Read Twi Asante Marko 4 Bible Online

Marko 4 - Twi Asante bible

Marko 4

¹Na ɔfitii aseɛ kyerɛkyerɛɛ bio wɔ mpoano; na nkurɔfokuo pii hyia baa ne nkyɛn, enti ɔkɔɔ kodoɔ mu kɔtenaa ase ɛpo no ani; na nkurɔfokuo no nyinaa wɔ mpoano asase no so.

²Na ɔkyerɛkyerɛɛ wɔn nnoɔma pii wɔ mmebuo mu, na ɔsee wɔn ne nkyerɛkyerɛ no mu sɛ:

³Montie: Hwɛ, ogufoɔ bi firii adi kɔguu aba.

⁴Na ɛbaa sɛ ɔreguo no, ebi kɔguu kwankyɛn; na ewiem nnomaa ba bɛsosɔeɛ.

⁵Na ebi kɔguu aboɔ so, deɛ dɔteɛ pii nnie; na ntɛm ara na ɛfifiriiɛ, ɛfiri sɛ na dɔteɛ no mu nnɔ ntira;

⁶na owia firiiɛ no, ɛkusaeɛ, ɛsiane sɛ na ɛnni nhini nti, ɛwuiɛ.

⁷Na ebi kɔguu nkasɛɛ mu; na nkasɛɛ no nyiniiɛ, na ɛmiaa no, na anso aba.

⁸Na ebi kɔguu asase pa mu; na ɛfifirii kɔɔ so nyinii na ɛtrɛe na ɛsoe, ebi aduasa, ebi aduosia, ebi ɔha.

⁹Na ɔkaa sɛ: Deɛ ɔwɔ aso bɛtie no, ma no ntie!

¹⁰Na ɛkaa ɔno nko no, wɔn a wɔwɔ ne ho ne dummienu no bisaa no ɛbɛ no ase.

¹¹ Na ɔsee wɔn sɛ: Mo deɛ, wɔde ama mo sɛ monhunu Nyankopɔn ahennie ho ahuntasɛm no; na wɔn a wɔwɔ akyire no deɛ, wɔkyerɛ wɔn ne nyinaa mmebuo mu;

¹² na ehunu deɛ wɔahunu, na wɔanhunu mu, na ɛteɛ nso wɔate, na wɔante aseɛ, na da bi wɔansakyera, na wɔamfa wɔn bɔne ankyɛ wɔn.

¹³Na ɔsee wɔn sɛ: Monnim bɛ yi? Na ɛbɛyɛ dɛn na mobɛhunu mmɛ no nyinaa?

¹⁴Ogufoɔ no gu asɛm no.

¹⁵Na yeinom ne wɔn a wɔwɔ kwankyɛn no: Faako a wɔgu asɛm no, sɛ wɔnya te a, ntɛm ara Satan ba, na ɔbɛyi asɛm a wɔagu wɔ wɔn mu no.

¹⁶Na yeinom nso ne wɔn a wɔgu wɔn aboɔ so no: Wɔn na wɔnya te asɛm no a, ntɛm ara wɔde anigyeɛ gye,

¹⁷na ɛnnye nhini wɔn mu, na wɔwɔ hɔ berɛ tiaa bi; na akyire yi no, sɛ asɛm no nti ahohia anaa ɔtaa ba a, ntɛm ara na ato wɔn suntidua.

¹⁸Na yeinom ne wɔn a wɔgu wɔn nkasɛɛ mu no: Wɔne wɔn a wɔte asɛm no,

¹⁹ na ɔbra yi mu dadwene ne ahonyadeɛ nnaadaa ne nnoɔma a ɛkeka ho no ho akɔnnɔ ba mu a, ɛmia asɛm no, na ɛnso aba.

²⁰Na yeinom ne wɔn a wɔguu wɔn asase pa mu no: Wɔn a wɔte asɛm no, na wɔgyeɛ, na wɔso aba, ebi aduasa, na ebi aduosia, na ebi ɔha.

²¹ Na ɔsee wɔn sɛ: Wɔde kanea ba sɛ wɔde bɛhyɛ koraa anaasɛ mpa ase anaa? Ɛnyɛ sɛ wɔde bɛsi kaneadua soɔ anaa?

²² Na biribiara nni kɔkoam a wɔrenyi no adie, anaasɛ wɔde ahunta a ɛrenna adie.

²³Sɛ obi wɔ aso a ɔde bɛtie a, ma no ntie!

²⁴ Na ɔsee wɔn sɛ: Monhwɛ yie deɛ moteɛ no ho. Susukoraa ko a mode susuo no, wɔde bɛsusu ama mo, na wɔde bi bɛka mo ho.

²⁵ Na deɛ ɔwɔ no, wɔbɛma no bebree; na deɛ ɔnnie no, deɛ ɔwɔ mpo wɔbɛgye afiri ne nsam!

²⁶Na ɔkaa sɛ: Sɛdeɛ Nyankopɔn ahennie no teɛ nie: Ɛte sɛ onipa bi bɛgu aba wɔ fam,

²⁷ na ɔda, na ɔnyane anadwo ne awia, na aba no fifire, na ɛnyini, na ɔnnim sɛdeɛ ɛyɛeɛ.

²⁸Na asase no ara so aba, ɛyi ahahan kane, na afei ayɛ bɛtem, na afei ayɛ ayuo a anyini bɛtem no mu.

²⁹Na sɛ aba no nyini a, ntɛm ara ɔsoma ma wɔde kantankrankyi kɔ, ɛfiri sɛ twaberɛ no adu.

³⁰Na ɔkaa sɛ: Ɛdeɛn ho na yɛde Nyankopɔn ahennie no bɛtoɔ? Anaasɛ ɛbɛ bɛn na yɛbɛbu no ho?

³¹Ɛte sɛ sinapi aba fua a wɔdua no fam a ɛyɛ aba ahodoɔ a ɛwɔ asase so nyinaa mu ketewa,

³²na wɔdua a, ɛnyini na ɛyɛ kɛseɛ sene fan nyinaa, na ɛyiyi mman akɛseɛ, na ewiem nnomaa tumi tena ne nwunu ase.

³³Na mmɛ a ɛtete sɛɛ pii na ɔde kaa asɛm kyerɛɛ wɔn, sɛdeɛ wɔtumi te aseɛ.

³⁴Na wankwati bɛ ankasa ankyerɛ wɔn; na ɛka wɔn nko ara a, ɔkyerɛ n’asuafoɔ no ne nyinaa ase.

³⁵Na da no ara, ɛduruu anwummerɛ no, ɔsee wɔn sɛ: Momma yɛntwa nkɔ asuogya nohoa.

³⁶Na wɔgyaa nkurɔfokuo no kwan no, wɔfaa no kaa wɔn ho kodoɔ no mu sɛdeɛ ɔteɛ no ara; na akodoɔ bi nso ka ne ho.

³⁷Na ahum kɛseɛ bi tui, na asorɔkyeɛ bubu bɛguu kodoɔ no mu a na ɛreyɛ ayɛ ma.

³⁸Na ɔno deɛ ɔwɔ kodoɔ no to, ada sumiiɛ so. Ɛnna wɔnyanee no see no sɛ: Kyerɛkyerɛfoɔ, yɛremem yi, ɛmfa wo ho anaa?

³⁹Na Yesu sɔre teateaa mframa no, na ɔsee ɛpo no sɛ: Mua w’ano; yɛ komm! Na mframa no gyaee, na ɛyɛɛ dinn koraa.

⁴⁰Na ɔsee wɔn sɛ: Adɛn nti na moyɛ ahufoɔ sɛɛ? Adɛn na monni gyidie?

⁴¹Na wɔsuroo yie, na wɔsesee wɔn ho sɛ: Onipa bɛn ara ni na mframa ne ɛpo mpo tie no yi?