Read Twi Asante Mateo 9 Bible Online

Mateo 9 - Twi Asante bible

Mateo 9

¹ Na ɔtenaa kodoɔ mu twa baa ɔno ara ne kurom.

²Na hwɛ, wɔde onipa bi a ɔyare mmubuo a ɔda kɛtɛ so brɛɛ no. Na Yesu hunuu wɔn gyidie no, ɔka kyerɛɛ obubuani no sɛ: Ɔba, ma wo bo ntɔ wo yam; wɔde wo bɔne akyɛ wo.

³ Na hwɛ, Atwerɛfoɔ no mu binom kaa wɔn mu sɛ: Onipa yi ka abususɛm.

⁴ Na Yesu hunuu wɔn adwene no, ɔkaa sɛ: Adɛn nti na modwene bɔne mo akoma mu?

⁵Na deɛ ɛwɔ he na ɛyɛ mmerɛ, sɛ wɔbɛka sɛ: Wɔde wo bɔne akyɛ wo, anaasɛ wɔbɛka sɛ: Sɔre, na nante?

⁶Na sɛdeɛ ɛbɛyɛ na mobɛhunu sɛ Onipa Ba no wɔ tumi wɔ asase soɔ, sɛ ɔde bɔne kyɛ nti, ɔka kyerɛɛ obubuani no sɛ: Sɔre, fa wo kɛtɛ na kɔ wo fie!

⁷Na ɔsɔre sii mu kɔɔ ne fie.

⁸Na nkurɔfoɔ akuakuo no hunuiɛ no, ɛyɛɛ wɔn nwanwa, na wɔhyɛɛ Onyankopɔn a ɔde saa tumi no ama nnipa no animuonyam.

⁹Na Yesu firi hɔ retwam no, ɔhunuu onipa bi a ɔte atogyeeɛ a wɔfrɛ no Mateo; na ɔka kyerɛɛ no sɛ: Di m’akyi. Na ɔsɔre dii n’akyi.

¹⁰Na ɛbaa sɛ ɔte adidiiɛ wɔ fie no, hwɛ, togyefoɔ ne nnebɔneyɛfoɔ pii ba bɛnee Yesu ne n’asuafoɔ no tenaa adidiiɛ.

¹¹ Na Farisifoɔ no hunuiɛ no, wɔka kyerɛɛ n’asuafoɔ no sɛ: Adɛn nti na mo kyerɛkyerɛfoɔ ne togyefoɔ ne nnebɔneyɛfoɔ didie yi?

¹²Na ɔteeɛ no, ɔka kyerɛɛ wɔn sɛ: Wɔn a wɔn ho yɛ den no, ɛnhia wɔn ɔyaresafoɔ na mmom wɔn a wɔyareɛ no.

¹³ Na monkɔ nkɔsua yei ase: Mepɛ mmɔborɔhunu na ɛnyɛ afɔrebɔ. Mammɛfrɛ ateneneefoɔ, na mebɛfrɛɛ nnebɔneyɛfoɔ.

¹⁴ Ɛnna Yohane asuafoɔ no baa ne nkyɛn bɛkaa sɛ: Adɛn nti na yɛne Farisifoɔ di mmuada, na w’asuafoɔ deɛ, wɔnni mmuada yi?

¹⁵ Na Yesu buaa wɔn sɛ: Ayeforɔkunu ne ayeforɔ asefoɔ no wɔ hɔ yi, ɛbɛyɛ dɛn na wɔn werɛ aho? Na nna bi bɛba a wɔbɛyi ayeforɔkunu no afiri wɔn nkyɛn, na ɛno ansa na wɔbɛdi mmuada.

¹⁶ Obi mfa ntoma foforɔ sini ntɛ atadeɛ dada mu; ɛfiri sɛ ntɛmu no yi firi atadeɛ no mu a, nteteeɛ no yɛ kɛseɛ.

¹⁷Nanso wɔmfa nsa foforɔ ngu aboa nwoma nkotokuo dada mu; anyɛ saa a, nkotokuo no bɛpaepae, na nsa no ahwie agu, na nkotokuo no asɛe. Na wɔde nsa foforɔ gu nkotokuo foforɔ mu, na ne mmienu nyinaa ayɛ yie.

¹⁸Ɔreka yeinom akyerɛ wɔn no, hwɛ, ɔpanin baako bi ba bɛkotoo no kaa sɛ: Seesei ara me babaa awu, na bra, na fa wo nsa bɛto ne so, na ɔbɛnya nkwa.

¹⁹Na Yesu sɔre ne n’asuafoɔ no dii n’akyi.

²⁰Na hwɛ, ɔbaa bi a mogya atu no mfirinhyia dummienu faa n’akyi de ne nsa bɛkaa n’atadeɛ ano nnwo.

²¹ Na ɔkaa no ne tirim sɛ: Sɛ mede me nsa meka n’atadeɛ nko ara a, me ho bɛyɛ me den.

²²Na Yesu danee ne ho na ɔhunuu no no, ɔkaa sɛ: Ɔbabaa, ma wo bo ntɔ wo yam, wo gyidie agye wo. Na ɛfiri dɔn no ara mu no na ɔbaa no ho yɛɛ no den.

²³Na Yesu duruu ɔpanin no fie na ɔhunuu atɛntɛbɛnhyɛnfoɔ ne nkurɔfokuo a wɔreyɛ gyegyeegye no,

²⁴ ɔkaa sɛ: Momma kwan, na ababaa no nwui, na wada. Na wɔseree no.

²⁵Na ɔpamm nkurɔfokuo no firii adie no, ɔkɔɔ mu kɔsɔɔ ne nsa, na ababaa no nyanee.

²⁶Na yei ho asɛm trɛɛ asase no nyinaa so.

²⁷Na Yesu firi hɔ rekorɔ no, anifirafoɔ baanu dii n’akyi teateaa mu sɛ: Dawid ba, hu yɛn mmɔbɔ!

²⁸Na ɔduruu fie no, anifirafoɔ no baa ne nkyɛn; na Yesu bisaa wɔn sɛ: Mogye di sɛ mɛtumi mayɛ yei? Wɔbuaa no sɛ: Aane, owura.

²⁹ Ɛnna ɔde ne nsa kaa wɔn ani kaa sɛ: Sɛdeɛ mo gyidie teɛ no, ɛnyɛ saa ara mma mo!

³⁰ Na wɔn ani buebueeɛ. Na Yesu hyɛɛ wɔn sɛ: Monhwɛ na obiara ante!

³¹Na wɔn deɛ, wɔfirii hɔ no, wɔde ne ho asɛm tenee asase no nyinaa so.

³²Na wɔrefiri adie no, hwɛ, wɔde emum bi a honhommɔne wɔ ne soɔ brɛɛ no.

³³Na ɔtuu honhommɔne no no, emum no kasae. Na ɛyɛɛ nkurɔfoɔ akuakuo no nwanwa, na wɔkaa sɛ: Wɔnhunuu saa bi da wɔ Israel.

³⁴ Na Farisifoɔ no deɛ, wɔkaa sɛ: Ɔnam ahonhommɔne panin so na ɔtu ahonhommɔne.

³⁵ Na Yesu kyinii nkuro ne nkuraa nyinaa mu kyerɛkyerɛɛ wɔn hyia adan mu, na ɔkaa ahennie no ho asɛmpa, na ɔsaa nyarewa ne ahoɔmmerɛ nyinaa.

³⁶ Na ɔhunuu nkurɔfoɔ akuakuo no, wɔyɛɛ no mmɔbɔ, ɛfiri sɛ na wɔabrɛ, na na wɔsam hɔ sɛ nnwan a wɔnni hwɛfoɔ.

³⁷ Ɛnna ɔka kyerɛɛ n’asuafoɔ no sɛ: Otwa adwuma no dɔɔso, na adwumayɛfoɔ no deɛ, wɔsua.

³⁸Enti monsrɛ otwa wura no, na ɔmma adwumayɛfoɔ mmra ne twa adwuma no mu!