Read Twi Asante Marko 12 Bible Online

Marko 12 - Twi Asante bible

Marko 12

¹ Na ɔfitii aseɛ nam mmebuo so kasa kyerɛɛ wɔn sɛ: Onipa bi yɛɛ bobe turo, na ɔgyee ho ban hyiae, na ɔtuu mu nsa-kyi-amena, na ɔtoo mu abantenten, na ɔde fɛm akuafoɔ bi, na ɔtuu bata.

²Na ɛberɛ no duruiɛ no, ɔsomaa akoa kɔɔ akuafoɔ no nkyɛn sɛ, ɔnkɔgye bobe turom aduaba no bi akuafo no hɔ.

³Na wɔfaa no hwee no maa no nam nsapan kɔe.

⁴Na bio ɔsomaa akoa foforɔ bi kɔɔ wɔn nkyɛn; na ɔno nso wɔpiraa no wɔ ne tirim, na wɔguu n’anim ase.

⁵Na ɔsomaa ɔfoforɔ; na ɔno deɛ, wɔkumm no; ɛne afoforɔ pii nso, na wɔhwee ebinom, na wɔkumm ebinom.

⁶Nanso na aka no ɔbaako, ne ba a ɔdɔ no. Na akyire yi, ɔsomaa ɔno nso kɔɔ wɔn nkyɛn sɛ: Wɔbɛfɛre me ba.

⁷Na akuafoɔ no deɛ, wɔsesee wɔn ho sɛ: Ɔdedifoɔ no nie; mommra mma yɛnkum no, na agyapadeɛ no ayɛ yɛn dea.

⁸ Na wɔfaa no kumm no, twee no firii bobe turom hɔ too no twenee.

⁹Ɛdeɛn na bobe turo no wura no bɛyɛ? Ɔbɛba abɛsɛe akuafoɔ no, na ɔde bobe turo no ama afoforɔ.

¹⁰ Nso monkenkanee atwerɛ yi pɛn, sɛ: Ɛboɔ a abantofoɔ apoɔ no, ɛno ara na abɛyɛ ɔdan no ntweaso tiboɔ;

¹¹Awurade na ɔmaa yei baeɛ, na ɛyɛ nwanwa yɛn ani so anaa?

¹²Na wɔhwehwɛɛ sɛ wɔkyere no, nanso na wɔsuro nkurɔfokuo no; na wɔhunuu sɛ ɛbɛ a ɔbuiɛ no, ɔne wɔn. Na wɔgyaa no hɔ sii mu kɔe.

¹³ Na wɔsomaa Farisifoɔ ne Herodefoɔ no mu bi baa ne nkyɛn sɛ wɔmmɛpɛ no asɛm.

¹⁴Na wɔbaeɛ no, wɔsee no sɛ: Kyerɛkyerɛfoɔ, yɛnim sɛ woyɛ ɔnokwafoɔ na wonhwehwɛ biribi mfiri obi hɔ; na wonhwɛ nnipa anim, na wokyerɛkyerɛ Nyankopɔn kwan nokorɛ mu: Ɛwɔ ho kwan sɛ wɔyi toɔ ma Kaesare, anaasɛ wɔnyi? Yɛntua anaasɛ yɛnntua?

¹⁵Na ɔhunuu wɔn nyaatwom no, ɔsee wɔn sɛ: Adɛn nti na mosɔ me hwɛ? Momfa denare bi mmrɛ me na menhwɛ.

¹⁶Na wɔde bae. Na ɔbisaa wɔn sɛ: Hwan mfonini ne atwerɛ nie? Na wɔsee no sɛ: Kaesare dea.

¹⁷ Na Yesu bua see wɔn sɛ: Ɛnneɛ momfa Kaesare deɛ mma Kaesare, na momfa Nyankopɔn deɛ mma Onyankopɔn! Na ne ho yɛɛ wɔn nwanwa.

¹⁸Na Sadukifoɔ a wɔka sɛ owusɔreɛ nni hɔ no baa ne nkyɛn bɛbisaa no sɛ:

¹⁹ Kyerɛkyerɛfoɔ, Mose twerɛ maa yɛn sɛ: Sɛ obi nua wu, na ɔgya yerɛ, na wannya mma a, ne nua no nware ne yere no, na ɔnwo mma mma ne nua no.

²⁰Nso anuanom baason bi tenaa ase, na deɛ ɔdi kan waree yerɛ; na ɔwuiɛ no, wannya mma.

²¹Na deɛ ɔtɔ so mmienu no waree no, na ɔwui. Na ɔno nso wannya mma. Na deɛ ɔtɔ so mmiɛnsa no nso saa ara.

²²Enti nnipa baason no nyinaa waree no na wɔannya mma. Na wɔn nyinaa akyiri no ɔbaa no nso wui.

²³Na enti owusɔreɛ mu no, sɛ wɔnya sɔre a, wɔn mu hwan na ɔbɛyɛ ne yere? Ɛfiri sɛ nnipa baason no waree no.

²⁴Na Yesu see wɔn sɛ: Ɛnyɛ nim a monnim atwerɛsɛm ne Nyankopɔn tumi nti na mofom yi anaa?

²⁵Na wɔnya sɔre firi awufoɔ mu a, wɔnware, nso wɔmma awadeɛ, na wɔte sɛ abɔfoɔ wɔ soro.

²⁶ Na ɛfa awufoɔ nyane ho deɛ, monkenkanee no Mose nwoma mu wɔ wira no ho sɛdeɛ Onyankopɔn see no sɛ: Mene Abraham Nyankopɔn ne Isak Nyankopɔn ne Yakob Nyankopɔn no?

²⁷Ampa ara, ɔnyɛ awufoɔ Nyankopɔn, na mmom ateasefoɔ Nyankopɔn. Na mo deɛ mofom pii.

²⁸Na Atwerɛfoɔ no mu baako a ɔtee sɛ wɔregye akyinnyeɛ, na ɔhunuu sɛ wabua wɔn yie no ba bɛbisaa no sɛ: Mmara asɛm a ɛdi ne nyinaa kan ne deɛ ɛwɔ he?

²⁹ Na Yesu buaa no sɛ: Deɛ ɛdi mmara nsɛm no nyinaa kan ne: Israel, tie, Awurade yɛn Nyankopɔn yɛ Awurade koro;

³⁰na dɔ Awurade wo Nyankopɔn firi w’akoma nyinaa mu ne wo kra nyinaa mu ne w’adwene nyinaa mu ne w’ahoɔden nyinaa mu.

³¹ Na deɛ ɛtɔ so mmienu nie: Dɔ wo yɔnko sɛ wo ho. Mmara asɛm biara nni hɔ a ɛkyɛne yeinom!

³²Na ɔtwerɛfoɔ no see no sɛ: Wiɛ, kyerɛkyerɛfoɔ, ampa woaka no yie sɛ Onyankopɔn yɛ baako, na obiara nni hɔ sɛ ɔno nko ara;

³³ na sɛ wobɛdɔ no afiri akoma nyinaa ne nteaseɛ nyinaa ne ahoɔden nyinaa mu, na wobɛdɔ wo yɔnko sɛ wo ho, sene ɔhyeɛ afɔdeɛ ne mogya afɔdeɛ nyinaa.

³⁴ Na Yesu hunuu sɛ wabua no nyansam no, ɔsee no sɛ: Wo ne Nyankopɔn ahennie ntam kwan nware. Na obiara antumi ammisa no asɛm biara bio.

³⁵Na Yesu rekyerɛkyerɛ wɔ asɔrefie no, ɔkaa sɛ: Adɛn na Atwerɛfoɔ no ka sɛ Kristo yɛ Dawid ba?

³⁶ Na Dawid no ara nam Honhom Kronkron mu kaa sɛ: Awurade see me wura sɛ: Tena me nifa kɔsi sɛ mede w’atamfo bɛyɛ wo nan ntiasoɔ.

³⁷Dawid no ara frɛ no Awurade; na ɛyɛɛ dɛn na ɔbɛyɛɛ ne ba? Na nkurɔfoɔ pii no ara de anigyeɛ tiee no.

³⁸Na ɔsee wɔn ne nkyerɛkyerɛ mu sɛ: Monhwɛ yie wɔ Atwerɛfoɔ a wɔpɛ ntadeɛ atentene mu nanteɛ, ne edwa ase nkyea

³⁹ne mpanimfoɔ nkonnwa hyia adan mu ne mpanimfoɔ tenaberɛ adidie ase ho;

⁴⁰wɔn na wɔbɔ akunafoɔ apoo, nanso wɔboapa bɔ mpaeɛ atentene kyerɛ. Yeinom na wɔbɛnya afobuo a ɛboro soɔ.

⁴¹ Na Yesu kɔtenaa sika adaka no anim, ɔhwɛɛ sɛdeɛ nkurɔfoɔ no de sika regu adaka no mu; na adefoɔ pii de bebree bɛguu mu.

⁴²Na ɔbaa kunafoɔ hiani bi nso bae, na ɔde kaprɛba mmienu a ɛbɛyɛ kaprɛ bɛguu mu.

⁴³Na ɔfrɛɛ n’asuafoɔ no bae, na ɔka kyerɛɛ wɔn sɛ: Nokorɛ mese mo sɛ: Okunafoɔ hiani yi de deɛ ɛdɔɔso abɛgu mu sene wɔn a wɔde bi abɛgu sika adaka no mu nyinaa.

⁴⁴ Na wɔn nyinaa firi deɛ wɔwɔ, na abu wɔn soɔ no mu, na wɔde bi abɛgu mu; na oyi deɛ, ɔfiri ne hia mu de deɛ ɔwɔ nyinaa, n’adeɛ nyinaa, na ɔde abɛgu mu.