho.

²Na wɔn mu nnum yɛ mmadwemma na nnum nso nyɛ mmadwemma.

³Na wɔn a wɔnyɛ mmadwemma no faa wɔn nkanea no, wɔamfa ngo ankura;

⁴na mmadwemma no faa ngo guu ntoa mu kaa wɔn nkanea ho.

⁵Na ayeforɔkunu no kyɛreeɛ no, wɔn nyinaa ani kumee na wɔdedaeɛ.

⁶Na dasuo mu no, wɔtee nteamu sɛ: Hwɛ, ayeforɔkunu no ni oo! Momfiri adi nkɔhyia no!

⁷Ɛnna mmabaawa no nyinaa sɔre kekaa wɔn nkanea.

⁸Na wɔn a wɔnyɛ mmadwemma no ka kyerɛɛ mmadwemma no sɛ: Momma yɛn mo ngo no bi, na yɛn nkanea redunnum.

⁹Na mmadwemma no buaa sɛ: Dabi, ɛrenso yɛn ne mo; na monkɔ wɔn a wɔtɔn mmom nkyɛn nkɔtɔ mo deɛ!

¹⁰Na wɔrekɔ akɔtɔ bie no, ayeforɔkunu no baeɛ, na wɔn a wɔasiesie wɔn ho no ne no kɔɔ ayeforɔhyia no ase, na wɔtoo pono no mu.

¹¹ Na akyire yi no, mmabaawa a aka no nso ba bɛkaa sɛ: Owura, Owura, hini yɛn!

¹² Na ɔbuaa sɛ: Nokorɛ mese mo sɛ, menni mo.

¹³ Enti monwɛn, na monnim da anaa dɔn ko no, (a Onipa Ba no reba.)[19]

¹⁴ Na ɛte sɛ onipa bi a ɔretu kwan akɔ baabi, na ɔfrɛɛ ɔno ara ne nkoa, na ɔde deɛ ɔwɔ hyɛɛ wɔn nsa.

¹⁵ Na ɔmaa ɔbaako talente nnum, na ɔbaako mmienu, na ɔbaako nso baako, sɛdeɛ wɔn mu biara ahoɔden teɛ; na ɔtuu kwan.

¹⁶Na ntɛm ara deɛ ɔnyaa talente nnum no kɔe, de kɔyɛɛ adwuma na ɔnyaa ho talente nnum.

¹⁷Saa ara na deɛ ɔnyaa mmienu no nso kɔnyaa mmienu kaa ho.

¹⁸Na deɛ ɔnyaa baako no deɛ, ɔkɔ kɔtutuu fam, na ɔde ne wura no sika no sieeɛ.

¹⁹Na ɛkyɛreeɛ no, nkoa no wura no bae, na ɔne wɔn bɛbuu nkonta.

²⁰Na deɛ ɔnyaa talente nnum no bae, de talente nnum kaa ho baa sɛ: Owura, talente nnum na wode hyɛɛ me nsa. Hwɛ, manya talente foforɔ nnum maka ho.

²¹ Ne wura no see no sɛ: Mo, akoa pa ne nokwafoɔ, woadi kakra yi ho nokorɛ, mede wo bɛsi nnoɔma pii so; kɔ wo wura anigyeɛ mu!

²²Na deɛ ɔnyaa talente mmienu no baa sɛ: Owura, talente mmienu na wode hyɛɛ me nsa. Hwɛ, manya talente foforɔ mmienu maka ho.

²³ Ne wura no see no sɛ: Mo, akoa pa ne nokwafoɔ, wadi kakra yi ho nokorɛ, mede wo bɛsi nnoɔma pii so; kɔ wo wura anigyeɛ mu!

²⁴Na deɛ ɔnyaa talente baako no nso baa sɛ: Owura, menim wo sɛ woyɛ onipa a woyɛ den a wotwa faako a wonnuaeɛ, na woboaboa ano faako a womfa mpeteeɛ;

²⁵enti mesuroe, na mede wo talente no mekɔsiee fam. Hwɛ, w’adeɛ ni!

²⁶Ɛnna ne wura no bua see no sɛ: Akoa bɔne ne onihafoɔ, wonim sɛ metwa faako a mennuaeɛ, na meboaboa ano faako a memfa mempeteeɛ?

²⁷Ɛnneɛ anka ɛsɛ sɛ wode me sika no kɔhyɛ sikasesafoɔ nsa, na meba a, mabɛgye m’adeɛ ne ɛho nsiho.

²⁸Enti monnye ne nsam talente no, na momfa nkɔma deɛ ɔwɔ talente du no!

²⁹ Na obiara a ɔwɔ no, wɔbɛma no na wanya aboro so; na deɛ ɔnni bie no deɛ, deɛ ɔwɔ no mpo wɔbɛgye afiri ne nsam.

³⁰ Na akoa a ne ho nni mfasoɔ no, momfa no nkɔto no ntwene akyirikyiri sum no mu; ɛhɔ na osu ne setwerɛ wɔ.

³¹ Na Onipa Ba no bɛba n’animuonyam mu a n’abɔfoɔ nyinaa ka ne ho no, ɔbɛtena n’animuonyam ahennwa so.

³² Na ɔbɛboaboa amanaman nyinaa ano n’anim. Na ɔbɛpaepae wɔn mu sɛdeɛ odwanhwɛfoɔ paepae nnwanten ne mmirekyie mu.

³³ Na ɔde nnwanten no bɛgyina ne nifa, na ɔde mmirekyie no agyina benkum.

³⁴Ɛno na ɔhene no bɛse wɔn a wɔwɔ ne nifa no sɛ: Mo a m’Agya ahyira mo, mommra mmɛfa ahennie a wɔasiesie ama mo firi wiase mfitiaseɛ no nni!

³⁵ Na ɛkɔm dee me, na momaa me biribi diiɛ, na sukɔm dee me, na momaa me nsuo nomee, meyɛɛ ɔhɔhoɔ, na mofaa me kɔɔ mo fie;

³⁶medaa adagya, na mofiraa me ntoma, meyaree, na mobɛhwɛɛ me, medaa afiase, na mobaa me nkyɛn.

³⁷ Ɛnna nnipa tenenee no bɛbua no sɛ: Awurade, da bɛn na yɛhunuu wo sɛ ɛkɔm de woɔ, na yɛmaa wo aduane, anaasɛ sukɔm de woɔ, na yɛmaa wo nsuo nomeeɛ?

³⁸Afei da bɛn na yɛhunuu wo sɛ woyɛ ɔhɔhoɔ na yɛfaa wo kɔɔ fie, anaasɛ woda adagya, na yɛfiraa wo ntoma?

³⁹Afei da bɛn na yɛhunuu wo sɛ woyare, anaasɛ woda afiase, na yɛbaa wo nkyɛn?

⁴⁰ Na ɔhene bɛbua ase wɔn sɛ: Nokorɛ mese mo sɛ, sɛ moyɛ maa me nuanom nketewa yi mu baako yi, moyɛ maa me.

⁴¹ Ɛnna ɔbɛka akyerɛ wɔn a wɔwɔ benkum no nso sɛ: Mo a wɔadome mo, momfiri me so nkɔ daa ogya a wɔasiesie ama ɔbonsam ne n’abɔfoɔ no mu!

⁴²Na ɛkɔm dee me, na moamma me biribi anni, sukɔm dee me, na moamma me biribi annom;

⁴³meyɛɛ ɔhɔhoɔ, na moamfa me ankɔ mo fie, medaa adagya, na moamfira me ntoma; meyaree na medaa afiase, na moammɛhwɛ me.

⁴⁴Ɛnna wɔn nso bɛbua sɛ: Awurade, da bɛn na yɛhunuu wo sɛ ɛkɔm de woɔ anaasɛ sukɔm de woɔ, anaasɛ woyɛ ɔhɔhoɔ, anaasɛ woda adagya, anaasɛ woyare, anaasɛ woda afiase, na yɛammɛsom woɔ?

⁴⁵Ɛnna ɔbɛbua wɔn sɛ: Nokorɛ mese mo sɛ, sɛ moanyɛ amma nketewa yi mu baako yi, moanyɛ amma me.

⁴⁶ Na yeinom bɛfiri hɔ akɔ daa ahoyera mu; na nnipa tenenee no bɛkɔ daa nkwa mu.